ចិនបើកការស៊ើបអង្កេតមន្ត្រីការពារជាតិ​ជាន់​ខ្ពស់​​​​៣រូ​ប​ ក្រោយ​ចាប់​ខ្លួន​​​​ពីបទ​​ពុករលួយ

សេចក្តីរាយការណ៍​មួយចំនួន​ បានឱ្យដឹងថា ប្រទេសចិនបានបើកការស៊ើបអង្កេតលើរដ្ឋមន្ត្រីការពារជាតិលោក Dong Jun ដោយសារតែមានការសង្ស័យពីអំពើពុករលួយ ខណៈលោកគឺជារដ្ឋមន្ត្រីការពារជាតិចិនទី៣​ដែលត្រូវបានចាប់ខ្លួនជុំវិញករណីនេះ។

កាសែតអង់គ្លេស The Financial Times បាននិយាយកាលពីថ្ងៃពុធថា បើតាមមន្ត្រីអាមេរិកបច្ចុប្បន្ន និងអតីតដែលដឹងពីស្ថានភាពនេះ លោក Dong គឺជាមន្ត្រីចុងក្រោយគេដែលត្រូវបានចាប់ខ្លួននៅក្នុងការបង្ក្រាបលើករណី​អំពើពុករលួយយ៉ាង​ទូលំទូលាយ​នៅក្នុងវិស័យ​យោធារបស់ប្រទេសចិន​។

ពេលនេះ របាយការណ៍នេះមិនត្រូវបានបញ្ជាក់ទេ ខណៈមន្ត្រីចិនមិនបានរឆ្លើយតបទៅនឹងសំណើសុំការអត្ថាធិប្បាយ ឬការបញ្ជាក់ពីទីភ្នាក់ងារព័ត៌មាន​នៅ​ព្រឹកថ្ងៃពុធ។

យោធារបស់ប្រទេសចិនបានឆ្លងកាត់ការបោសសម្អាតប្រឆាំងអំពើពុករលួយដ៏ខ្លាំងក្លាមួយចាប់តាំងពីឆ្នាំមុន ដោយយ៉ាងហោចណាស់មានឧត្តមសេនីយកងទ័ពរំដោះប្រជាជនចិន (PLA) ប្រាំបួននាក់ និងនាយកប្រតិបត្តិឧស្សាហកម្មការពារជាតិជាច្រើននាក់ត្រូវបានដកចេញពីស្ថាប័ននីតិប្បញ្ញត្តិជាតិរហូតមកដល់បច្ចុប្បន្ន។

មន្ត្រីអាមេរិកដែលមិនបញ្ចេញបានឲ្យដឹងថាលោក Dong នឹងក្លាយជារដ្ឋមន្ត្រីការពារជាតិចិនទីបីជាប់ៗគ្នាដែលធ្លាក់នៅក្រោមការស៊ើបអង្កេតពីបទពុករលួយ។

សូមបញ្ជាក់ថាលោក Dong ដែលជាអតីតប្រធានកងទ័ពជើងទឹក PLA ត្រូវបានតែងតាំងជារដ្ឋមន្ត្រីការពារជាតិនៅខែធ្នូ ឆ្នាំ ២០២៣។ គាត់មានទំនួលខុសត្រូវលើការទូតយោធារបស់ចិនជាមួយប្រទេសផ្សេងៗ។ លោក​បាន​មើល​ការ​ខុស​ត្រូវ​ថ្មី​ៗ​នេះ​ក្នុង​ទំនាក់​ទំនង​យោធា​រវាង​អាមេរិក​និង​ចិន ដោយ​ប្រទេស​ទាំង​ពីរ​បាន​ជួប​ពិភាក្សា​គ្នា​ជា​ថ្នាក់​មេ​បញ្ជាការ​ជា​លើក​ដំបូង​ក្នុង​ខែ​កញ្ញាផងដែរ។

យោងតាមប្រព័ន្ធផ្សព្វផ្សាយរដ្ឋបានឱ្យដឹងថា អ្នកស្នងតំណែងមុនរបស់លោក Dong គឺលោក Li Shangfu ត្រូវបានដកចេញបន្ទាប់ពីប្រាំពីរខែនៅក្នុងការងារ ហើយបន្ទាប់មកត្រូវបានបណ្តេញចេញពីបក្សកុម្មុយនិស្តសម្រាប់បទល្មើសដែលរួមមានការស៊ីសំណូក ហើយមិនដែលគេឃើញបង្ហាញខ្លួនជាសាធារណៈតាំងពីពេលនោះមក។ ចំណែកអ្នកស្នងតំណែងមុនរបស់លោក Li គឺលោក Wei Fenghe ក៏ត្រូវបានបណ្តេញចេញពីបក្ស ហើយបានបញ្ជូនបន្តទៅព្រះរាជអាជ្ញាពីបទពុករលួយ។

បើតាមសេចក្តីថ្លែងការណ៍របស់បក្សកុម្មុយនិស្តនៅពេលនោះបាននិយាយថា អ្នកទាំងពីរ «ក្បត់ការជឿទុកចិត្តរបស់បក្ស និងគណៈកម្មាធិការយោធាមជ្ឈិម បំពុលបរិយាកាសនយោបាយរបស់យោធាយ៉ាងធ្ងន់ធ្ងរ និងបង្កការខូចខាតយ៉ាងធ្ងន់ធ្ងរដល់មុខមាត់មេដឹកនាំជាន់ខ្ពស់របស់ខ្លួន»។ សេចក្តីថ្លែងការណ៍បាននិយាយថា ពួកគេត្រូវបានគេរកឃើញថាបានទទួលប្រាក់សំណូកយ៉ាងច្រើន ហើយបាន «ស្វែងរកអត្ថប្រយោជន៍បុគ្គលិក» ពីអ្នកដទៃ។

ជាមួយគ្នានេះក្នុងបង្ក្រាបរបស់ចិននេះក៏មានយ៉ាងហោចណាស់មន្ត្រីជាន់ខ្ពស់ពីររូបផ្សេងទៀត ដែលជាប់ពាក់ព័ន្ធជាមួយកងកម្លាំងរ៉ុកកែត ដែលជាអង្គភាពថ្មីនៃយោធាចិន ក៏ត្រូវបានដកចេញផងដែរ ដោយសារអំពើពុករលួយ៕

អត្ថបទ៖ ប៊ុន សុភាព