ចិន ​ច្រាន​ចោល​ការ​ចោទ​ប្រកាន់​របស់ ហ្សេលេនស្គី ដែល​ថា​ខ្លួន​លួច​ជួយ​រុស្ស៊ី

ប្រទេសចិន បានច្រានចោលយ៉ាង​ដាច់​អហង្ការ​ចំពោះការចោទប្រកាន់របស់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ដែល​ថាខ្លួនកំពុងផ្គត់ផ្គង់អាវុធ និង​​រំសេវ​ដល់ប្រទេសរុស្ស៊ី។

ក្រសួងការបរទេសចិន កាលពី​ថ្ងៃទី​១៨​ខែ​មេសា​បានចាត់ទុកការអះអាងទាំងនេះថា «គ្មានមូលដ្ឋាន» និងបានរំលឹកឡើងវិញនូវជំហរអព្យាក្រឹតភាពរបស់ខ្លួននៅក្នុងជម្លោះ។

អ្នកនាំពាក្យក្រសួងការបរទេសចិន លោក Lin Jian បាននិយាយនៅក្នុងសន្និសីទសារព័ត៌មានថា ប្រទេសចិនមិនដែលផ្តល់អាវុធដ៍សាហាវដល់ភាគីណាមួយដែលពាក់ព័ន្ធនឹងវិបត្តិអ៊ុយក្រែននោះទេ។ លោកបានសង្កត់ធ្ងន់លើការប្តេជ្ញាចិត្តរបស់​ចិន ក្នុងការលើកកម្ពស់បទឈប់បាញ់ កិច្ច​ចរចាសន្តិភាព និងដំណោះស្រាយចំពោះជម្លោះ។

លោក Lin បាននិយាយថា៖ «ជំហររបស់ចិនចំពោះបញ្ហាអ៊ុយក្រែន តែងតែមានភាពច្បាស់លាស់។ វាត្រូវបានប្តេជ្ញាចិត្តយ៉ាងសកម្មក្នុងការលើកកម្ពស់បទឈប់បាញ់ និងបញ្ចប់ជម្លោះ ក៏ដូចជាការលើកទឹកចិត្តដល់ការចរចាសន្តិភាព»។

ភាពចម្រូងចម្រាស​កើន​​ឡើង​កាន់តែខ្លាំងឡើង បន្ទាប់ពីអ៊ុយក្រែនដាក់ទណ្ឌកម្មលើក្រុមហ៊ុនចិនចំនួនបី គឺក្រុមហ៊ុនអាកាសចរណ៍​និង​អវកាស​ប៉េកាំង Xianghui Technology Co. Ltd, ក្រុមហ៊ុន Rui Jin Machinery Co. Ltd និងក្រុមហ៊ុន Zhongfu Shenying Carbon Fiber Xining Co. Ltd ដោយចោទប្រកាន់ថា ពួកគេផ្គត់ផ្គង់អាវុធដល់​ប្រទេស​រុស្ស៊ី។ ក្រុមហ៊ុនទាំងនេះត្រូវបានបញ្ចូលទៅក្នុងបញ្ជីថ្មីនៃអង្គភាពដែលត្រូវបានហាមឃាត់មិន​ឲ្យ​ធ្វើអាជីវកម្មនៅអ៊ុយក្រែន ដោយទ្រព្យសម្បត្តិដែលមានមូលដ្ឋាននៅអ៊ុយក្រែនរបស់ពួកគេត្រូវបានបង្កក។

ក្រសួងការបរទេសចិន បានបដិសេធជានិច្ចនូវការជាប់ពាក់ព័ន្ធក្នុងការផ្គត់ផ្គង់អាវុធដល់រុស្ស៊ី ដោយអះអាងថា ខ្លួនគ្រប់គ្រងយ៉ាងតឹងរ៉ឹងលើការនាំចេញទំនិញ​ផ្នែក​យោធា និងប្រឆាំងការប្រើប្រាស់​យាន​គ្មាន​មនុស្ស​បើក​​ស៊ីវិលសម្រាប់គោលបំណងយោធា។ ក្រសួង​ក៏​បាន​រិះគន់​ការ​ចោទ​ប្រកាន់​នេះ​ថា​ជា​ឧបាយកល​នយោបាយ និង​បាន​បញ្ជាក់​ជា​ថ្មី​នូវ​ការ​អំពាវនាវ​របស់​ខ្លួន​ឲ្យ​មាន​ដំណោះស្រាយ​ដោយ​សន្តិវិធី​ចំពោះ​សង្គ្រាម។

ថ្វីបើមានការបដិសេធរបស់ចិនក៏ដោយ ក្តីបារម្ភនៅតែមានក្នុងចំណោមប្រទេសលោកខាងលិច។ កាល​ពីខែកក្កដា​ឆ្នាំ​២០២៤ អង្គការណាតូបានចាត់ទុកប្រទេសចិនថាជា អ្នក​នៅ​ពី​ក្រោយ​​និង​ជួយ​ដល់​សង្គ្រាមរបស់រុស្ស៊ីប្រឆាំងនឹងអ៊ុយក្រែន។ អង្គការ​ណាតូ បាន​ជំរុញ​ឲ្យ​ទីក្រុងប៉េកាំងបញ្ឈប់ការគាំទ្ររបស់ខ្លួនសម្រាប់យោធារុស្ស៊ី៕

ដោយ៖ ឈាង