ព័ត៌មានអន្ដរជាតិ

ចិន ប្ដឹងទៅអង្គការពាណិជ្ជកម្មពិភពលោក រឿងដែល ត្រាំ ដាក់ពន្ធលើខ្លួន១០%

បានផុស

៣ សប្តាហ៍ មុន

នៅ

ថ្ងៃព្រហស្បតិ៍ ៦ កុម្ភៈ ២០២៥

ដោយ

Chheang

ប្រទេសចិន បានដាក់ពាក្យបណ្ដឹងនៅអង្គការពាណិជ្ជកម្មពិភពលោក (WTO) ជុំវិញវិធានការដាក់ពន្ធ ១០% របស់ប្រធានាធិបតីអាមេរិក លោក ដូណាល់ ត្រាំ លើទំនិញរបស់ចិន។ នេះបើយោងតាមការប្រកាសរបស់ WTO ដែលមានមូលដ្ឋាននៅទីក្រុងហ្សឺណែវ កាលពីថ្ងៃពុធទី៥ខែកុម្ភៈឆ្នាំ២០២៥។

លោក ស៊ី ជីនពីង ប្រធានាធិបតីចិន និងលោក ដូណាល់ ត្រាំ (រូបភាព៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ កាលពីថ្ងៃសៅរ៍បានបញ្ជាឲ្យដំឡើងពន្ធលើទំនិញពីម៉ិកស៊ិក កាណាដា និងចិន ដោយទាមទារឲ្យពួកគេបញ្ឈប់លំហូរនៃសារធាតុញៀន fentanyl និងជនអន្តោប្រវេសន៍ខុសច្បាប់ ប៉ុន្តែក្រោយមកក៏បានផ្អាកដាក់ពន្ធប្រឆាំងម៉ិកស៊ិក និងកាណាដា លើកលែងតែចិន។

WTO បានឲ្យដឹងថា រដ្ឋាភិបាលចិន បាននិយាយថា វិធានការនេះហាក់ដូចជាមិនស៊ីសង្វាក់គ្នានឹងកាតព្វកិច្ចរបស់សហរដ្ឋអាមេរិក ក្រោមកិច្ចព្រមព្រៀងដែលនាំទៅដល់ការបង្កើតស្ថាប័នពាណិជ្ជកម្ម។

សេចក្តីថ្លែងការណ៍របស់ចិន បានរៀបរាប់ថា៖ «ប្រទេសចិនរក្សាសិទ្ធិក្នុងការបង្កើនវិធានការ និងការទាមទារបន្ថែមទាក់ទងនឹងបញ្ហាដែលបានកំណត់នៅទីនេះ ក្នុងអំឡុងពេលនៃការពិគ្រោះយោបល់ និងនៅក្នុងសំណើនាពេលអនាគតណាមួយសម្រាប់ការបង្កើតគណៈកម្មាធិការ»។

យ៉ាងណា ចិនមិនបានបញ្ជាក់លម្អិតថាតើវិធានការទាំងនោះអាចជាអ្វីទេ។

ក្រៅតែពីការដាក់ពាក្យបណ្ដឹងទៅ WTO រដ្ឋាភិបាលក្រុងប៉េកាំងក៏បានប្រកាសវិធានការសងសឹកប្រឆាំងនឹងអាមេរិកផងដែរ ដោយគិតពន្ធចំនួន ១០% ទៅ ១៥% លើការនាំចូលពីក្រុងវ៉ាស៊ីតោន ចំពោះទំនិញមួយចំនួន ដូចជា ប្រេងឆៅ ធ្យូងថ្ម គ្រឿងយន្តកសិកម្ម យានជំនិះធំៗ និងឧស្ម័នធម្មជាតិរាវ។

ចំណាត់ការសងសឹករបស់ទីក្រុងប៉េកាំង នឹងចូលជាធរមាននៅថ្ងៃទី១០ខែកុម្ភៈ៕

ដោយ៖ ឈាង

ចុចអាន៖ ចិន ប្រកាសដាក់ពន្ធ ១០% ទៅ ១៥% លើអាមេរិក ដើម្បីប្រឆាំងនឹងលោក ត្រាំ