ព័ត៌មានអន្ដរជាតិ

រញ្ជួយដីនៅប៉េរូ ស្លាប់មនុស្សយ៉ាងហោចណាស់៥ របួស ២១ និងបំផ្លាញផ្ទះ ៤៨ខ្នង

បានផុស

១ minute មុន

នៅ

ថ្ងៃចន្ទ ២០ កក្កដា ២០២៦

ដោយ

អាជ្ញាធរប្រទេសប៉េរូ បានឱ្យដឹងថា គ្រោះរញ្ជួយដីពីរលើកជាប់គ្នាៗ បានវាយប្រហារប្រទេសនេះ បណ្តាលឱ្យមនុស្សស្លាប់យ៉ាងហោចណាស់ ៥នាក់ និងរបួស ២១នាក់ នៅតំបន់ភ្នំមួយភាគខាងកើតនៃរដ្ឋធានី Lima ។

មជ្ឈមណ្ឌលរញ្ជួយដីជាតិរបស់ប្រទេសប៉េរូ បានលើកឡើងថា គ្រោះរញ្ជួយដីកម្រិត ៥.១ និង ៣.៧ រ៉ិចទ័របានវាយប្រហារតំបន់ Junin កាលពីយប់ថ្ងៃសៅរ៍។ រូបថតមួយចំនួនហាក់បង្ហាញពីផ្ទះដួលរលំ និងក្រុមអ្នកជួយសង្គ្រោះកំពុងសម្អាតគំនរបាក់បែក។ នេះបើយោងតាមការចុះផ្សាយរបស់សារព័ត៌មាន Al Jazeera នៅថ្ងៃទី១៩ ខែកក្កដា ឆ្នាំ២០២៦ ។

គ្រោះរញ្ជួយដីនៅប៉េរូ។ រូបភាព៖ The Guardian

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខណៈក្រុមអ្នកជួយសង្គ្រោះកំពុងបន្តស្វែងរកមនុស្សជាប់គាំង ក្រោមគំនរបាក់បែក។

ប្រធានាធិបតីជាប់ឆ្នោត លោកស្រី Keiko Fujimori និយាយលើប្រព័ន្ធផ្សព្វផ្សាយសង្គមកាលពីថ្ងៃអាទិត្យថា៖ « ខ្ញុំសោកស្តាយយ៉ាងខ្លាំង ចំពោះផលវិបាកនៃការរញ្ជួយដីដែលបានកើតឡើងនៅតំបន់ Junin ។ ខ្ញុំសូមចូលរួមរំលែកទុក្ខយ៉ាងក្រៀមក្រំបំផុត ចំពោះក្រុមគ្រួសាររបស់អ្នកដែលស្លាប់ និងអ្នករងផលប៉ះពាល់»។

លោក Luis Vasquez មេដឹកនាំវិទ្យាស្ថានការពារជនស៊ីវិលជាតិប៉េរូ ប្រាប់វិទ្យុប៉េរូថា របាយការណ៍ដំបូងបង្ហាញថា ផ្ទះយ៉ាងហោចណាស់ ៤៨ខ្នង ត្រូវបានបំផ្លាញ និង ១៨ខ្នងរងការខូចខាត បង្កឱ្យមនុស្សប្រមាណ ៣០០នាក់ត្រូវស្នាក់នៅបណ្តោះអាសន្នក្នុងតង់។

គួរបញ្ជាក់ថា ផ្ទះនៅក្នុងទីក្រុង Chupaca ចម្ងាយប្រហែល ៣០០គីឡូម៉ែត្រ ភាគខាងកើតនៃទីក្រុង Lima ត្រូវបានសាងសង់ដោយដីឥដ្ឋ ដែលជាហេតុងាយនឹងដួលរលំ។

អ្នកស្រុក Chongos Bajo ម្នាក់ សុំមិនបញ្ចេញឈ្មោះប្រាប់បណ្តាញទូរទស្សន៍ N ថា៖ « រញ្ជួយដីបានបំផ្លាញផ្ទះរបស់យើង។ នៅទីនេះមានផ្ទះដីឥដ្ឋជាច្រើនដែលដួលរលំ»។

ប្រទេសប៉េរូស្ថិតនៅក្នុងតំបន់ភ្នំភ្លើង ដែលគេស្គាល់ថាជារង្វង់ភ្លើងប៉ាស៊ីហ្វិក មានប្រហែល ៨៥ភាគរយនៃសកម្មភាពរញ្ជួយដីរបស់ពិភពលោក៕

សម្រួល៖ ណឺ មិនា