ជប៉ុន ព្រមានថា មហាគ្រោះរញ្ជួយដីនាពេលអនាគត អាចសម្លាប់មនុស្សដល់ទៅជាង ២៣ម៉ឺននាក់ ឯណោះ

រដ្ឋាភិបាលជប៉ុន បានចេញការព្យាករថា មានលទ្ធភាពពី ៧០ទៅ៨០% នៃមហារញ្ជួយដីកម្រិត៨ទៅ៩រ៉ិចទ័រ ដែលកើតឡើងនៅតាមបណ្ដោយអន្លង់ Nankai នារយៈពេល៣០ឆ្នាំខាងមុខ ហើយនៅក្នុងសេណារីយ៉ូអាក្រក់បំផុត គ្រោះមហន្តរាយដ៏ធំធេងនេះ អាចវាយប្រហារចាប់ពីតំបន់ Kanto ទៅដល់កោះ Kyushu ដោយបង្កជារលកយក្សស៊ូណាមិ ដែលនឹងលេបត្របាក់តំបន់ឆ្នេរពីចាប់ពី Kanto ទៅ Okinawa ដោយនឹងកម្ទេចអគារជាង២លានអគារ ព្រមទាំងអាចឈានដល់ការសម្លាប់មនុស្សជាង ២៣ម៉ឺននាក់ទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Naoshi Hirata ប្រធានទីភ្នាក់ងារឧតុនិយមជប៉ុន ហៅកាត់ JMA បាននិយាយថា ត្បិតតែមានលទ្ធភាពនៃគ្រោះមហន្តរាយបែបនេះមែន ប៉ុន្តែមិនមែនមានន័យថា រញ្ជួយដីដឹងតែកើតឡើងនោះទេ ពោលក៏អាចមានឱកាសនៃការគេចផុតដែរ។ 

នេះគឺជាការព្រមានលើកដំបូងរបស់រដ្ឋាភិបាលជប៉ុនអំពីមហាគ្រោះរញ្ជួយដីបែបនេះ ហើយការព្រមាននេះទៀតសោត កើតឡើងបន្ទាប់ពីការរញ្ជួយកម្រិត៧.១រ៉ិចទ័រជាមួយជម្រៅប្រហែល ៣០គីឡូម៉ែត្រ ដែលវាយប្រហារភាគនិរតីប្រទេសជប៉ុនកាលពីថ្ងៃព្រហស្បតិ៍ទី៨ខែសីហាឆ្នាំ២០២៤។

សូមបញ្ជាក់ថា អន្លង់ Nankai លាតសន្ធឹងប្រវែងប្រហែល៨០០គីឡូម៉ែត្រ ហើយជាកន្លែងបន្ទះតិចតូនិក Eurasian និង Philippine ជួបគ្នា។ អន្លង់នេះ នឹងកើតមហាគ្រោះរញ្ជួយដី ប្រហែលម្តងក្នុង១០០ឆ្នាំ ប៉ុន្តែគេមិនអាចដឹងមុនទេថាតើវាកើតឡើងនៅពេលណា។

តាមប្រវត្តិសាស្ត្រ ការរញ្ជួយដីនៅក្នុងអន្លង់នេះ តែងបណ្តាលឲ្យមានការខូចខាតយ៉ាងធ្ងន់ធ្ងរ ដោយចុងក្រោយបំផុតគឺនៅថ្ងៃទី២១ខែធ្នូឆ្នាំ១៩៤៦ ដែលបង្កជារលកយក្សស៊ូណាមិ សម្លាប់មនុស្ស ១ ៣៣០នាក់៕

អត្ថបទ៖ សុខ សុវណ្ណ

ចុចអាន៖ ជប៉ុន ព្រមានថា មហាគ្រោះរញ្ជួយដី នឹងកើតឡើងក្នុងពេលមិនយូរទៀតទេ