បារាំង ដាក់​វិធានការសងសឹក​អ៊ីរ៉ង់វិញ​​ ក្រោយមន្ត្រី​ទូត​របស់ខ្លួន​រងហិង្សា​ និង​ចោទ​សួរនៅអ៊ីរ៉ង់​

បារាំងកំពុងពិចារណាកាត់បន្ថយចំនួនមន្ត្រីទូតរបស់ខ្លួននៅទីក្រុងតេហេរ៉ង់ និងបានកោះហៅភារធារីអ៊ីរ៉ង់ ប្រចាំទីក្រុងប៉ារីសមកព្រមានជាផ្លូវការ បន្ទាប់ពីមន្ត្រីការទូតបារាំងពីររូប រងការចាប់ខ្លួន សាកសួរ និងវាយដំពីរដ្ឋអំណាចអ៊ីរ៉ង់។

វិធានការសងសឹកជាបន្តបន្ទាប់ពីសំណាក់ប្រទេសបារាំង កំពុងស្ថិតក្រោមការវាយតម្លៃយ៉ាងម៉ត់ចត់ ខណៈរដ្ឋមន្ត្រីការបរទេសបារាំងបានប្រកាសក្តែងៗថា ទង្វើខុសច្បាប់អន្តរជាតិនេះនឹងត្រូវតែទទួលរងផលវិបាកត្រឡប់ទៅវិញជាដាច់ខាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ សារព័ត៌មាន​ផ្ដាច់មុខ Iran International លោក Jean-Noel Barrot រដ្ឋមន្ត្រីការបរទេសបារាំង បានលើកឡើងថា រដ្ឋាភិបាលបារាំងបានចាត់ទុកការវាយប្រហារលើមន្ត្រីខ្លួនជា «សកម្មភាពគំរាមកំហែងដ៏ធ្ងន់ធ្ងរ» និងជាការរំលោភលើអភ័យឯកសិទ្ធិការទូតយ៉ាងធ្ងន់ធ្ងរបំផុត។

ជាក់ស្ដែង មន្ត្រីទូតទាំងពីររូបដែលទទួលបន្ទុករៀបចំកម្មវិធីគាំទ្រសង្គមស៊ីវិល វិល្បករ និងអ្នកវិទ្យាសាស្ត្រនៅអ៊ីរ៉ង់ ត្រូវបានកម្លាំងសន្តិសុខអ៊ីរ៉ង់ឃាត់ខ្លួនអស់ជាច្រើនម៉ោង សាកសួរដោយបង្ខំផ្លូវចិត្ត និងបង្ករបួសស្នាមលើរាងកាយយ៉ាងតិចម្នាក់ មុនពេលដោះលែងឲ្យត្រឡប់មកស្ថានទូតវិញ និងត្រៀមហោះចាកចេញទៅប្រទេសបារាំងវិញ។

កម្រិតនៃវិធានការឆ្លើយតបដែលបារាំងអាចនឹងប្រើប្រាស់រួមមាន ការដាក់ទណ្ឌកម្មបន្ថែមតាមរយៈសហភាពអឺរ៉ុបទៅលើមន្ត្រីអ៊ីរ៉ង់ ដែលមានចំណែកទទួលខុសត្រូវ ស្រដៀងគ្នានឹងវិធានការដែលបារាំងធ្លាប់បានបណ្តេញមន្ត្រីការទូតអ៊ីរ៉ង់ និងបង្កកទ្រព្យសម្បត្តិរបស់ក្រសួងចារកម្មអ៊ីរ៉ង់កាលពីពេលមុនៗ។

លើសពីនេះ ទីក្រុងប៉ារីសក៏បានរំលឹកជាថ្មីនូវជំហររឹងត្អឹងរបស់ខ្លួន ដោយប្រកាសមិនព្រមដកទណ្ឌកម្មសេដ្ឋកិច្ចរបស់អឺរ៉ុបលើអ៊ីរ៉ង់ឡើយ ដរាបណាទីក្រុងតេហេរ៉ង់មិនបោះបង់ចោលកម្មវិធីនុយក្លេអ៊ែរ និងសកម្មភាពបង្កអស្ថិរភាពនៅក្នុងតំបន់មជ្ឈិមបូព៌ា។

ទោះជាយ៉ាងណា យោងតាមរបាយការណ៍ពីសារព័ត៌មាន The Jerusalem Post រដ្ឋមន្ត្រីការបរទេសអ៊ីរ៉ង់ លោក Abbas Araghchi បានច្រានចោលការចោទប្រកាន់ និងបានស្តីបន្ទោសត្រឡប់ទៅវិញថា មន្ត្រីការទូតបារាំងទាំងនោះ ត្រូវបានឃាត់ខ្លួនដោយសារតែធ្វើសកម្មភាពខុសឆ្គង និងល្មើសនឹងច្បាប់ផ្ទៃក្នុងរបស់សាធារណរដ្ឋឥស្លាមអ៊ីរ៉ង់។

យ៉ាងណាមិញ ភាពតានតឹងផ្នែកការទូតដ៏ស្រួចស្រាវនេះ បានកើតឡើងចំពេលដែលស្ថានភាពសន្តិសុខក្នុងតំបន់កំពុងឡើងកម្តៅខ្លាំង ដោយសារតែអ៊ីរ៉ង់កំពុងស្ថិតក្នុងស្ថានភាពប្រកាសសង្គ្រាមពេញទំហឹងជាមួយនឹងសហរដ្ឋអាមេរិក៕

អត្ថបទ ៖ សាង ស្រីល័ក្ខ

បារាំង ខឹងសម្បារយ៉ាងខ្លាំង ក្រោយមន្ត្រីការទូតខ្លួនរងការ​ធ្វើបាបនៅអ៊ីរ៉ង់