បេសកជន​ពិសេស​របស់​លោក ត្រាំ នឹងធ្វើ​ដំណើរ​ទៅ​អ៊ុយក្រែន​ឆាប់ៗ​នេះ

ប្រធានាធិបតីអាមេរិកលោក ដូណាល់ ត្រាំ បានប្រាប់​កាលពីថ្ងៃទី​១០​កុម្ភៈថា លោកនឹងនិយាយជាមួយប្រធានាធិបតីអ៊ុយក្រែនលោក វ៉្លាឌីមៀ ហ្សេលេនស្គី ក្នុងសប្តាហ៍នេះ ហើយបេសកជនពិសេសរបស់លោក នឹងទៅប្រទេសអ៊ុយក្រែនក្នុងពេលឆាប់ៗនេះ។

លោក ត្រាំ មិនបាននិយាយថានៅពេលណាដែលបេសកជន លោក Keith Kellogg នឹងធ្វើទស្សនកិច្ចនៅអ៊ុយក្រែន​ឡើយ ប៉ុន្តែ​សារព័ត៌មាន CNN បានរាយការណ៍ថា ដំណើរនេះនឹងប្រព្រឹត្តទៅនៅសប្តាហ៍ក្រោយ ខណៈដែល​ទីភ្នាក់​ងារ​ព័ត៌មាន AFP បានដកស្រង់ប្រភពពីប្រធានាធិបតីអ៊ុយក្រែន ដែលនិយាយថា ដំណើរទស្សនកិច្ចនឹងធ្វើឡើងនៅថ្ងៃទី២០​ខែកុម្ភៈ។

អ្នកនាំពាក្យ​​របស់​ប្រធានាធិបតី​អ៊ុយក្រែន លោក Sergiy Nikiforov បាន​ប្រាប់​ថា លោក Kellogg ត្រូវបានគេរំពឹងថានឹងជួបជាមួយ​លោក ហ្សេលេនស្គី នៅក្នុងសន្និសិទសន្តិសុខទីក្រុង Munich ដែលបើកនៅថ្ងៃទី​១៤​ខែកុម្ភៈ ហើយប្រធានាធិបតីអ៊ុយក្រែននឹងជួបជាមួយអនុប្រធានាធិបតី​ លោក JD Vance នៅក្រៅសន្និសីទនេះ។

រដ្ឋមន្ត្រីការបរទេស​អាមេរិក លោក Marco Rubio និងរដ្ឋមន្ត្រីការពារជាតិ លោក Pete Hegseth ក៏គ្រោងនឹងមានវត្តមាននៅទីក្រុង Munich ផងដែរ។

លោក Kellogg បាននិយាយនៅក្នុងបទសម្ភាសន៍ជាមួយសារព័ត៌មាន Associated Press ថា៖ «យើងនឹងផ្តល់ការរំពឹងទុករបស់យើងទៅកាន់សម្ព័ន្ធមិត្ត។ នៅពេលដែលយើងត្រឡប់ពីទីក្រុង Munich យើងចង់ផ្តល់ជម្រើសដល់ប្រធានាធិបតី ដូច្នេះនៅពេលដែលគាត់ចូលរួមដោយផ្ទាល់នៅក្នុងដំណើរការសន្តិភាព គាត់ដឹងថាវានឹងទៅជាយ៉ាងណាសម្រាប់គាត់»។

ក្នុង​បទ​សម្ភាសន៍​ដាច់​ដោយឡែក​មួយ លោក Rubio បាន​និយាយ​ថា បញ្ហា​សំខាន់​ក្នុង​សន្និសីទ​នឹង​មាន​សង្គ្រាម​របស់​រុស្ស៊ី​ប្រឆាំង​នឹង​អ៊ុយក្រែន។

លោក Rubio បានបន្ថែម​ថា៖ «វាស្ថិតនៅក្នុងចំណាប់អារម្មណ៍របស់មនុស្សគ្រប់គ្នា ដើម្បីឲ្យសង្រ្គាមនេះបញ្ចប់ ហើយជាក់ស្តែង យើងនឹងពិភាក្សារឿងនេះជាមួយរដ្ឋមន្ត្រីការបរទេស និងមេដឹកនាំផ្សេងទៀតនៅទីនោះ»។

លោក ត្រាំ កំពុងជំរុញឲ្យមានការបញ្ចប់សង្រ្គាមយ៉ាងឆាប់រហ័ស ខណៈ​​លោក ហ្សេលេនស្គី វិញកំពុងអំពាវនាវ​ឲ្យ​មានការធានាសន្តិសុខរឹងមាំ ដែល​ជាផ្នែកនៃកិច្ចព្រមព្រៀងណាមួយជាមួយរុស្ស៊ី។

ទីក្រុងកៀវ បារម្ភថា កិច្ចព្រមព្រៀងណាមួយដែលមិនរាប់បញ្ចូលការប្តេជ្ញាចិត្តផ្នែកយោធា ដូចជា សមាជិកភាពរបស់អង្គការណាតូ ឬការដាក់ពង្រាយកងទ័ពរក្សាសន្តិភាព នឹងអនុញ្ញាត​ឲ្យមានពេលវេលាសម្រាប់វិមានក្រឹមឡាំងដើម្បីប្រមូលផ្តុំ និងរៀបចំឡើងវិញសម្រាប់ការវាយប្រហារថ្មី។

កាលពីចុងសប្តាហ៍ លោក ត្រាំ បានលើក​ឡើង​ថា លោកបានជជែក​ជាមួយ​ប្រធានាធិបតី​រុស្ស៊ី លោក វ៉ា្លឌីមៀរ ពូទីន ប៉ុន្តែលោកបានបដិសេធមិនបញ្ជាក់ថាតើកិច្ចពិភាក្សានេះ​ធ្វើឡើងមុន ឬក្រោយពេលដែលលោក​ឡើង​​កាន់​តំណែង​​កាល​ពី​ថ្ងៃទី​២០​ខែមករា។

លោក​បាន​បន្ថែម​ថា លោក​ជឿ​ជាក់​ថា​មាន​ការ​រីក​ចម្រើន​ឆ្ពោះ​ទៅ​រក​ការ​បញ្ចប់​សង្គ្រាម ប៉ុន្តែ​បាន​បដិសេធ​មិន​បញ្ជាក់​លម្អិត​អំពី​អ្វី​ដែល​លោក និង​លោក​ ពូទីន​ បាន​និយាយ​ទេ។

ដោយ​ឡែក វិមានក្រឹមឡាំង បាន​ប្រកាស​ថា ខ្លួនមិនអាចបញ្ជាក់ ឬបដិសេធថាតើលោក ពូទីន និងលោក ត្រាំ ពិត​​បាន​និយាយ​​គ្នា​មែន​ឬ​ក៏​អត់​​នោះ​ឡើយ។

អនុរដ្ឋមន្ត្រីការបរទេស លោក Sergei Ryabkov បានប្រាប់សន្និសីទសារព័ត៌មាននៅទីក្រុងមូស្គូថា ការទាមទារដែលកំណត់ដោយលោក ពូទីន កាលពីខែមិថុនាឆ្នាំមុន នៅតែរក្សាដដែល។ លក្ខខណ្ឌដែលមានចែងក្នុងសុន្ទរកថាថ្ងៃទី​១៤​មិថុនា របស់លោក ពូទីន គឺអ៊ុយក្រែនទម្លាក់ចោលមហិច្ឆតា​ចូល​​អង្គការណាតូ ហើយដកទ័ពចេញពីទឹកដីទាំងអស់នៃតំបន់ចំនួនបួន​ដែល​ត្រូវ​បាន​គ្រប់គ្រង​ភាគ​ច្រើន​ដោយរុស្ស៊ី។

លោក Ryabkov បាននិយាយថា៖ «ដំណោះស្រាយនយោបាយ ដូចដែលយើងស្រមៃថា វាមិនអាចសម្រេចបានក្រៅពីការអនុវត្តពេញលេញនៃអ្វីដែលបានប្រកាសដោយប្រធានាធិបតី ពូទីន នៅពេលគាត់បាននិយាយទៅកាន់ក្រសួងការបរទេសរុស្ស៊ីកាលពីខែមិថុនា»៕

ដោយ៖ ឈាង