ព័ត៌មានអន្ដរជាតិ

អ៊ុយក្រែន បើកការវាយប្រហារដោយដ្រូនធំបំផុតមិនធ្លាប់មានលើក្រុងមូស្គូ

បានផុស

២ years មុន

នៅ

ថ្ងៃចន្ទ ១១ វិច្ឆិកា ២០២៤

ដោយ

Chheang

រដ្ឋធានីមូស្គូរបស់រុស្ស៊ី បានរងការប្រហារដោយដ្រូនយ៉ាងហោចណាស់ ៣៤គ្រឿងពីអ៊ុយក្រែន កាលពីថ្ងៃអាទិត្យទី១០ខែវិច្ឆិកា ដែលនេះគឺជាប្រតិបត្តិការធ្វើឡើងដោយយន្តហោះគ្មានមនុស្សបើកដ៏ធំបំផុតមិនមានកន្លងមក គិតចាប់តាំងពីពេលផ្ទុះសង្គ្រាមឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមក្រសួងការពារជាតិរុស្ស៊ី ដ្រូនវាយប្រហាររបស់ក្រុងកៀវ បានបណ្ដាលឲ្យមនុស្សយ៉ាងតិច ៥នាក់រងរបួស ហើយជើងហោះហើរប្រមាណ ៣៩ នៅព្រលានយន្តហោះសំខាន់ៗចំនួន ៣ ត្រូវបង្វែរទិសដៅ ខណៈកងកម្លាំងការពារដែនអាកាសរបស់រុស្ស៊ី បានបញ្ជាក់ថា ក្រៅពីក្រុងមូស្គូ ខ្លួនក៏ស្ទាក់បាញ់បានដ្រូន៥០គ្រឿងផ្សេងទៀតនៅតំបន់ភាគខាងលិចប្រទេសផងដែរ។

ភាគីអ៊ុយក្រែន បានអះអាងថា ខ្លួនមានគោលដៅវាយប្រហារលើឃ្លាំងអាវុធរុស្ស៊ីនៅតំបន់ Bryansk ដោយក្នុងការវាយប្រហារនេះមានដ្រូនរបស់ខ្លួនចំនួន ១៤គ្រឿងត្រូវបានបាញ់ទម្លាក់ដោយរុស្ស៊ី។ ទន្ទឹមនោះ ក្រុងកៀវ បានឲ្យដឹងថា ប្រតិបត្តិការដ្រូនរបស់ខ្លួន ធ្វើឡើងបន្ទាប់ពីរុស្ស៊ីប្រើដ្រូនចំនួន ១៤៥គ្រឿងវាយប្រហារលើអ៊ុយក្រែនកាលពីយប់ថ្ងៃសៅរ៍ ហើយក្នុងនោះខ្លួនបានបាញ់ទម្លាក់ដ្រូនបាន ៦២គ្រឿង។

ចាប់តាំងសង្គ្រាមខែកុម្ភៈឆ្នាំ២០២២ ដ្រូនត្រូវបានប្រើប្រាស់ជាឧបករណ៍យោធាដ៏ខ្លាំងក្លារវាងភាគីទាំងសងខាង។ រុស្ស៊ី បានពឹងផ្អែកយ៉ាងខ្លាំងលើដ្រូន Shahed ផលិតដោយអ៊ីរ៉ង់ ដែលបានបង្ហាញខ្លួនជាលើកដំបូងនៅលើសមរភូមិអ៊ុយក្រែនក្នុងខែកញ្ញាឆ្នាំ២០២២។ ប៉ុន្តែអ៊ីរ៉ង់ បានអះអាងថា ខ្លួនបានលក់ដ្រូនឲ្យរុស្ស៊ី នៅមុនពេលចាប់ផ្តើមសង្គ្រាមទៅទៀត។

ចំណែកឯអ៊ុយក្រែន បានពឹងផ្អែកកាន់តែខ្លាំងឡើងលើដ្រូន ដើម្បីវាយប្រហាររុស្ស៊ីលើហេដ្ឋារចនាសម្ព័ន្ធជាច្រើន រាប់ចាប់ពីរោងចក្រគ្រាប់រំសេវ រហូតដល់រោងចក្រចម្រាញ់ប្រេង និងស្ថានីយរ៉ាដា៕

ដោយ៖ ឈាង