ព័ត៌មានអន្ដរជាតិ

តៃវ៉ាន់ បិទរាល់សកម្មភាពទាំងអស់ ត្រៀមខ្លួនទប់ទល់ព្យុះ កងរី ដែលមិនធ្លាប់មានក្នុងពេល៣០ឆ្នាំ

បានផុស

២ years មុន

នៅ

ថ្ងៃព្រហស្បតិ៍ ៣១ តុលា ២០២៤

ដោយ

Chheang

ទីផ្សារហិរញ្ញវត្ថុ ការហោះហើរក្នុងស្រុក និងរាល់សកម្មភាពទាំងអស់នៅកោះតៃវ៉ាន់ ត្រូវបានផ្អាកនៅថ្ងៃទី៣១ខែតុលានេះ ដើម្បីត្រៀមខ្លួនប្រឈមមុខនឹងព្យុះ កងរី (Kong-rey) ដែលជាខ្យល់ព្យុះដ៏ធំមិនធ្លាប់មានក្នុងរយៈពេល៣០ឆ្នាំកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមភ្នាក់ងារឧតុនិយម ព្យុះ កងរី នឹងទៅដល់កោះតៃវ៉ាន់នៅរវាងម៉ោង២រសៀលថ្ងៃព្រហស្បតិ៍ (ម៉ោងក្នុងស្រុក) ដោយនាំមកនូវខ្យល់បក់បោកខ្លាំង និងភ្លៀងធ្លាក់ខ្លាំងស្ទើរពាសពេញផ្ទៃកោះទាំងមូលតែម្ដង។ មុនទៅដល់តៃវ៉ាន់ ព្យុះទីហ្វុងនេះបានចុះខ្សោយឥទ្ធិពលបន្តិច ប៉ុន្តែនៅស្ថិតក្នុងកម្រិតធ្ងន់ធ្ងរដដែល ស្មើនឹងព្យុះសង្ឃរាកម្រិតទី៤ ដែលមានល្បឿនជាង ២៥០គីឡូម៉ែត្រក្នុង១ម៉ោងឯណោះ។

រដ្ឋបាលអាកាសធាតុរបស់កោះតៃវ៉ាន់ បានចាត់ទុកព្យុះនេះថាជា «ព្យុះទីហ្វុងដ៏ខ្លាំងក្លា» ដែលជាកម្រិតព្យុះដ៏មានឥទ្ធិពលបំផុតសម្រាប់តៃវ៉ាន់ ដោយបន្ថែមថាវានឹងជាព្យុះទីហ្វុងដ៏ធំបំផុតបើគិតពីទំហំ ដែលធ្លាប់បានវាយប្រហារដែនកោះមួយនេះចាប់តាំងពីឆ្នាំ១៩៩៦។

អ្នកព្យាករណ៍អាកាសធាតុតៃវ៉ាន់ លោក Gene Huang បាននិយាយថា បន្ទាប់ពីបានវាយលុកឆ្នេរសមុទ្រភាគខាងកើត ព្យុះ កងរី នឹងឆ្ពោះទៅកាន់ច្រកសមុទ្រតៃវ៉ាន់ ជាមួយឥទ្ធិពលចុះខ្សោយច្រើនជាងមុន។ យ៉ាងណា លោកបានជំរុញឲ្យប្រជាជននៅទូទាំងកោះតៃវ៉ាន់ស្នាក់នៅក្នុងផ្ទះ ដោយសារតែគ្រោះថ្នាក់នៃខ្យល់បក់បោកខ្លាំង។

រដ្ឋាភិបាលតៃវ៉ាន់ បានប្រកាសថា ក្រសួងការពារជាតិបានដាក់ពង្រាយទាហានចំនួន ៣៦ ០០០នាក់នៅរង់ចាំជួយដល់ការសង្គ្រោះ ខណៈដែលមនុស្ស ១ ៣០០នាក់ត្រូវបានជម្លៀសចេញពីតំបន់ដែលមានហានិភ័យខ្ពស់មុនពេលវេលា។ ទន្ទឹមនោះ រដ្ឋាភិបាលបានព្រមានប្រជាជនឲ្យនៅឆ្ងាយពីតំបន់ភ្នំ និងឆ្នេរសមុទ្រ។

ព្យុះ កងរី ត្រូវបានគេព្យាករថានឹងទៅដល់ឆ្នេរសមុទ្រនៃខេត្ត Fujian ប្រទេសចិន នៅព្រឹកថ្ងៃសុក្រ៕

ដោយ៖ ឈាង

ចុចអាន៖ តៃវ៉ាន់ ប្រកាសអាសន្ន មុនព្យុះ កងរី មកដល់