ព័ត៌មានអន្ដរជាតិ

លោក ត្រាំ ជំរុញឲ្យលោក ណេតាន់យ៉ាហ៊ូ បើកជំនួយចូលហ្គាហ្សាវិញ

បានផុស

១ year មុន

នៅ

ថ្ងៃសៅរ៍ ២៦ មេសា ២០២៥

ដោយ

Chheang

ប្រធានាធិបតីអាមេរិក លោក ដូណាល់ ត្រាំ បានប្រកាសកាលពីថ្ងៃសុក្រទី២៥ខែមេសាថា លោកបានជំរុញនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ឲ្យអនុញ្ញាតការផ្តល់ជំនួយមនុស្សធម៌ រួមទាំងអាហារ និងថ្នាំពេទ្យ ទៅកាន់តំបន់ហ្គាហ្សាស្ទ្រីប ដែលស្ថិតនៅក្រោមការបិទផ្លូវរបស់អ៊ីស្រាអែលទាំងស្រុងចាប់តាំងពីថ្ងៃទី២ខែមីនាមកម៉្លេះ។

លោក ដូណាល់ ត្រាំ និងលោក បេនចាមីន ណេតាន់យ៉ាហ៊ូ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់អ្នកសារព័ត៌មាននៅលើយន្តហោះ Air Force One លោក ត្រាំ បាននិយាយថា៖ «មនុស្សទាំងនោះកំពុងរងទុក្ខ។ យើងត្រូវធ្វើល្អចំពោះតំបន់ហ្គាហ្សា។ វាកំពុងមានតម្រូវការបន្ទាន់សម្រាប់ថ្នាំពេទ្យ និងអាហារ»។ លោក ត្រាំ បានបញ្ជាក់ថា លោកបានលើកឡើងពីបញ្ហានេះក្នុងអំឡុងពេលហៅទូរសព្ទជាមួយលោក ណេតាន់យ៉ាហ៊ូ ដោយបញ្ជាក់ពីតម្រូវការបន្ទាន់សម្រាប់ជំនួយមនុស្សធម៌ក្នុងតំបន់។

ការបិទផ្លូវដែលធ្វើឡើងដោយអ៊ីស្រាអែល បានបញ្ឈប់ការផ្តល់ជំនួយទាំងអស់ទៅកាន់តំបន់ហ្គាហ្សា ដោយទាមទារឲ្យក្រុមសកម្មប្រយុទ្ធហាម៉ាសដោះលែងចំណាប់ខ្មាំង ដែលត្រូវចាប់ខ្លួនបន្ទាប់ពីការវាយប្រហារកាលពីថ្ងៃទី៧ខែតុលាឆ្នាំ២០២៣។

កម្មវិធីស្បៀងអាហារពិភពលោករបស់អង្គការសហប្រជាជាតិ (WFP) បានរាយការណ៍ថា ខ្លួនបានអស់អាហារសម្រាប់ផ្គត់ផ្គង់នៅក្នុងតំបន់ហ្គាហ្សាហើយ ដោយព្រមានពីការកើនឡើងនៃភាពអត់ឃ្លាន កង្វះអាហារូបត្ថម្ភ និងការឆ្លងជំងឺ។

រដ្ឋបាលរបស់លោក ត្រាំ កំពុងប្រឈមមុខនឹងការរិះគន់ចំពោះការដោះស្រាយវិបត្តិហ្គាហ្សា ដោយអ្នកខ្លះលើកឡើងថា បេសកជនរបស់គាត់គឺលោក Steven Witkoff ខ្វះបទពិសោធន៍ការទូតដែលចាំបាច់ដើម្បីដោះស្រាយស្ថានការណ៍ដ៏ស្មុគស្មាញបែបនេះ៕