ព្យុះកំបុងត្បូង នឹងវាយប្រហារប្រទេសថៃ នៅថ្ងៃសុក្រនេះ

តាមការចុះផ្សាយរបស់ Bangkok Post នៅថ្ងៃពុធទី១៨ខែកញ្ញា, ប្រទេសថៃបានចេញការព្រមានថា នៅថ្ងៃសុក្រនេះ ព្យុះកំបុតត្បូងមួយនឹងមកវាយប្រហារ ដោយប៉ះពាល់ខ្លាំងតំបន់លើតំបន់ឦសាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយករង និងជាអ្នកនាំពាក្យនាយកដ្ឋានឧតុនិយម លោក Thanasit Iam-ananchai បាននិយាយថា ប្រព័ន្ធសម្ពាធទាបនៅប៉ែកខាងជើងសមុទ្រចិនខាងត្បូង កំពុងវិវត្តទៅជាព្យុះកំបុតត្បូង ហើយនឹងចូលមកដល់ភាគឦសានប្រទេសថៃនៅថ្ងៃសុក្រ ឬអាចឆាប់ជាងនេះក៏ថាបាន។

ឥទ្ធិពលរបស់វា នឹងបង្កឲ្យមានភ្លៀងធ្លាក់ខ្លាំង ទឹកជំនន់ភ្លាមៗ និងបំណាក់ដី ហើយវាក៏នឹងបណ្តាលឲ្យមានផលប៉ះពាល់ដល់ភាគខាងត្បូងនិងកណ្តាលប្រទេសថៃផងដែរ។

ក្រៅពីព្យុះកំបុតត្បូងនេះ ខេត្តចំនួន៥នៅភាគឦសាន ក៏ប្រឈមមុខគ្រោះទឹកជំនន់ដោយសារទឹកទន្លេមេគង្គ ហក់ឡើងខ្ពស់ផងដែរ។

ខេត្តទាំង៥នោះរួមមាន Bung Kan, Nakhon Phanom, Mukdahan, Amnart Charoen និង Ubon Ratchathani ដូច្នេះប្រជាពលរដ្ឋ ត្រូវត្រៀមលក្ខណៈនិងតាមដានព័ត៌មានអំពីស្ថានភាពទឹក ឲ្យជាប់លាប់។

ងាកទៅមើលខេត្តភូកេតឯណោះ កាលពីថ្ងៃចន្ទទី១៦ខែកញ្ញាឆ្នាំ២០២៤ មានភ្លៀងធ្លាក់ខ្លាំងណាស់ ​ជាហេតុជំរុញឲ្យមានការព្រមានអំពីហានិភ័យគ្រោះទឹកជំនន់ បំណាក់ដី និងបាក់ថ្មភ្នំថែមទៀត។

សូមបញ្ជាក់ថា រដូវទឹកជំនន់ឆ្នាំនេះ ហាក់កាចសាហាវខ្លាំង ដោយគិតចាប់តាំងពីពាក់កណ្តាលខែសីហាមក គ្រោះធម្មជាតិបានឆក់យកជីវិតមនុស្សចំនួន២២នាក់ហើយ នៅក្នុងប្រទេសថៃ៕

អត្ថបទ៖ សុខ សុវណ្ណ

ចុចអាន៖ ខេត្តភាគឦសាន ថៃ ចំនួន៥ ប្រឈមគ្រោះថ្នាក់ ព្រោះទឹកទន្លេមេគង្គ ហក់ឡើងខ្ពស់