អ្នកស្រាវជ្រាវថា ឆ្មាក៏មានអារម្មណ៍សោកសៅដូចមនុស្សដែរ

អ្នកស្រាវជ្រាវនៅសាកលវិទ្យាល័យ Oakland (Michigan) បានបោះពុម្ភការរកឃើញនេះ នៅក្នុងទស្សនាវដ្ដី Applied Animal Behavior Science នៅដើមខែសីហា បន្ទាប់ពីបានស៊ើបអង្កេតថា តើឆ្មាដឹងពីរបៀបកាន់ទុក្ខនៅពេលដែលសត្វចិញ្ចឹមផ្សេងទៀតរស់នៅក្នុងផ្ទះជាមួយបានបាត់បង់ជីវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្រាវជ្រាវបង្ហាញថា ឆ្មានឹងស៊ីតិច គេងច្រើន ចំណាយពេលច្រើនតែម្នាក់ឯង ហើយជារឿយៗស្វែងរកដៃគូដែលបានស្លាប់របស់ពួកវា។ សត្វឆ្មាក៏អាចបង្កើតសំឡេងស្រដៀងនឹងសម្លេងមនុស្ស ហើយសំលេងរំខាននេះគឺជាសញ្ញាមួយដែលឆ្មាក៏មានអារម្មណ៍អវិជ្ជមាន ក្នុងន័យនោះសត្វកំពុងយំ។ ប្រភេទនៃការបង្ហាញរបស់សត្វឆ្មានេះ ត្រូវបានគេនិយាយថា មានភាពស្រដៀងគ្នាជាមួយនឹងជំងឺធ្លាក់ទឹកចិត្តចំពោះមនុស្ស។

អ្នកស្រី Vonk​​ មកពីសាកលវិទ្យាល័យ Michigan បានចែករំលែកជាមួយ The Sunday Times ថា «​យើងមានទំនោរគិតថាឆ្មាគឺនៅឆ្ងាយ និងមិនអាចសេពគប់បាន ខុសពីសត្វឆ្កែ។ ប៉ុន្តែការសិក្សានេះបានបង្ហាញពីគំនិតខុស។ សត្វឆ្មាងាយនឹងធ្លាក់ចូលទៅក្នុងភាពទទេរ និងសោកសៅនៅពេលដែលបាត់បង់មិត្តដែលរស់នៅជាមួយគ្នាអស់រយៈពេលជាយូរ»។

ក្នុងនោះ លោកស្រីពន្យល់​ថា ការ​ស្រក់​ទឹក​ភ្នែក​មិន​មែន​ជា​សញ្ញា​នៃ​ការ​សោកសៅ​ចំពោះ​សត្វ​នេះ​ទេ។ ភ្នែករបស់ឆ្មានឹងស្រក់ទឹកសម្រាប់ហេតុផលមួយចំនួនទាក់ទងនឹងសុខភាព ជាជាងដោយសារអារម្មណ៍។ មូលហេតុ​នៃ​ទឹក​ភ្នែក​ក្នុង​ឆ្មា​រួម​មាន​ការ​រលាក​ភ្នែក​ពី​អ្វីមួយដែលលោតចូលទៅក្នុងភ្នែក ឬ​ការខ្វាច​ពី​ឆ្មា​ផ្សេង​ទៀត​។ ទឹកភ្នែកក៏អាចកើតឡើងនៅពេលដែលឆ្មាមានជំងឺឆ្លង ដូចជាការឆ្លងមេរោគផ្លូវដង្ហើមខាងលើ។

ទោះបីជាយ៉ាងណា អ្នកស្រាវជ្រាវបានណែនាំដល់ម្ចាស់សត្វចិញ្ចឹម ឲ្យឧស្សាហ៍លេងជាទៀងទាត់ ថើប និងត្រដុសឆ្មារបស់ពួកគេ ដើម្បីធ្វើឲ្យអារម្មណ៍របស់ពួកគេប្រសើរឡើង។ ក្នុងករណីខ្លះប្រសិនបើមិនមានពេលច្រើនដើម្បីលេងជាមួយឆ្មា ម្ចាស់អាចគិតអំពីការចិញ្ចឹមសត្វមួយទៀតនៅក្នុងផ្ទះ។ ការមានមិត្តថ្មីមួយឬពីរបីនឹងជួយឆ្មារបស់អ្នកឲ្យមានអារម្មណ៍មិនសូវឯកោ ហើយរីករាយម្តងទៀតក្នុងពេលឆាប់ៗនេះ៕

អត្ថបទ៖ សាង ស្រីល័ក្ខ

ចុចអាន៖អ្នកវិទ្យាសាស្ត្រ អូស្ត្រាលី ប្រាប់រូបមន្តអាយុវែង ដែលមនុស្សចាស់តែងទម្លាប់ធ្វើប្រចាំថ្ងៃ