សេដ្ឋកិច្ច

ក្រុមហ៊ុនរបស់អាមេរិក ស្វែងរកឱកាសវិនិយោគនៅកម្ពុជា

បានផុស

២ ម៉ោង មុន

នៅ

ថ្ងៃពុធ ២២ កក្កដា ២០២៦

ដោយ

គណៈប្រតិភូក្រុមប្រឹក្សាធុរកិច្ចអាមេរិក-អាស៊ាន (US-ASEAN Business Council) ដឹកនាំដោយលោក Brian McFeeters ប្រធាន និងនាយកប្រតិបត្តិ បានមកធ្វើទស្សនកិច្ចនៅកម្ពុជា ដើម្បីពង្រឹងកិច្ចសហប្រតិបត្តិការរវាងវិស័យឯកជនអាមេរិក និងភាគីពាក់ព័ន្ធ ព្រមទាំងស្វែងរកឱកាសវិនិយោគថ្មីៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ជា សិរី ទេសាភិបាល ធនាគារជាតិនៃកម្ពុជា នៅថ្ងៃទី ២១ កក្កដា ២០២៦ បានទទួលជួបពិភាក្សាការងារ ជាមួយគណៈប្រតិភូក្រុមប្រឹក្សាធុរកិច្ចអាមេរិក-អាស៊ាន (US-ASEAN Business Council) ដឹកនាំដោយលោក Brian McFeeters ប្រធាន និងនាយកប្រតិបត្តិ និងមានការចូលរួមពីតំណាងស្ថានទូតសហរដ្ឋអាមេរិកប្រចាំកម្ពុជា។

លោក Brian McFeeters បានលើកឡើងពីគោលបំណងនៃដំណើរទស្សនកិច្ចរបស់គណៈប្រតិភូមកកាន់កម្ពុជា ក្នុងការពង្រឹងកិច្ចសហប្រតិបត្តិការរវាងវិស័យឯកជនអាមេរិក និងភាគីពាក់ព័ន្ធ ព្រមទាំងស្វែងរកឱកាសវិនិយោគថ្មីៗ ដើម្បីចូលរួមគាំទ្រការអភិវឌ្ឍសេដ្ឋកិច្ចកម្ពុជា។

លោកបានបញ្ជាក់ពីការចាប់អារម្មណ៍ និងការត្រៀមខ្លួនរបស់ក្រុមហ៊ុនអាមេរិក ក្នុងការវិនិយោគនៅកម្ពុជា ជាពិសេសក្នុងវិស័យហិរញ្ញវត្ថុឌីជីថល ការអភិវឌ្ឍធនធានមនុស្ស និងការគាំទ្រសហគ្រាសធុនតូច និងមធ្យម។

តំណាងស្ថានទូតសហរដ្ឋអាមេរិកប្រចាំកម្ពុជា បានវាយតម្លៃខ្ពស់ចំពោះតួនាទីរបស់ធនាគារជាតិ ក្នុងការរក្សាស្ថិរភាពប្រព័ន្ធធនាគារ ការធ្វើទំនើបកម្មប្រព័ន្ធទូទាត់ និងការពង្រឹងក្របខណ្ឌបទប្បញ្ញត្តិ ដែលបានចូលរួមលើកកម្ពស់ទំនុកចិត្តរបស់វិនិយោគិន និងបង្កើតបរិយាកាសអំណោយផលសម្រាប់ការវិនិយោគនៅកម្ពុជា។

លោកស្រី ជា សិរី ទេសាភិបាល ធនាគារជាតិបានស្វាគមន៍គណៈប្រតិភូ និងបានចែករំលែកទស្សនាទានអំពីស្ថានភាពសេដ្ឋកិច្ច និងវិស័យធនាគារនៅកម្ពុជា។

លោកស្រីបានបញ្ជាក់ពីសារៈសំខាន់នៃភាពជាដៃគូសេដ្ឋកិច្ចរវាងកម្ពុជា និងសហរដ្ឋអាមេរិក ដែលជាទីផ្សារនាំចេញដ៏សំខាន់របស់កម្ពុជា ខណៈការវិនិយោគពីសហរដ្ឋអាមេរិកបានរួមចំណែកដល់ការបង្កើតការងារ ការលើកកម្ពស់ជំនាញ ការធ្វើពិពិធកម្មសេដ្ឋកិច្ច និងការនាំយកស្តង់ដារអន្តរជាតិមកកម្ពុជា។

លោកស្រីក៏បានវាយតម្លៃខ្ពស់ចំពោះកិច្ចសហប្រតិបត្តិការរវាងធនាគារជាតិនៃកម្ពុជា និងក្រុមហ៊ុនបណ្តាញប័ណ្ណទូទាត់អន្តរជាតិរបស់សហរដ្ឋអាមេរិក ក្នុងការអភិវឌ្ឍកម្មវិធីបាគងទេសចរ ដែលបានរួមចំណែកសម្រួលដល់ការទូទាត់របស់ភ្ញៀវទេសចរអន្តរជាតិ គាំទ្រអាជីវកម្មក្នុងស្រុក និងជំរុញការប្រើប្រាស់ប្រាក់រៀល។

ជំនួបនេះក៏បានផ្លាស់ប្តូរទស្សនាទានលើការពង្រឹងកិច្ចសហប្រតិបត្តិឱ្យកាន់តែប្រសើររវាងធនាគារជាតិនៃកម្ពុជា និងវិស័យឯកជនអាមេរិក ដើម្បីគាំទ្រការអភិវឌ្ឍវិស័យហិរញ្ញវត្ថុ និងជំរុញកំណើនសេដ្ឋកិច្ចកម្ពុជាប្រកបដោយចីរភាព។

គិតចាប់ពីខែមករា ដល់ខែមិថុនា ២០២៦ ទំហំពាណិជ្ជកម្មទ្វេភាគីកម្ពុជា-សហរដ្ឋអាមេរិកសម្រេចបានទឹកប្រាក់ ៧,៤៨ ពាន់លានដុល្លារ ក្នុងនោះកម្ពុជា នាំចេញទៅអាមេរិកមានតម្លៃ ៧ ពាន់លានដុល្លារ កើនឡើង ២៩,៨% ចំណែកអាមេរិក នាំចូលមកវិញមានតម្លៃ ៣០៧ លានដុល្លារ កើន ៨៦,៤%។

នៅក្នុងឆ្នាំ ២០២៥ ទំហំពាណិជ្ជកម្មទ្វេភាគីកម្ពុជា-អាមេរិក សម្រេចបានជាង ១៣,១៤ ពាន់លានដុល្លារ កើនឡើង ២៩,២៤% ក្នុងនោះ កម្ពុជានាំចេញទៅអាមេរិក មានតម្លៃ ១២,៧៣ ពាន់លានដុល្លារ កើនឡើង២៨,៤៨% ចំណែកអាមេរិក នាំចូលមកវិញមានតម្លៃ ៤១៧ លានដុល្លារ កើនឡើង ៥៧,៨៣%៕

អត្ថបទ៖ ឡេង ដេត