រត់​ជាន់​គ្នា​ស្លាប់​៦​នាក់ នៅ​វិហារ​សាសនា​មួយ​កន្លែង​នៅ​ឥណ្ឌា

យ៉ាងហោចណាស់មនុស្ស ៦​នាក់បានស្លាប់ និងជាច្រើននាក់ទៀតរងរបួស កាលពីល្ងាចថ្ងៃទី​៨​​ខែមករា នៅក្នុងហេតុការណ៍​រត់ជាន់គ្នានៅភាគខាងត្បូងប្រទេសឥណ្ឌា បន្ទាប់ពីអ្នកគោរពសាសនារាប់ពាន់នាក់បានតម្រង់ជួរនៅខាងក្រៅប្រាសាទហិណ្ឌូ ដើម្បីចាំ​យក​ប័ណ្ណ​សម្រាប់ទស្សនាអាទិទេពដោយឥតគិតថ្លៃ។

យោង​តាម​ការ​ចុះ​ផ្សាយ​របស់​ Indian Express អាជ្ញាធរ​បានបង្កើតបញ្ជរនៅសាលារៀន​មួយ​​កន្លែង ដើម្បី​ចែក​ប័ណ្ណចាប់ពីថ្ងៃទី​៩​ខែមករា សម្រាប់អ្នកកាន់សាសនាទៅទស្សនាប្រាសាទ Sri Venkateswara Swamy ក្នុងរដ្ឋ Andhra Pradesh ចាប់​ពី​ថ្ងៃទី១០​ដល់​ថ្ងៃ​ទី​១៩​ខែមករា ជារយៈពេលដែលប្រជាជនក្នុងតំបន់ចាត់ទុកថាជាថ្ងៃល្អ។

ប្រជាជន បានចាប់ផ្តើមតម្រង់ជួរតាំងពីព្រលឹមថ្ងៃទី​៨​មករា ដើម្បីទៅទស្សនាប្រាសាទដែលមានអាយុកាលជិត ២ ០០០ ឆ្នាំ ហើយបានរុញច្រាន និង​ប្រទាញ​ប្រទង់​គ្នា​រហូត​បង្ក​​ឲ្យ​មាន​ហេតុការណ៍​រត់ជាន់គ្នា។

គ្រោះថ្នាក់​សាហាវៗ តែងតែ​កើតមាន​ជា​ញឹកញាប់​នៅ​កន្លែង​គោរពបូជា​ក្នុង​ប្រទេស​ឥណ្ឌា​ នៅ​​អំឡុង​ពិធីបុណ្យ​សាសនា​ធំៗ ដោយសារ​ការគ្រប់គ្រង​​ក្រុម​មនុស្ស​មិនបាន​ល្អ និង​ស្ដង់ដារ​​សុវត្ថិភាព​មិន​គ្រប់គ្រាន់។

នៅខែកក្កដា​ឆ្នាំ២០២៤ មនុស្សចំនួន ១២១​នាក់​បាន​ស្លាប់​នៅរដ្ឋ Uttar Pradesh អំឡុងពេលការជួបជុំសាសនាហិណ្ឌូ។

មនុស្ស ១១២​នាក់ផ្សេងទៀតបានស្លាប់នៅឆ្នាំ​២០១៦ បន្ទាប់ពីការផ្ទុះដ៏ធំមួយដែលបណ្តាលមកពីការបាញ់កាំជ្រួច ដែលត្រូវបានហាមឃាត់ ដើម្បីប្រារព្ធពិធីចូលឆ្នាំថ្មីរបស់ហិណ្ឌូនៅប្រាសាទមួយ​កន្លែង​នៅភាគខាងត្បូងរដ្ឋ Kerala។

ឧប្បត្តិហេតុថ្ងៃទី​៨​ខែមករា កើតឡើងប៉ុន្មានថ្ងៃមុនពេលចាប់ផ្តើមនៃពិធីបុណ្យ Kumbh Mela ដែលជាពិធីបុណ្យសាសនាហិណ្ឌូរយៈពេល​៦​សប្តាហ៍នៃការអធិស្ឋាន និងការងូតទឹកដ៏ពិសិដ្ឋ ដែលគេរំពឹងថាជាការជួបជុំសាសនាដ៏ធំបំផុតក្នុងប្រវត្តិសាស្ត្រ។

យោងតាមអ្នករៀបចំកម្មវិធី អ្នកធ្វើធម្មយាត្រារហូតដល់ ៤០០​លាននាក់ត្រូវបានគេរំពឹងថានឹងចូលរួម៕

ដោយ៖ ឈាង