យ៉ាងហោចណាស់មនុស្ស៨នាក់ស្លាប់ ក្នុងពេលប៉ុនប៉ងឆ្លងកាត់ផ្លូវទឹកអង់គ្លេស

យ៉ាងហោចណាស់មនុស្ស៨នាក់បានស្លាប់ក្នុងអំឡុងពេលប៉ុនប៉ងឆ្លងកាត់​​​ដែនទឹកភាគខាងជើងប្រទេសបារាំង​​ចូល​ទៅកាន់ប្រទេស​​អង់គ្លេស​ ។ នេះបើយោងតាមការចេញផ្សាយរបស់តីភ្នាក់ងារព័ត៌មាន AP នៅថ្ងៃទី១៦ខែកញ្ញានេះ។

សោកនាដកម្មនេះបានកើតឡើងកាលពីថ្ងៃសៅរ៍ចុង​សប្តាហ៍​ពាក់កណ្តាលអធ្រាត្រ នៅពេលដែលអាជ្ញាធរបានប្រទះឃើញ​ទូក​មួយគ្រឿងផ្ទុកមនុស្សរាប់សិបនាក់ ស្ថិតក្នុងភាពអាសន្ននៅជិតឆ្នេរមួយក្នុងទីក្រុង Ambleteuse។

សេចក្តីថ្លែងការណ៍របស់អាជ្ញាធរដែនសមុទ្របារាំងដែលទទួលបន្ទុកដែនទឹកនេះ និងសមុទ្រខាងជើង បាននិយាយថា កប៉ាល់ជួយសង្គ្រោះបារាំងត្រូវបានដាក់ពង្រាយទៅកាន់តំបន់នោះ ហើយសេវាជួយសង្គ្រោះបានផ្តល់ជំនួយផ្នែកវេជ្ជសាស្រ្តដល់ជនចំណាកស្រុកចំនួន៥៣នាក់នៅលើឆ្នេរខ្សាច់ តែ​ទោះ​បី​មាន​ការ​ថែទាំ​សង្គ្រោះ​បន្ទាន់​ក៏​ដោយ មនុស្ស ៨ នាក់​បាន​ស្លាប់​។

លើសពីនេះមនុស្ស ៦ នាក់ត្រូវបានបញ្ជូនទៅមន្ទីរពេទ្យ ក្នុងស្ថានភាពសង្គ្រោះបន្ទាន់ រួមទាំងទារកអាយុ ១០ខែដែលមានការថយចុះកម្តៅខ្លាំងផងដែរ ខណៈអ្នកនៅរស់រានមានជីវិតមកពីប្រទេសអេរីទ្រា ស៊ូដង់ ស៊ីរី អាហ្វហ្គានីស្ថាន អេហ្ស៊ីប និងអ៊ីរ៉ង់។

ទូកនេះផ្ទុកមនុស្សបានចំនួន ៥៩ នាក់បានចេញដំណើរពីឆ្នេរក្បែរទីក្រុងVimont និងបានរងការប៉ះទង្គិចនៅ​លើ​ថ្ម។យោងតាមអាជ្ញាធរក្នុងតំបន់បានឱ្យដឹងថា អ្នកនៅរស់រានមានជីវិតចំនួន៥១នាក់ត្រូវបានគេនាំទៅកាន់មជ្ឈមណ្ឌលទទួលជនចំណាស្រុកក្នុងទីក្រុង Toulouse ខណៈការិយាល័យរបស់រដ្ឋអាជ្ញានៅទីក្រុង Boulogne-sur-mer បានកំពុងបើកការស៊ើបអង្កេត។

ច្បាប់សិទ្ធិជ្រកកោនកាន់តែតឹងរ៉ឹងរបស់អឺរ៉ុប បានធ្វើឲ្យមានការកើនឡើងនូវភាពភ័យខ្លាច និងការប្រព្រឹត្តដោយអរិភាពលើជនចំណាកស្រុក ខណៈយ៉ាងហោចណាស់ជនចំណាកស្រុកចំនួន ៤៦នាក់បានស្លាប់ ខណៈពេលដែលព្យាយាមឆ្លងទៅចក្រភពអង់គ្លេសក្នុងឆ្នាំនេះ។

យ៉ាងហោចណាស់មនុស្ស ១៣៧,៥៦៣ នាក់បានទៅដល់ចក្រភពអង់គ្លេសបន្ទាប់ពីបានឆ្លងកាត់ប៉ុស្តិ៍ពីប្រទេសបារាំងចាប់តាំងពីឆ្នាំ ២០១៨ នេះបើយោងតាមតួលេខរបស់ U.K. Home Office ។ កាលពីថ្ងៃសៅរ៍តែមួយថ្ងៃ ទូកចំនួន ១៤ ដែលដឹកជនចំណាកស្រុកចំនួន ៨០១ នាក់បានទៅដល់ប្រទេសអង់គ្លេស។ ស្របពេលដែលមានការធ្វើចំណាកស្រុកកើនឡើងជាបន្តបន្ទាប់កាល​ពី​ខែ​កក្កដា ជន​ចំណាក​ស្រុក​បួន​នាក់​បាន​ស្លាប់​ដោយទូក​ក្រឡាប់​ ខណៈមនុស្សប្រាំនាក់ផ្សេងទៀត រួមទាំងកុមារម្នាក់បានស្លាប់នៅក្នុងការប៉ុនប៉ងមួយផ្សេងទៀតនៅក្នុងខែមេសា៕

អត្ថបទ៖ ប៊ុន សុភាព