សម្ព័ន្ធមិត្តរុស្ស៊ី គំរាមឲ្យណាតូត្រៀមទទួលនុយក្លេអ៊ែរ បើហ៊ានវាយប្រហារទឹកដីរបស់ខ្លួន

តាមការចុះផ្សាយរបស់ RT, សម្ព័ន្ធមិត្តចាក់ទឹកមិនលិចរបស់រុស្ស៊ីគឺប្រទេសបេឡារុស បានគំរាមទៅណាតូថា បើអង្គការនេះពិតជាវាយប្រហារទឹកដីរបស់ខ្លួនមែន នោះសង្គ្រាមលោកប្រហែលជាផ្ទុះឡើង ហើយសូមពួកគេត្រៀមខ្លួនទទួលអាវុធនុយក្លេអ៊ែរទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រធានាធិបតី Alexander Lukashenko គំរាមបែបនេះ ក្នុងអំឡុងពេលជួបជុំជាមួយក្រុមនិស្សិតនៅទីក្រុង Minsk កាលពីថ្ងៃសុក្រទី២៧ខែកញ្ញាឆ្នាំ២០២៤ ដោយនិយាយថា «នៅពេលគេវាយប្រហារយើង យើងនឹងប្រើអាវុធនុយក្លេអ៊ែរ ហើយរុស្ស៊ីក៏នឹងមិននៅស្ងៀមដែរ។ សហរដ្ឋអាមេរិកនិងប៉ូឡូញបាននិងកំពុងពង្រឹងកម្លាំងរបស់ពួកគេនៅតាមព្រំដែន ពួកគេកំពុងត្រៀមខ្លួនហើយ។ យើងសូមប្រាប់ឲ្យត្រង់ចុះ! បន្ទាត់ក្រហមគឺនៅព្រំដែននោះឯង អ៊ីចឹងបើពួកគេឈានជើងចូលព្រំដែនរបស់យើង នោះនឹងមានការឆ្លើយតបភ្លាម»។

ទោះបីជាយ៉ាងណាក៏ដោយ មេដឹកនាំ Lukashenko ក៏ទទួលស្គាល់ដែរថា បើបេឡារុសបាញ់នុយក្លេអ៊ែរមែន លោកខាងលិចក៏នឹងឆ្លើយតបវិញដូចគ្នា ហើយច្បាស់ជាកំណត់គោលដៅលើរុស្ស៊ីជាក់ជាមិនខាន។ ដូច្នេះ រុស្ស៊ីក៏នឹងបញ្ចេញអាវុធរបស់ខ្លួនដូចគ្នា ហើយសង្គ្រាមលោក ពិតជាមិនអាចចៀសផុតឡើយ។

ការគំរាមរបស់បេឡារុសកើតឡើងត្រឹមប៉ុន្មានថ្ងៃប៉ុណ្ណោះ បន្ទាប់ពី ប្រធានាធិបតីរុស្ស៊ី វ្ល៉ាឌីមៀរ ពូទីន បានដាក់លក្ខខណ្ឌថ្មីបន្ថែមក្នុងការបាញ់នុយក្លេអ៊ែរ។ 

លោកប្រាប់កិច្ចប្រជុំក្រុមប្រឹក្សាសន្តិសុខជាតិកាលពីថ្ងៃពុធទី២៥ខែកញ្ញាឆ្នាំ២០២៤ថា ទោះប្រទេសគ្មាននុយក្លេអ៊ែរក៏ដោយ ប៉ុន្តែបើពួកគេទទួលការគាំទ្រពីប្រទេសមាននុយក្លេអ៊ែរឲ្យឈ្លានពានរុស្ស៊ី នោះត្រូវចាត់ទុកថាជាការវាយប្រហាររួមគ្នាហើយ ដូច្នេះទីក្រុងមូស្គូ ក៏អាចបាញ់នុយក្លេអ៊ែរសងសឹកទៅវិញបានដែរ។

មិនត្រឹមប៉ុណ្ណឹង បើយោងតាមលោកពូទីន, ទីក្រុងមូស្គូ នឹងក៏ពិចារណាបាញ់នុយក្លេអ៊ែរផងដែរ ប្រសិនបើខ្លួនទទួលបាន ព័ត៌មានដែលអាចទុកចិត្តបានថា រដ្ឋមួយគ្រោងបាញ់មីស៊ីលខ្នាតធំឬការវាយប្រហារអាកាសលើរុស្ស៊ីឬសម្ព័ន្ធមិត្តជិតស្និទ្ធបំផុតរបស់ខ្លួនគឺបេឡារុស។ រុស្ស៊ីនឹងឆ្លើយតប មិនថាសត្រូវប្រើមីស៊ីលផ្លោង យន្តហោះយុទ្ធសាស្ត្រ និងយន្តហោះគ្មានមនុស្សបើកនោះទេ៕

អត្ថបទ៖ សុខ សុវណ្ណ

ចុចអាន៖ លក្ខខណ្ឌបាញ់នុយក្លេអ៊ែរថ្មីរបស់លោក ពូទីន ធ្វើឲ្យគេបារម្ភ