ត្រាំ ថា បើកាណាដា ព្រមក្លាយជារដ្ឋទី៥១របស់អាមេរិកមែន មិនបាច់ខ្វល់រឿងពន្ធអ្វីទេ

ជាថ្មីម្តងទៀត ប្រមុខសេតវិមានលោក ដូណាល់ ត្រាំ បានអំពាវនាវឲ្យប្រទេសកាណាដា ចូលរួមជាមួយសហរដ្ឋអាមេរិកមកក្នុងនាមជារដ្ឋទី៥១ ព្រោះថា បើពួកគេព្រមមែន នោះមិនចាំបាច់ខ្វល់រឿងបង់ពន្ធអ្វីទេ។ នេះបើតាមការចុះផ្សាយរបស់ RT កាលពីថ្ងៃអាទិត្យទី២ខែកុម្ភៈឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រាន់តែឡើងកាន់តំណែងភ្លាម ប្រធានាធីបតីអាមេរិក បានដើរបង្កជម្លោះពាណិជ្ជកម្មជាមួយប្រទេសជាច្រើនដូចជាចិន ម៉ិកស៊ិក និងកាណាដានេះជាដើម ហើយក្នុងការបង្ហោះលើបណ្តាញសង្គម Truth Social កាលពីថ្ងៃអាទិត្យទី២ខែកុម្ភៈ លោក ត្រាំ ប្រកាសថា «យើងចំណាយប្រាក់រាប់ពាន់លាន ដើម្បីឧបត្ថម្ភធនដល់កាណាដា។ ហេតុអ្វី? បើគ្មានការគាំទ្រពីអាមេរិកទេ អ្នកជិតខាងភាគខាងជើងមួយនេះ ច្បាស់ជាលំបាកហើយដើម្បីក្លាយជារដ្ឋឋិតថេរមួយ។ ដូច្នេះជាដំណោះស្រាយ យើងសន្យាថា នឹងយកពន្ធទាប និងផ្តល់ការការពារផ្នែកយោធាកាន់តែប្រសើរសម្រាប់ប្រជាជនកាណាដា ហើយមិនមានពន្ធគយទៀតទេ»។

នៅដើមឆ្នាំនេះ លោក ត្រាំ បានបង្ហាញគំនិតចង់ដាក់បញ្ចូលប្រទេសកាណាដា ជារដ្ឋទី៥១របស់អាមេរិក ដោយប្រើការបង្ខិត​បង្ខំ​ផ្នែក​សេដ្ឋកិច្ច​ ដើម្បីសម្រេចបំណងនេះ។ លោកត្អូញត្អែរជាយូរមកហើយអំពីអតិរេកពាណិជ្ជកម្មរបស់កាណាដាជាមួយសហរដ្ឋអាមេរិក ហើយ​បានប្រាប់អ្នកកាសែត​ថា ព្រំដែនគ្រាន់​តែ​ជា «បន្ទាត់ដែលគូរដោយសិប្បនិម្មិត» ប៉ុណ្ណោះ។ 

បើយោងតាមទិន្នន័យរបស់ការិយាល័យជំរឿនសហរដ្ឋអាមេរិក, ឱនភាពពាណិជ្ជកម្មសរុបរបស់​អាមេរិកនៅក្នុងទំនិញ និងសេវាកម្មជាមួយកាណាដា មានចំនួន ៤០.៦​ពាន់លានដុល្លារក្នុងឆ្នាំ​២០២៣។ ឱនភាព​នេះ ត្រូវបានជំរុញដោយការនាំចេញថាមពល ដោយ​អាមេរិកទិញប្រេងឆៅ​ពី​កាណាដាច្រើនជាង ៤​លានបារ៉ែលក្នុងមួយថ្ងៃៗក្នុងអំឡុងពេលប៉ុន្មានខែ​កន្លង​ទៅ។

នេះក៏មិនមែនជារឿងថ្មីដែរ ដែលប្រធានាធិបតីអាមេរិកទី៤៧ បង្ហាញចេតនាពង្រីកទឹកដី ពោលគឺលោកត្រាំ ចង់ទិញយកកោះ Greenland និងគ្រប់គ្រងព្រែកជីក Panama ទៀតផង ដោយលើកឡើងពីភាពចាំបាច់ផ្នែកសន្តិសុខជាតិ។ យ៉ាងណាក្តី សំណើ​ទាំង​នេះ ​ត្រូវ​បាន​គេ​បដិសេធ​ដោយ​រដ្ឋាភិបាល​ប៉ាណាម៉ា និង​ដាណឺម៉ាក យ៉ាងដាច់អហង្ការ៕

អត្ថបទ៖ សុខ សុវណ្ណ

ចុចអាន៖ ក្រុមរដ្ឋមន្ត្រី​អារ៉ាប់​ បដិសេធ​សំណើ​លោក ត្រាំ ក្នុង​ការ​បញ្ជូន​ជនជាតិ​ប៉ាឡេស្ទីន​ចេញ​ពី​ហ្គាហ្សា