កូរ៉េ​ខាងជើងបាញ់​សាកល្បង​មី​ស៊ី​លប្រភេទថ្មី ផ្ទុកក្បាលគ្រាប់នុយក្លេអ៊ែរដោយ​ជោគជ័យ

យោងតាមការចេញផ្សាយរបស់ទូរទស្សន៍ជាតិជប៉ុន NHK នៅថ្ងៃទី ​០២ ខែ កក្កដា​ឆ្នាំ២០២៤, ប្រទេសកូរ៉េខាងជើងបានបាញ់សាកល្បងមីស៊ីលផ្លោងប្រភេទថ្មី Hwasong-11 ដែលមានសមត្ថភាពផ្ទុកក្បាលគ្រាប់នុយក្លេអ៊ែរដោយជោគជ័យ។​

កូរ៉េខាងជើងបានបាញ់បង្ហោះដោយជោគជ័យនូវមីស៊ីលHwasong-11ដែលមានសមត្ថភាពផ្ទុកក្បាលគ្រាប់ប្រភេទ Super-large ទម្ងន់៤.៥គីឡូក្រាម ក្នុងរយៈចម្ងាយអតិបរមា ៥០០គីឡូម៉ែត្រ និងរយៈចម្ងាយអប្បបរមា ៩០ គីឡូម៉ែត្រ។ មិនត្រឹមប៉ុណ្ណឹង ប្រទេសនេះក៏នឹងបាញ់សាកល្បងមីស៊ីលមួយផ្សេងទៀត ក្នុងខែកក្កដាផងដែរ ដើម្បីផ្ទៀងផ្ទាត់លក្ខណៈនៃការហោះហើរ និងថាមពលផ្ទុះនៃក្បាលគ្រាប់ដ៏ធំទំនើបនៅរយៈចម្ងាយមធ្យម ២៥០គីឡូម៉ែត្រ។

គួរបញ្ជាក់ថា បើយោងតាមអគ្គសេនាធិការចម្រុះរបស់កូរ៉េខាងត្បូង, មួយថ្ងៃមុនការបាញ់បង្ហោះជោគជ័យនេះប្រទេសកូរ៉េខាងជើងបានបាញ់មីស៊ីលផ្លោងចំនួនពីរក្នុងទិសដៅពីតំបន់ភាគខាងលិច។ មួយក្នុងចំណោមនោះ បានហោះប្រហែល ៦០០ គីឡូម៉ែត្រ មុនពេលធ្លាក់នៅសមុទ្រខាងកើត ចំណែកមួយទៀត ហោះបានត្រឹមប្រហែល១២០គីឡូម៉ែត្រប៉ុណ្ណោះ មុនពេលបាត់ពីរ៉ាដាហើយគេគិតថាវាបរាជ័យ៕

អត្ថបទ៖ ប៊ុន សុភាព