កងទ័ពអាកាសអាមេរិកទទួលយន្តហោះចម្បាំង F-15EX ដំបូងពីក្រុមហ៊ុន Boeing

លោកវរសេនីយ៍ឯក Sean Dorey បាននិយាយនៅក្នុងសេចក្តីប្រកាសព័ត៌មានមួយថា កងទ័ពអាកាសសហរដ្ឋអាមេរិកបានទទួលយន្តហោះចម្បាំង F-15EX ដំបូងរបស់ខ្លួនពីក្រុមហ៊ុន Boeing ហើយនឹងចាប់ផ្តើមសាកល្បងយន្តហោះដែលមានសមត្ថភាពហោះហើរលឿនជាងសម្លេងនៅរដ្ឋផ្លរីដា ។

លោក Dorey បានពន្យល់ថា “ជាមួយនឹងសមត្ថភាពផ្ទុកអាវុធដ៏ធំ ឆ្អឹងខ្នងបំពាក់ប្រព័ន្ធឌីជីថល និងស្ថាបត្យកម្មបើកចំហ យន្តហោះ F-15EX នឹងក្លាយជាធាតុសំខាន់នៃកងកម្លាំងប្រយុទ្ធរបស់យើង និងបំពេញបន្ថែមអត្ថប្រយោជន៍យន្តហោះជំនាន់ទី ៥ ។ លើសពីនេះទៅទៀតវាមានសមត្ថភាពផ្ទុកអាវុធលឿនជាងសម្លេងដោយផ្តល់ឲ្យវានូវតួនាទីដ៏ល្អមួយនៅក្នុងជម្លោះដែលកើតឡើងនាពេលអនាគត” ។

សេចក្តីថ្លែងការណ៍និយាយថា រោងចក្រ St. Louis របស់ក្រុមហ៊ុន Boeing បានប្រគល់យន្តហោះនេះនៅថ្ងៃទី ១០ ខែមីនា ហើយកងទ័ពអាកាសនឹងចាប់ផ្តើមសាកល្បងនៅឯមូលដ្ឋានទ័ពអាកាស Eglin ក្នុងរដ្ឋផ្លរីដា ។

ទន្ទឹមនោះការបញ្ជូនយន្តហោះ F-15EX លើកទី ២ នឹងមកដល់មូលដ្ឋានទ័ពអាកាស Eglin នៅចុងខែមេសា ឆ្នាំ ២០២១ មុនពេលបញ្ជូនចំនួន ៦ គ្រឿងទៀតនៅក្នុងឆ្នាំ ២០២៣ ។

សេចក្តីប្រកាសព័ត៌មានបានបន្ថែមថា កងទ័ពអាកាសគ្រោងនឹងទទួលបានយន្តហោះ F-15EX ចំនួន ១៤៤ គ្រឿងដែលជាផ្នែកមួយនៃកិច្ចខិតខំប្រឹងប្រែងទ្រង់ទ្រាយធំដើម្បីជំនួសកងយន្តហោះចម្បាំងវ័យចំណាស់របស់ខ្លួន ។

នៅក្នុងខែកក្កដា កងទ័ពអាកាសអាមេរិក និងក្រុមហ៊ុន Boeing បានចុះហត្ថលេខាលើកិច្ចសន្យាលើទឹកប្រាក់ចំនួន ១.២ ពាន់លានដុល្លារដើម្បីសាងសង់យន្ដហោះ ៨ គ្រឿងដំបូងដែលមានសមត្ថភាពដឹកអាវុធច្រើនជាងយន្តហោះចម្បាំងផ្សេងទៀតនៅក្នុងជួរកងទ័ពរបស់ខ្លួន និងចាប់ផ្ដើមហោះហើរយន្តហោះផ្ទុកអាវុធលឿនជាងសម្លេងដែលមានទម្ងនរហូតដល់ ៣.៥ តោន ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ តៃវ៉ាន់ ដាក់ពង្រាយប្រព័ន្ធចាប់មីស៊ីល ក្រោយពេលយន្តហោះចម្បាំងចិន៨គ្រឿង ចូលដែនអាកាសរបស់ខ្លួន

ចុចអាន ៖ មកដឹងយន្តហោះចម្បាំងទំនើបៗស្ថិតក្នុងបញ្ជីកំពូលទាំង ១០ លើពិភពលោក