អ្នកជំនាញអន្តរជាតិ ប្រាប់ឲ្យត្រៀមខ្លួននឹងការផ្ទុះរោគរាតត្បាតថ្មី ក្រោយផ្តាសាយបក្សី ឆ្លងរាលដាលទូទាំង៥០រដ្ឋនៅអាមេរិក

ក្រុមអ្នកជំនាញ បានចេញការព្រមានឲ្យសហរដ្ឋអាមេរិក ត្រៀមខ្លួនទប់ទល់នឹងរោគរាតត្បាតថ្មី ​ស្របពេលជំងឺផ្តាសាយបក្សីកំពុងឆ្លងរាលដាលដល់ថ្នាក់គ្រប់គ្រងលែងបានហើយ នៅតាមកសិដ្ឋាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Daily Mail នៅថ្ងៃអង្គារទី២៩ខែមេសាឆ្នាំ២០២៥ មេរោគ H5N1​ បានផ្ទុះឆ្លងរាលដាលដល់សត្វគោចិញ្ចឹមយកទឹកដោះជិត ១ ០០០ក្បាល ហើយអ្វីដែលធ្វើឲ្យគេកាន់តែព្រួយបារម្ភគឺថា ក៏មានករណីឆ្លងពីសត្វដល់មនុស្សជាង ៧០ករណីផងដែរ រួមទាំងការស្លាប់ករណីដំបូងទៀតផង។

ការស្លាប់ដោយសារជំងឺផ្តាសាយបក្សីលើកដំបូងនៅសហរដ្ឋអាមេរិក គឺក្នុងខែមករា ដោយនោះជាបុគ្គលម្នាក់នៅរដ្ឋ Louisiana ដែលបាត់បង់ជីវិត ក្រោយបញ្ជូនទៅមន្ទីរពេទ្យជាមួយរោគសញ្ញាផ្លូវដង្ហើមធ្ងន់ធ្ងរ។ យោងតាមមន្ត្រីសុខាភិបាល, បុគ្គលនោះស្ថិតក្នុងវ័យជាង៦០ឆ្នាំ ដោយមានបញ្ហាសុខភាពពីមុនមក និងបានប៉ះពាល់ជាមួយបក្សីឈឺនិងងាប់ នៅខាងក្រោយផ្ទះរបស់គាត់ ហើយការពិនិត្យរកឃើញថា មេរោគផ្តាសាយបក្សី បានវិវឌ្ឍកាន់តែធ្ងន់ធ្ងរនៅក្នុងខ្លួនរបស់គាត់។

ដ្បិតថាបច្ចុប្បន្ន មិនទាន់មានសេចក្តីរាយការណ៍អំពីករណីឆ្លងពីមនុស្សទៅមនុស្សក៏ដោយ ប៉ុន្តែក្រុមអ្នកជំនាញខ្លាចថា អាចមានលទ្ធភាពនៃការបង្កាត់ពូជនិងការបំប្លែងខ្លួនរបស់មេរោគ នៅពេលមេរោគពីរចា​ប់ដៃគ្នាឆ្លងទៅភ្នាក់ងារចម្លងតែមួយ នាំឲ្យបង្កើនហានិភ័យនៃការកកើតមេរោគថ្មី បង្កជាជំងឺរាតត្បាត។ 

ពាក់ព័ន្ធបញ្ហានេះ ក្រុមអ្នកជំនាញនៅអង្គការ Global Virus Network (GVN) និយាយថា ឥឡូវវិស័យឧស្សាហកម្មបសុបក្សី របស់សហរដ្ឋអាមេរិកកំពុងមានហានិភ័យខ្លាំងមែនទែន ជាពិសេសនៅតាមតំបន់ដែលមានកសិដ្ឋានច្រើន និងជាកន្លែងដែលកម្មករធ្វើការ មិនសូវមានការការពារហ្មត់ចត់។

ដូច្នេះហើយ ទើប GVN​ ជំរុញឲ្យរដ្ឋាភិបាលមិនមែនត្រឹមសហរដ្ឋអាមេរិកប៉ុណ្ណោះទេ ពោលគឺពិភពលោកតែម្តង ត្រូវប្រឈមមុខនឹង H5N1 តាមរយៈការអនុវត្តផ្នែកជីវសុវត្ថិភាពឲ្យកាន់តែតឹងរ៉ឹងនិងត្រូវឃ្លាំមើលជាប់លាប់ជាងមុន។

ទន្ទឹមនោះវេជ្ជបណ្ឌិត Peter Palese នាយក GVN ថែមទាំងអំពាវនាវឲ្យបណ្តាប្រទេសទាំងឡាយ ត្រូវត្រៀមខ្លួនឲ្យបានល្អចំពោះការឆ្លងរវាងមនុស្សនិងមនុស្សផងដែរ ចៀសវាងការធ្វេសប្រហែសដូចកាលវិបត្តិជំងឺកូវីដ១៩។

នៅឆ្នាំនេះ ក្រៅពីករណីឆ្លងលើសត្វគោជិត ១ ០០០ក្បាលទូទាំងសហរដ្ឋអាមេរិកហើយនោះ ក៏មានករណីឆ្លងពីសត្វមកមនុស្ស៧០ករណីទៀត ត្រូវរាយការណ៍នៅទូទាំង១៤រដ្ឋ។

ជុំវិញក្តីព្រួយបារម្ភនេះដែរ អ្នកវិទ្យាសាស្រ្តជាច្រើន បានដាក់ H5N1 នៅលេខរៀងទី១ ក្នុងបញ្ជីមេរោគដែលកំពុងគំរាមកំហែងបង្កជាជំងឺរាតត្បាតខ្លាំងជាងគេបំផុត ដោយសារតែការឆ្លងដ៏លឿននិងលទ្ធភាពនៃការបំប្លែងរបស់វា៕

អត្ថបទ៖ សុខ សុវណ្ណ

ចុចអាន៖ របាយការណ៍៖ ពិភពលោក នៅតែងាយរងគ្រោះចំពោះការកើតមាន ជំងឺរាតត្បាតកាចសាហាវថ្មី