អគារបុរាណចំនួន៦១៤ក្នុងចំណោម៩៦១​ នៅ​មីយ៉ាន់ម៉ា​ ខូតខាតដោយសារការរញ្ជួយដី

ក្រសួង ​ធម្មការសាសនានិងវប្បធម៌មីយ៉ាន់ម៉ាបានឲ្យដឹងថា អគារបុរាណចំនួន៦១៤ក្នុងចំណោម៩៦១ នៅក្នុងតំបន់ Inwa ត្រូវបានខូចខាតដោយសារការរញ្ជួយដីដ៏ខ្លាំងក្លាកាលពីខេមុន។ នេះ​បើ​តាម​ការចេញផ្សាយរបស់ Eleven Media Group នៅថ្ងៃទី៣០ខែមេសានេះ។

ក្រោយរងគ្រោះរញ្ជួយដីកាលពីថ្ងៃទី ២៨ខែមីនា អគារជាច្រើននៅក្នុងប្រទេសមីយ៉ាន់ម៉ា រួមទាំងអគារបុរាណបានរងការបំផ្លាញយ៉ាងធ្ងន់ធ្ងរ។ ជាការឆ្លើយតបនាយកដ្ឋានស្រាវជ្រាវបុរាណវិទ្យា និងសារមន្ទីជាតិ បានបង្កើតក្រុមចំនួនប្រាំបី ដើម្បី​ជួសជុលអគារបេតិកភណ្ឌបុរាណ ដែលរងការខូចខាតដោយគ្រោះរញ្ជួយដីនៅ Mandalay, Inwa, Pinya, Palik, Makra, Sagaing ហើយកំពុងធ្វើការស្របតាមគោលការណ៍ណែនាំរបស់អង្គការយូណេស្កូ ដែលការវាយតម្លៃកំពុងត្រូវបានដំណើរការហើយអគារបុរាណកំពុងត្រូវបានផ្តល់អាទិភាព។

ការងារស្ថាបត្យកម្ម និងសិល្បៈកំពុងត្រូវបានវិភាគ និងកត់ត្រា តំបន់ Inwa អគារបុរាណដែលរងការខូចខាតចំនួន ៦១៤ក្នុងចំណោមអគារបុរាណចំនួន ៩៦១ត្រូវបានត្រួតពិនិត្យ ខណៈការថែទាំនឹងត្រូវបានជ្រើសរើសដោយអ្នកជំនាញអន្តរជាតិ។ ក្រៅពីអគារបុរាណនៅ Inwa ក៏មានអគារបុរាណផ្សេងទៀតបានរងផលប៉ះពាល់ផងដែរ និងកំពុងស្ថិតក្រោមការវាយតម្លៃ។

គួរបញ្ជាក់ថា រញ្ជួយដីដ៏សាហាវកាលពីខែមុនបានបំផ្លាញភាគកណ្ដាលប្រទេសមីយ៉ាន់ម៉ាយ៉ាងធ្ងន់ធ្ងរ ខណៈចំនួនអ្នកស្លាប់ និងរបួសនៅក្នុងប្រទេសមីយ៉ាន់ម៉ា ប្រែប្រួលតាមប្រភពផ្សេងៗគ្នា។ យោងតាម Myanma Alinn បានរាយការណ៍ថា គិតត្រឹមថ្ងៃទី ២៥ ខែមេសា ចំនួនអ្នកស្លាប់ដោយសារគ្រោះរញ្ជួយដីបានកើនឡើងដល់ ៣​៧៦៣នាក់ ខណៈមនុស្សចំនួន ៥១០៧ នាក់បានរងរបួស និង១១០ នាក់បាត់ខ្លួន។ បើតាម Mizzima News អ្នកស្លាប់ចំនួន ៥,៣៥២នាក់ របួស ៧១០៨ នាក់ និងមនុស្សបាត់ខ្លួនចំនួន៥៣៨នាក់៕

អត្ថបទ៖ ប៊ុន សុភាព