យោធាកូរ៉េខាងត្បូងសង្ស័យ​ថា កូរ៉េខាងជើង​​ត្រៀម​បញ្ជូន​ទ័ព​បន្ថែម​ទៅ​រុស្ស៊ី

យោធាកូរ៉េខាងត្បូងសង្ស័យថា ប្រទេសកូរ៉េខាងជើងកំពុងរៀបចំបញ្ជូនទាហានបន្ថែមទៀតទៅកាន់ប្រទេសរុស្ស៊ី ដើម្បីប្រយុទ្ធជាមួយកងកម្លាំងអ៊ុយក្រែន បើទោះបីទទួលរងការខាតបង់ និងមានទាហានរបស់ខ្លួនមួយចំនួនត្រូវបានចាប់ខ្លួនក៏ដោយ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី២៤ខែមករានេះ។

អគ្គសេនាធិការចម្រុះ (JCS) កូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយថា៖ «រយៈពេលបួនខែបានកន្លងផុតទៅបន្ទាប់ពីការបញ្ជូនកងទ័ពទៅជួយរុស្ស៊ីប្រយុទ្ធជាមួយអ៊ុយក្រែន កូរ៉េខាងជើងទំនងជានឹងកំពុងពន្លឿនវិធានការតាមដាន និងការរៀបចំបញ្ជូនកងទ័ពបន្ថែមទៀត »។ ប៉ុន្តែការវិភាគរបស់ JCS មិនបានបញ្ជាក់អំពីវិធានការតាមដានផ្សេងទៀតដែលទីក្រុងព្យុងយ៉ាងអាចនឹងចាត់វិធានការនោះទេ។

ជាមួយគ្នានេះ JCS បានឲ្យដឹងដែរថា ប្រទេសកូរ៉េខាងជើងក៏កំពុងរៀបចំបាញ់បង្ហោះផ្កាយរណបចារកម្ម និងមីស៊ីលផ្លោងអន្តរទ្វីប (ICBM) ទោះបីជាមិនមានសញ្ញាណាមួយនៃសកម្មភាពភ្លាមៗក៏ដោយ ។

គួរបញ្ជាក់ថាក្នុងខែនេះ ប្រធានាធិបតីអ៊ុយក្រែនលោក Volodymyr Zelenskiy បាននិយាយថា ទាហានកូរ៉េខាងជើងពីរនាក់ត្រូវបានអ៊ុយក្រែនចាប់បាននៅក្នុងតំបន់ Kursk របស់រុស្ស៊ី ដែលនេះជាលើកទីមួយហើយដែលអ៊ុយក្រែនបានចាប់ទាហានកូរ៉េខាងជើងទាំងរស់ ចាប់តាំងពីទាហានកូរ៉េខាងជើងចូលប្រយុទ្ធក្នុងសង្រ្គាម។

បើយោងតាមការវាយតម្លៃរបស់អ៊ុយក្រែន និងលោកខាងលិចទីក្រុងព្យុងយ៉ាងបានដាក់ពង្រាយទាហានប្រហែល១១០០០ នាក់ ដើម្បីគាំទ្រកងកម្លាំងរបស់ទីក្រុងមូស្គូនៅក្នុងតំបន់ Kursk ភាគខាងលិចនៃប្រទេសរុស្ស៊ី ជាតំបន់ដែលអ៊ុយក្រែនដណ្តើមបាននៅក្នុងការវាយប្រហារដ៏គួរឱ្យភ្ញាក់ផ្អើលមួយកាលពីឆ្នាំមុន។

ទីក្រុងកៀវ ថាទាហានកូរ៉េខាងជើងជាង ៣០០០ នាក់ត្រូវបានសម្លាប់ ឬរងរបួស ប៉ុន្តែបើតាមមន្ត្រីលោកខាងលិច បានប្រាប់សារ​ព័ត៌មាន​ BBC ថា ទាហានកូរ៉េខាងជើងជិត៤០%បានទទួលរងគ្រោះ​រួចទៅហើយនៅ​ក្នុង​ការប្រយុទ្ធគ្នានៅក្នុងតំបន់ Kursk ភាគខាងលិចរុស្ស៊ីក្នុងរយៈពេលត្រឹមតែបីខែប៉ុណ្ណោះ ក្នុងនោះទាហានប្រមាណ១០០០នាក់បានស្លាប់។

ទោះបីជាដំបូងឡើយទីក្រុងមូស្គូ និងក្រុងព្យុងយ៉ាងបានច្រានចោលរបាយការណ៍អំពីការដាក់ពង្រាយទ័ពរបស់កូរ៉េខាងជើង ប៉ុន្តែប្រធានាធិបតីរុស្ស៊ីលោក វ្ល៉ាឌីមៀរ ពូទីន កាលពីខែតុលា មិនបានបដិសេធថាទាហានកូរ៉េខាងជើងស្ថិតនៅក្នុងប្រទេសរុស្ស៊ីទេ៕