ប្រទេសនៅអាស៊ីអាគ្នេយ៍ រកឃើញករណីឆ្លងជំងឺ mpox បន្ថែមទៀត

ប្រទេសហ្វីលីពីននៅតំបន់អាស៊ីអាគ្នេយ៍ បានរកឃើញការឆ្លងជំងឺ mpox ៣ករណីថ្មីទៀត នាំឲ្យការឆ្លងសរុបក្នុងឆ្នាំនេះកើនដល់ ៨ករណី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីក្រសួងសុខាភិបាលកាលពីថ្ងៃអាទិត្យទី១ខែកញ្ញាឆ្នាំ២០២៤, ករណីទាំង៣នេះគឺសុទ្ធសឹងជាពូជមិនសូវគ្រោះថ្នាក់ Clade 2 ដោយក្នុងនោះ២ករណីរកឃើញនៅទីក្រុងម៉ានីល និងមួយករណីទៀត រកឃើញនៅតំបន់ Calabarzon។

ទោះបីជាយ៉ាងណាក៏ដោយ បើគិតចាប់តាំងពីខែកក្កដាឆ្នាំ២០២២មក ប្រទេសហ្វីលីពីន បានរកឃើញការឆ្លងសរុបទៅដល់១៧ករណីទៅហើយ។

កាលពីថ្ងៃទី១៤ខែសីហាឆ្នាំ២០២៤ WHO បានប្រកាសថា mpox ឬមានឈ្មោះដើម Monkeypox គឺភាពអាសន្នសុខភាពពិភពលោកដែលត្រូវព្រួយបារម្ភជាអន្តរជាតិ និងអំពាវនាវឲ្យប្រទេសនានា ចាត់វិធានការដោះស្រាយជាបន្ទាន់។

នៅឆ្នាំ២០២៤ ប្រទេសជាងដប់នៅទ្វីបអាហ្វ្រិក បានរាយការណ៍ពីការផ្ទុះជំងឺ mpox ខណៈគ្រាន់តែសាធារណរដ្ឋប្រជាធិបតេយ្យកុងហ្គោ មានការឆ្លងជាង៩០%ទៅហើយ។

តាមពិតទៅ mpox បានរាតត្បាតនៅទ្វីបអាហ្វ្រិករាប់ឆ្នាំមកហើយ ប៉ុន្តែទើបតែថ្មីៗនេះទេ ដែលវាលេចចេញពូជគ្រោះថ្នាក់ Clade 1B ទើបធ្វើឲ្យពិភពលោកព្រួយបារម្ភខ្លាំង។

សម្រាប់រោគសញ្ញា, mpox បណ្តាលឲ្យកើតកន្ទួលលើស្បែកឈានដល់ពងបែក ឬដំបៅនៅគ្រប់ទីកន្លែងលើរាងកាយ រួមទាំងប្រដាប់ភេទផងដែរ។ រោគសញ្ញាផ្សេងទៀតមានដូចជាគ្រុនក្តៅ ឈឺក្បាល ឈឺខ្នង ឈឺសាច់ដុំ ឈឺសន្លាក់ ឡើងកូនកណ្តុរ ញ័រញាក់ និងអស់កម្លាំង៕

អត្ថបទ៖ សុខ សុវណ្ណ

ចុចអាន៖ ទ្វីបអាហ្វ្រិកផ្ទុះជំងឺ mpox ខ្លាំង, មួយសប្តាហ៍ឆ្លងជិត ៤ពាន់ករណី និងស្លាប់៨១នាក់