លក្ខខណ្ឌបាញ់នុយក្លេអ៊ែរថ្មីរបស់លោក ពូទីន ធ្វើឲ្យគេបារម្ភ

តាមការចុះផ្សាយរបស់ BBC, ប្រធានាធិបតីរុស្ស៊ី វ្ល៉ាឌីមៀរ ពូទីន បានដាក់លក្ខខណ្ឌថ្មីបន្ថែមក្នុងការបាញ់នុយក្លេអ៊ែរ ដោយលោកប្រាប់កិច្ចប្រជុំក្រុមប្រឹក្សាសន្តិសុខជាតិកាលពីថ្ងៃពុធទី២៥ខែកញ្ញាឆ្នាំ២០២៤ថា ទោះប្រទេសគ្មាននុយក្លេអ៊ែរក៏ដោយ ប៉ុន្តែបើពួកគេមានការគាំទ្រពីប្រទេសមាននុយក្លេអ៊ែរឲ្យឈ្លានពានរុស្ស៊ី នោះត្រូវចាត់ទុកថាជាការវាយប្រហាររួមគ្នាហើយ ដូច្នេះទីក្រុងមូស្គូ ក៏អាចបាញ់នុយក្លេអ៊ែរសងសឹកទៅវិញបានដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនត្រឹមប៉ុណ្ណឹង បើយោងតាមលោកពូទីន, ទីក្រុងមូស្គូ នឹងក៏ពិចារណាបាញ់នុយក្លេអ៊ែរផងដែរ ប្រសិនបើខ្លួនទទួលបាន ព័ត៌មានដែលអាចទុកចិត្តបានថា រដ្ឋមួយគ្រោងបាញ់មីស៊ីលខ្នាតធំឬការវាយប្រហារអាកាសលើរុស្ស៊ីឬសម្ព័ន្ធមិត្តជិតស្និទ្ធបំផុតរបស់ខ្លួនគឺបេឡារុស។ រុស្ស៊ីនឹងឆ្លើយតប មិនថាសត្រូវប្រើមីស៊ីលផ្លោង យន្តហោះយុទ្ធសាស្ត្រ និងយន្តហោះគ្មានមនុស្សបើកនោះទេ។

ទាំងនេះហើយជាលក្ខខណ្ឌថ្មីដែលត្រូវដាក់បញ្ចូលទៅក្នុងគោលការណ៍នុយក្លេអ៊ែររបស់រុស្ស៊ី។ ទោះបីជាយ៉ាងណាក៏ដោយ លោក ពូទីន មិន​បាន​បញ្ជាក់​លម្អិតទេថាតើ ​ពេល​ណាទើបគោលការណ៍ថ្មីទាំងនេះនឹងត្រូវអនុវត្ត។

រឿងនេះធ្វើឲ្យគេដឹងច្បាស់ថាជាការគំរាមទៅកាន់អ៊ុយក្រែនដែលមិនមានអាវុធនុយក្លេអ៊ែរ ប៉ុន្តែទទួលការគាំទ្រពីសំណាក់អាមេរិក ដែលមាននុយក្លេអ៊ែរ ហើយគេកំពុងបារម្ភថា រុស្ស៊ីនឹងឆ្លើយតបនុក្លេអ៊ែរ ប្រសិនបើទ័ពលោក ហ្សេលេនស្គី នៅតែបន្តសម្រុកចូលដីរុស្ស៊ី។

សេចក្តីប្រកាសរបស់លោកពូទីននេះទៀតសោត ​កើត​ឡើងចំ​ពេល​ទីក្រុងកៀវ ស្នើសុំអាមេរិកឲ្យ​យល់ព្រមឲ្យខ្លួនបាញ់​មីស៊ីល​រយៈ​ចម្ងាយ​ឆ្ងាយ​វាយប្រហារ​ទីតាំង​យោធា​ក្នុង​ប្រទេស​រុស្ស៊ី។

ប្រធានាធិបតីអ៊ុយក្រែន បានធ្វើដំណើរទៅកាន់ទីក្រុងវ៉ាស៊ីនតោនក្នុងសប្តាហ៍នេះ ហើយគ្រោងជួបជាមួយប្រធានាធិបតីសហរដ្ឋអាមេរិក ចូ បៃដិន ដើម្បីពិភាក្សាអំពីបញ្ហានេះ។

យ៉ាងណា លោក John Kirby អ្នកនាំពាក្យសន្តិសុខជាតិសេតវិមាន ប្រាប់ទៅអ្នកសារព័ត៌មាននៅខាងក្រៅកិច្ចប្រជុំ UN ក្នុងទីក្រុងញូវយ៉កថា «ច្បាស់ណាស់ បញ្ហានេះនឹងត្រូវលើកឡើង ប៉ុន្តែយ៉ាងណា លោក បៃដិន នឹងមិនដូរគោលនយោបាយឡើយ ហើយនៅតែប្តេជ្ញាចិត្តដដែល រឿងប្រើមីស៊ីលនេះ»៕

អត្ថបទ៖ សុខ សុវណ្ណ

ចុចអាន៖ ហ្សេលេនស្គី ទៅជួប បៃដិន សុំបាញ់មីស៊ីលចូលជ្រៅក្នុងដី រុស្ស៊ី