អ៊ុយក្រែន បាញ់មីស៊ីលដាក់ទីក្រុងកំពង់ផែរុស្ស៊ី ដុតកម្តៅស្ថានការណ៍

តាមការចុះផ្សាយរបស់ RT នៅថ្ងៃពុធទី១១ខែធ្នូឆ្នាំ២០២៤, អ៊ុយក្រែន បានបាញ់មីស៊ីលលើទីក្រុងកំពង់ផែ Taganrog ភាគខាងត្បូងប្រទេសរុស្ស៊ី ដែលការវាយប្រហារនេះ បានបញ្ឆេះស្ថានការណ៍សង្គ្រាមឲ្យកាន់តែក្តៅ ជាពិសេសបន្ទាប់ពីលោកខាងលិចបើកដៃឲ្យទីក្រុងកៀវ ប្រើមីស៊ីលរបស់ខ្លួន វាយចូលដីរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អភិបាលស្តីទីតំបន់ Rostov លោក Yury Slyusar បានបង្ហោះសារលើ Telegram ថា «តំបន់ឧស្សាហកម្មមួយ ត្រូវកម្ទេច ហើយរថយន្ត១៥គ្រឿង ត្រូវឆេះខ្ទេច»។ លោកបន្តថា ភ្លាមៗមិនទាន់មានសេចក្តីរាយការណ៍អំពីជនរងគ្រោះនៅឡើយទេ។

ទោះបីជាយ៉ាងណាក៏ដោយ លោកមិនបញ្ជាក់ទេថាតើ មីស៊ីលដែលអ៊ុយក្រែនប្រើនោះជាប្រភេទអ្វី ឬក៏ថាតើវាជាមីស៊ីលដែលផ្គត់ផ្គង់ដោយលោកខាងលិច មែនឬក៏អត់។

ជាច្រើនលើកច្រើនសា ប្រមុខដឹកនាំវិមានក្រឹមឡាំង វ្ល៉ាឌីមៀរ ពូទីន តែងគំរាមបណ្តាប្រទេសលោកខាងលិចជុំវិញការបើកភ្លើងខៀវឲ្យលោក ហ្សេលេនស្គី យកមីស៊ីលរបស់ខ្លួនបាញ់ចូលដីរុស្ស៊ី ហើយថែមព្រមានថា ទោះអ៊ុយក្រែន ធ្វើដូច្នេះមែន ក៏មិនអាចជួយអ្វីបានដែរ។ 

សូមបញ្ជាក់ថា Taganrog គឺជាទីក្រុងមានប្រជាជន ២៤២ ០០០នាក់ ស្ថិតនៅលើឆ្នេរសមុទ្រ Azov នៃតំបន់ Rostov។ ដូចជាតំបន់ផ្សេងទៀតដែលស្ថិតនៅជាប់ព្រំដែនអ៊ុយក្រែនដែរ ទីក្រុងនេះតែងតែទទួលរងការវាយប្រហារដោយយន្តហោះគ្មានមនុស្សបើក និងមីស៊ីលជាញឹកញាប់៕

អត្ថបទ៖ សុខ សុវណ្ណ

ចុចអាន៖ លោក Zelensky៖ អ៊ុយក្រែន​ត្រូវការ​ខែល១២​គ្រឿងទៀត ទើប​បិទដែន​អាកាស​បានពេញលេញ