ផ្អើលអតិថិជនដែលធ្លាប់ទិញ ក្រោយរកឃើញធ្មេញមនុស្សក្នុងនំព្រះខែ ពីហាងល្បីមួយនៅចិន

ក្នុងដែលពិធីបុណ្យពាក់កណ្តាលរដូវស្លឹកឈើជ្រុះកាន់តែខិតជិតមកដល់ បញ្ហាសុវត្ថិភាពម្ហូបអាហារនៃនំព្រះខែកំពុងទាក់ទាញការចាប់អារម្មណ៍ម្តងទៀត។ ប៉ុន្មានថ្ងៃមុននេះ ស្ត្រីម្នាក់នៅទីក្រុង Changzhou ខេត្ត Jiangsu ប្រទេសចិន បានចូលអ៊ីនធឺណេត ហើយចោទប្រកាន់ហាង Sam’s Club ក្នុងស្រុកថា លក់នំព្រះខែពេញដោយសាច់ស្រស់ៗ តែបង្កប់ធ្មេញមនុស្ស បង្កឲ្យមានការជជែកគ្នាយ៉ាងក្តៅគគុក។

យោងតាមប្រព័ន្ធផ្សព្វផ្សាយក្នុងស្រុក ស្ត្រីរូបនេះបានបង្ហោះរូបថតនំខេកដែលមានធ្មេញមនុស្សលាយឡំ ហើយនិយាយថា «​នេះគឺជានំព្រះខែដែលពោរពេញទៅដោយសាច់ស្រស់ៗពីហាង Sam’s Club ។ សមាជិកគ្រួសារខ្ញុំទើបតែញ៉ាំវាបន្តិចប៉ុណ្ណោះ​ ស្រាប់តែឃើញមានមានធ្មេញមនុស្សនៅខាងក្នុងសាច់នំ»។

ការបង្ហោះលាតត្រដាងមួយនេះបានរីករាលដាលយ៉ាងរហ័សតាមអនឡាញ ធ្វើឲ្យមនុស្សជាច្រើនព្រួយបារម្ភ និងខឹងសម្បារចំពោះគុណភាពនំព្រះខែរបស់ហាងដែលមានឈ្មោះល្បី។ ភាគច្រើនបានអំពាវនាវឲ្យមានការផាកពិន័យយ៉ាងធ្ងន់ធ្ងរ លើក្រុមហ៊ុនផលិត ដើម្បីធ្វើជាគំរូសម្រាប់អាជីវកម្មផ្សេងទៀត។

ទាក់ទិននឹងឧប្បត្តិហេតុធ្មេញមនុស្សនៅក្នុងនំព្រះខែ បុគ្គលិកបានឆ្លើយតបនឹងសារព័ត៌មានថា គណៈគ្រប់គ្រងហាងកំពុងដោះស្រាយស្ថានភាពនេះ ប៉ុន្តែមិនបានពន្យល់ថា ហេតុអ្វីបានជាមានធ្មេញនៅក្នុងនំព្រះខែនោះទេ។

ទោះបីជាយ៉ាងណា នេះមិនមែនជាលើកទីមួយទេ ដែលអតិថិជនបានរកឃើញវត្ថុចម្លែកនៅក្នុងផលិតផល Sam’s Club នោះ។​ កាលថ្ងៃទី ១៨ ខែសីហា អតិថិជនជាច្រើននៅទីក្រុង Shenzhen បានរាយការណ៍ថា គាត់បានរកឃើញវត្ថុរាងដូចគ្រាប់កាំភ្លើងនៅក្នុងសាច់មាន់ដុតដែលទិញពីហាង Sam’s Club ក្នុងទីក្រុង Qianhai ។

ដោយឡែក យោងតាមគេហទំព័រផ្លូវការរបស់ Sam’s Club China ម៉ាកយីហោនេះគឺជាហាងលំដាប់ខ្ពស់ដែលដំណើរការក្នុងទម្រង់នៃសមាជិកភាពបង់ប្រាក់ក្រោមក្រុម Walmart របស់អាមេរិក ដែលមានសមាជិកបង់ប្រាក់ច្រើនជាង ៥ លាននាក់ ជាមួយនឹងការចំណាយប្រចាំឆ្នាំជាមធ្យមរហូតដល់ ១៣ ពាន់យន់ឯណោះ។ គិតត្រឹមថ្ងៃទី ៣១ ខែសីហា Sam’s Club បានបើកហាងចំនួន ៤៩នៅទូទាំងប្រទេសចិនក្នុងទីក្រុងដូចជា ប៉េកាំង សៀងហៃ សិនជិន ក្វាងចូវ ហ្វូចូវ ដាលៀន និងហាំងចូវ។

យ៉ាងណាមិញ ប្រព័ន្ធផ្សព្វផ្សាយក្នុងស្រុកក៏បានចង្អុលបង្ហាញទៀតថា​ ក្នុងរយៈពេលប៉ុន្មានឆ្នាំចុងក្រោយនេះ Sam’s Club ត្រូវបានផាកពិន័យយ៉ាងហោចណាស់ ២០ ដងនៅក្នុងប្រទេសចិន សម្រាប់ហេតុផលដូចជាការផ្សាយពាណិជ្ជកម្មមិនពិត និងការលក់អាហារដែលគួរឲ្យសង្ស័យ។ ចាប់ពីឆ្នាំ ២០១៥ ដល់ឆ្នាំ ២០១៨ ហាងមួយនៅ Dalian ថែមទាំងត្រូវបានពិន័យយ៉ាងតិចប្រាំមួយដងដោយនិយតករទីផ្សារក្នុងស្រុកសម្រាប់បញ្ហាដូចជាការផ្សាយពាណិជ្ជកម្មមិនពិត អាហារដែលមានផ្សិត ផលិតផលក្លែងក្លាយ ឬធ្វើឲ្យអ្នកហូពឈឺពោះជាដើម៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖ដើម្បីបណ្តេញបុគ្គលិកដោយគ្មានប្រាក់សំណង ថៅកែក្រុមហ៊ុនជាច្រើននៅ ចិន ប្រើល្បិចកខ្វក់