អ្នកនយោបាយ​ឥណ្ឌា លោក Baba Siddique ត្រូវបានបាញ់សម្លាប់នៅទីក្រុងម៉ុមបៃ

អ្នកនយោបាយជាន់ខ្ពស់នៅរដ្ឋធានី Mumbai របស់ប្រទេសឥណ្ឌាត្រូវបានបាញ់សម្លាប់ ប៉ុន្មានសប្តាហ៍ប៉ុណ្ណោះមុនការបោះឆ្នោត​តាម​បណ្តា​រដ្ឋសំខាន់ៗ ខណៈប៉ូលិសកំពុងស៊ើបអង្កេតលើក្រុមឧក្រិដ្ឋកម្មដ៏ធំមួយដែលជាប់ពាក់ព័ន្ធ។ នេះ​បើ​យោង​តាម​ការ​ចេញផ្សាយរបស់សារព័ត៌មានCNAកាលពីថ្ងៃទី១៣ខែតុលានេះ។

លោក Baba Siddique ស្ថិត​ក្នុង​វ័យ​​​៦៦ឆ្នាំ ដែលជាសមាជិកសភាក្នុងស្រុក និងជាអតីតរដ្ឋមន្ត្រីក្នុងរដ្ឋ Maharashtra ត្រូវបានបាញ់ជាច្រើនដងចំដើម​ទ្រូងនៅខាងក្រៅការិយាល័យកូនប្រុសរបស់គាត់នៅទីក្រុង Mumbai។

យោងតាមកាសែត Hindustan Times បានរាយការណ៍ថា អ្នកវាយប្រហារដែលជាជនមានសង្ស័យពីរនាក់ត្រូវបានចាប់ខ្លួន ហើយប៉ូលិសកំពុងតាមចាប់ខ្លួនមនុស្សម្នាក់ទៀត។ ចំណែកទូរទស្សន៍ NDTV បានរាយការណ៍ថា ជនសង្ស័យ​ទាំងពីរនាក់បានអះអាងថា ពួកគេជាផ្នែកមួយនៃក្រុមក្មេងទំនើងដែលគ្រប់គ្រងដោយលោក Lawrence Bishnoi ដែលកំពុងជាប់ពន្ធនាគារ ពីបទចោទប្រកាន់រត់ការក្រុមឧក្រិដ្ឋកម្ម និងបានប្រព្រឹត្តការសម្លាប់ជាច្រើន។

ការបាញ់ប្រហារនេះកើតឡើងតែប៉ុន្មានសប្តាហ៍ប៉ុណ្ណោះ បន្ទាប់មានគាត់ទទួលបានការគំរាមកំហែងសម្លាប់នៅមុនការបោះឆ្នោតដែលគ្រោងធ្វើឡើងនៅចុងឆ្នាំនេះ។ យ៉ាងណាឧប្បត្តិហេតុនេះប៉ូលិសនឹងស៊ើបអង្កេតយ៉ាងម៉ត់ចត់ ហើយដាក់ទោសលើអ្នកវាយប្រហារ ខណៈមេខ្លោង​នៅ​ពីក្រោយ​ការ​វាយ​ប្រហារ​នេះក៏​នឹង​ត្រូវ​តាម​ដាន​ផងដែរ។​

គួរបញ្ជាក់ថា លោក Siddique មានភាពស្និទ្ធស្នាលនឹងតារាបូលីវូដជាច្រើនផងដែរ ហើយលោកក៏ត្រូវបានគេស្គាល់ថាជាអ្នកចូលចិត្តការជប់លៀងធំៗ៕

អត្ថបទ៖​ ប៊ុន សុភាព