ព័ត៌មានអន្ដរជាតិ

អ៊ុយក្រែន នឹងទទួលបានគ្រាប់កាំភ្លើងធំ ១,៨លានគ្រាប់ពីសាធារណរដ្ឋឆែក ក្នុងឆ្នាំ២០២៥

បានផុស

១ នាទីute មុន

នៅ

ថ្ងៃចន្ទ ៥ ឧសភា ២០២៥

ដោយ

Chheang

ក្នុងអំឡុងដំណើរទស្សនកិច្ចទៅកាន់ទីក្រុង Prague នាថ្ងៃទី៤ខែឧសភាឆ្នាំ២០២៥ ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានប្រកាសថា ទីក្រុងកៀវត្រៀមនឹងទទួលគ្រាប់កាំភ្លើងធំចំនួន ១,៨លានគ្រាប់នៅឆ្នាំនេះ ក្រោមគំនិតផ្តួចផ្តើមដឹកនាំដោយសាធារណរដ្ឋឆែក។

ប្រធានាធិបតីឆែកលោក Petr Pavel និងសមភាគីអ៊ុយក្រែនលោក វ៉ូឡូឌីមៀរ ហ្សេលេនស្គី (រូបថត៖ Prague Morning)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចខិតខំប្រឹងប្រែងនេះ គឺជាផ្នែកមួយនៃការប្តេជ្ញាចិត្តដ៏ទូលំទូលាយពីសម្ព័ន្ធមិត្តអន្តរជាតិរបស់អ៊ុយក្រែន ដែលរំពឹងទុកថានឹងមានការដឹកជញ្ជូនគ្រាប់កាំភ្លើងឲ្យបាន៣លានគ្រាប់ជួយដល់ទីក្រុងកៀវនៅឆ្នាំ២០២៥។ គំនិតផ្តួចផ្តើមនេះ បង្កើតឡើងដោយឆែកកាលពីឆ្នាំ២០២៤ ហើយមានសារសំខាន់ខ្លាំងក្នុងការដោះស្រាយបញ្ហាកង្វះគ្រាប់រំសេវរបស់អ៊ុយក្រែន។ កាលពីឆ្នាំមុន ឆែកបានជួយសម្រួលដល់ការចែកចាយគ្រាប់កាំភ្លើងប្រហែល ១,៥លានគ្រាប់ ក្នុងនោះមានគ្រាប់ទំហំ ១៥៥មិល្លិម៉ែត្រ Caliber ចំនួន ៥០ម៉ឺនគ្រាប់។ គ្រាប់ទាំងនោះ ត្រូវបានផ្តល់មូលនិធិដោយការរួមចំណែកពីប្រទេសជាច្រើនរបស់អង្គការណាតូ និងសហភាពអឺរ៉ុប។

លោក ហ្សេលេនស្គី បានកោតសរសើរចំពោះប្រសិទ្ធភាពនៃគំនិតផ្តួចផ្តើមនេះ ហើយបានគូសបញ្ជាក់ពីផែនការសម្រាប់ពង្រីកកិច្ចសហប្រតិបត្តិការយោធារវាងអ៊ុយក្រែន និងសាធារណរដ្ឋឆែក។ នេះរួមបញ្ចូលទាំងការពិភាក្សាលើការបង្កើតសាលាបណ្តុះបណ្តាលអ្នកបើកយន្តហោះចម្បាំង F-16 រួមគ្នា ដែលនឹងមានទីតាំងនៅខាងក្រៅប្រទេសអ៊ុយក្រែន ដោយសារតែបញ្ហាសន្តិសុខដែលកំពុងកើតឡើង។

ប្រធានាធិបតីឆែកលោក Petr Pavel បានអះអាងសាជាថ្មីនូវការប្តេជ្ញាចិត្ត ក្នុងការគាំទ្រអ៊ុយក្រែន ដោយសង្កត់ធ្ងន់លើសារៈសំខាន់នៃការបន្តជំនួយ និងកិច្ចសហប្រតិបត្តិការយោធា។ លោកក៏បានថ្កោលទោសចំពោះការស្ទាក់ស្ទើររបស់ប្រធានាធិបតីរុស្ស៊ីលោក វ្ល៉ាឌីមៀរ ពូទីន ក្នុងការបញ្ចប់ជម្លោះផងដែរ ដោយកត់សម្គាល់ថា គ្រាន់តែការសម្រេចចិត្តជាឯកតោភាគីរបស់រុស្ស៊ីនឹងអាចបញ្ឈប់អរិភាពនាពេលបច្ចុប្បន្នបានយ៉ាងស្រួល៕

ដោយ៖ ឈាង