មេដឹកនាំមីយ៉ាន់ម៉ា​​ជួប​​ពិភាក្សាជាមួយ​​ប្រមុខ​រដ្ឋ​រុស្ស៊ី​នៅទីក្រុងមូស្គូ​

ប្រមុខរបបយោធាមីយ៉ាន់ម៉ា ​លោក ​មីន អ៊ុងលាំង​ (Min Aung Hlaing) ​ចេញដំណើរ​​ទៅកាន់​ទីក្រុង​មូស្គូ ដើម្បី​ភាក្សាជាមួយប្រធានាធិបតី​រុស្ស៊ី លោក វ៉្លាឌីមៀរ ពូទីន (Vladimir Putin) ដែលជាសម្ព័ន្ធមិត្តដ៏សំខាន់ និងជាអ្នកផ្គត់ផ្គង់អាវុធដើម្បីកម្ចាត់ក្រុមប្រឆាំងដោយហិង្សាចំពោះការគ្រប់គ្រងរបស់យោធា។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AFP នៅថ្ងៃទី៤ខែមីនានេះ។

​យោង​​ការ​​ចេញ​ផ្សាយ​​របស់​​​​អង្គភាព​ព័ត៌មានរបស់របបយោធា លោក ​មីន អ៊ុងលាំង​ ដែលបាន​ឡើង​កាន់អំណាច​​​តាមរយៈ​​​ការ​ធ្វើ​រដ្ឋប្រហារ​នៅ​​ដើម​ខែ​កុម្ភៈ​ឆ្នាំ២០២១ បានចាកចេញពីរដ្ឋធានី Naypyidaw ជាមួយនឹងមន្ត្រីជាន់ខ្ពស់កាលពីថ្ងៃចន្ទ ហើយគ្រោងនឹងជួបជាមួយលោក​ ពូទីន​ នៅថ្ងៃអង្គារនេះ។

ក្រុមអ្នកវិភាគ បាន​និយាយថា ការគាំទ្ររបស់ទីក្រុងមូស្គូ បានក្លាយជារឿងសំខាន់សម្រាប់រដ្ឋបាលយោធា ជាពិសេសកងកម្លាំងទ័ពអាកាសរបស់ខ្លួន ខណៈដែលរបប​នេះប្រយុទ្ធជាមួយក្រុមប្រដាប់អាវុធជនជាតិភាគតិច និងក្រុមទ័ពព្រៃដែលគាំទ្រលទ្ធិប្រជាធិបតេយ្យ។ របបយោធាបានបាត់បង់ទឹកដី​​ច្រើន​គួរ​កត់សម្គាល់​ បន្ទាប់ពីការវាយលុករបស់ពួកឧទ្ទាមនៅឆ្នាំ២០២៣ ប៉ុន្តែអំណាចដែនអាកាសរបស់ខ្លួនបានដើរតួយ៉ាងសំខាន់ក្នុងការចាប់ខ្លួនកងកម្លាំងប្រឆាំង។

បើយោងតាមប្រព័ន្ធផ្សព្វផ្សាយរដ្ឋរុស្ស៊ីបានឱ្យដឹងថា កិច្ចប្រជុំនៅទីក្រុងមូស្គូនឹងជាលើកដំបូង រវាង លោក ​មីន អ៊ុងលាំង​ និងលោក ពូទីន​ ក្នុងរយៈពេលជាងពីរឆ្នាំ​កន្លង​មក​នេះ​​។ សេចក្តីថ្លែងការណ៍របស់វិមានក្រឹមឡាំង បាននិយាយថា៖​«ភាគីទាំងពីរ​​នឹងពិភាក្សាអំពីទស្សនវិស័យសម្រាប់ការអភិវឌ្ឍបន្ថែមទៀតនៃកិច្ចសហប្រតិបត្តិការរុស្ស៊ី-មីយ៉ាន់ម៉ាដែលមានផលប្រយោជន៍ទៅវិញទៅមក ក៏ដូចជាបញ្ហាអន្តរជាតិ»។

ក្រុមអ្នកវិភាគ បាននិយាយថា ប្រទេសទាំងពីរកំពុងស្វែងរកការពង្រឹងទំនាក់ទំនងកាន់តែរឹងមាំជាមួយប្រទេសជាមិត្ត ដើម្បី​ប៉ះប៉ូវវិធានការដាក់ទណ្ឌកម្មរបស់លោកខាងលិចដែលមីយ៉ាន់ម៉ាធ្វើរដ្ឋប្រហារឆ្នាំ២០២១ និងរុស្ស៊ី​ឈ្លាន​ពាន​លើអ៊ុយក្រែនកាលពីឆ្នាំ០២២។

គួររម្លឹកថា កាលពីខែមករា ប្រទេសមីយ៉ាន់ម៉ា បានផ្តល់អំណោយដំរីចំនួនប្រាំមួយក្បាលដល់ក្រុមសម្លែងសៀកនៅទីក្រុងមូស្គូ ដែល​ជា​ ​«និមិត្តសញ្ញានៃមិត្តភាព»។ ​នេះបើយោងតាមទីភ្នាក់ងារសារព័ត៌មានរដ្ឋរុស្ស៊ី TASS ៕

អត្ថបទ៖ ប៊ុន សុភាព