ព័ត៌មានអន្ដរជាតិ

គណបក្សកាន់អំណាចកូរ៉េខាងត្បូង ថា លោក Yoon នឹងលាលែងតំណែង

បានផុស

១ year មុន

នៅ

ថ្ងៃអាទិត្យ ៨ ធ្នូ ២០២៤

ដោយ

លោក Han Dong-Hoon ដែលជាមេដឹកនាំគណបក្សកាន់អំណាចរបស់ប្រទេសកូរ៉េខាងត្បូង បានប្រកាសថា ត្បិតតែលោកប្រធានាធីបតី Yoon Suk Yeol រួចផុតពីបណ្តឹងដកតំណែងក្រោយការដាក់ច្បាប់អាជ្ញាសឹកមួយរយៈពេលខ្លីក៏ពិតមែន ប៉ុន្តែលោក Yoon នឹងចុះចេញពីអំណាច ហើយនឹងលែងពាក់ព័ន្ធជាមួយកិច្ចការរដ្ឋអ្វីទៀតហើយ។

តាមការចុះផ្សាយរបស់ CNA នៅថ្ងៃអាទិត្យទី៨ខែធ្នូឆ្នាំ២០២៤, មេបក្សអំណាចប្រជាជន (PPP) និយាយថា «ពិតណាស់ សេចក្តីប្រកាសរបស់លោក Yoon ដាក់ច្បាប់អាជ្ញាសឹក គឺជាការរំលោភលើរដ្ឋធម្មនុញ្ញាយ៉ាងច្បាស់ និងធ្ងន់ធ្ងរជាទីបំផុត។ ហើយត្បិតតែគណបក្សធ្វើពហិការបោះឆ្នោតដកតំណែងលោក Yoon ក៏ពិតមែន ប៉ុន្តែទីបំផុត គាត់នឹងលាលែង»។

ស្របពេលជាមួយគ្នានោះ ក្នុងសន្និសីទរួមគ្នាជាមួយនាយករដ្ឋមន្ត្រី Han Duck-soo, លោក Han ក៏ប្រកាសដែរថា លោក Yoon នឹងមិនជាប់ពាក់ព័ន្ធក្នុងកិច្ចការបរទេស និងកិច្ចការរដ្ឋផ្សេងទៀតនោះទេ មុនពេលចុះចេញពីតំណែង។

សូមបញ្ជាក់ជាថ្មី កាលពីរាត្រីថ្ងៃអង្គារទី៣ខែធ្នូ លោក Yoon បានប្រកាសច្បាប់អាជ្ញាសឹក យ៉ាងតក់ក្រហល់បំផុត ធ្វើឲ្យប្រទេសធ្លាក់ចូលក្នុងភាពចលាចល។

មកដល់ថ្ងៃសៅរ៍ សភាកូរ៉េខាងត្បូង មិនអាចបោះឆ្នោតអាចដកតំណែងលោក Yoon បានទេ ហើយក៏បរាជ័យមិនអាចបង្កើតក្រុមប្រឹក្សាស៊ើបអង្កេតលើភរិយាប្រធានាធិបតីបានដែរ។

ការបរាជ័យទាំងពីរករណីនេះ គឺដោយសារសមាជិកសភាគណបក្សកាន់អំណាចរបស់លោក Yoon ដែលមាន១០៨សំឡេង មិនបានបោះឆ្នោតគំាទ្រលើសេចក្តីស្នើច្បាប់របស់គណបក្សប្រជាធិបតេយ្យដែលមានសមាជិក១៩២សំឡេង និងត្រូវការតែ៨សំឡេងទៀតប៉ុណ្ណោះដើម្បីបង្រ្គប់កូរ៉ុម២ភាគ៣ ដើម្បីដកហូតអំណាចប្រធានាធិបតី។

ក្រោយបរាជ័យលើកនេះ រដ្ឋសភាកូរ៉េខាងត្បូងនឹងត្រូវប្រជុំបោះឆ្នោតលើច្បាប់ដកហូតអំណាចលោក Yoon សាជាថ្មីម្តងទៀតនៅថ្ងៃពុធសប្តាហ៍ក្រោយ៕

អត្ថបទ៖ សុខ សុវណ្ណ

ចុចអាន៖ អតីតរដ្ឋមន្ត្រីការពារជាតិកូរ៉េខាងត្បូង ត្រូវចាប់ខ្លួន