រុស្ស៊ី ត្រៀមខ្លួនចូលជួយដោះស្រាយជម្លោះ ឥណ្ឌា-ប៉ាគីស្ថាន

ប្រទេសរុស្ស៊ី បានប្រកាសពីការត្រៀមខ្លួនចូលជួយដោះស្រាយជម្លោះរវាងឥណ្ឌានិងបាគីស្ថាន ស្របពេលភាពតានតឹងរវាងអ្នកជិតខាងដែលប្រដាប់ដោយអាវុធនុយក្លេអ៊ែរទាំងពីរ កំពុងឡើងកម្តៅខ្ពស់ក្រោយហេតុការណ៍បាញ់សម្លាប់ក្រុមអ្នកទេសចរនៅតំបន់កាស្មៀរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់សារព័ត៌មាន TASS កាលពីថ្ងៃអាទិត្យទី៤ខែឧសភាឆ្នាំ២០២៥ រដ្ឋមន្ត្រីការបរទេសរុស្ស៊ី Sergey Lavrov បានបញ្ជាក់ពីរឿងនេះទៅកាន់សមភាគីប៉ាគីស្ថាន Ishaq Dar អំឡុងកិច្ចសន្ទនាតាមទូរស័ព្ទ។

ក្រសួងការបរទេសរុស្ស៊ី បានចេញសេចក្តីថ្លែងការណ៍ថា «រុស្ស៊ីយកចិត្តទុកដាក់ខ្លាំងណាស់ ចំពោះភាពតានតឹងរវាងទីក្រុងញូវដែលីនិងអ៊ីស្លាម៉ាបាដ ដែលកំពុងកើនឡើងគួរឲ្យកត់សម្គាល់។ ភាគីរុស្ស៊ីសង្កត់ធ្ងន់លើការត្រៀមខ្លួន ក្នុងការរួមចំណែកដល់ដំណោះស្រាយនយោបាយចំពោះស្ថានភាព ដែលកើតឡើងក្រោយការវាយប្រហារភេរវកម្មកាលពីថ្ងៃទី២២ខែមេសានៅទីក្រុង Pahalgama»។

លោក Lavrov លើកឡើងបែបនេះ បន្ទាប់ពីឯកអគ្គរដ្ឋទូតប៉ាគីស្ថានប្រចាំប្រទេសរុស្ស៊ី Muhammad Khalid Jamali ព្រមានខ្លាំងៗថា ចារកម្មប៉ាគីស្ថាន ពិតជាទទួលបានការណ៍សម្ងាត់ថា ឥណ្ឌាកំពុងរៀបគម្រោងវាយប្រហារខ្លួនមែន ដូច្នេះខ្លួនត្រៀមរួចជាស្រេចដើម្បីឆ្លើយតបទៅវិញមួយអស់ដៃ ក្នុងនោះរួមទាំងការប្រើអាវុធនុយក្លេអ៊ែរផងដែរ។

សូមជម្រាបជាថ្មី ស្ថានការណ៍រវាងទីក្រុងញូវដែលីនិងអ៊ីស្លាម៉ាបាដ បានឡើងកម្តៅខ្លាំងបំផុត ចាប់តាំងពីការវាយប្រហារនៅជ្រលង Baisaran កាលពីរសៀលថ្ងៃទី២២ខែមេសាឆ្នាំ២០២៥ ដែលសកម្មប្រយុទ្ធមួយក្រុម បើកការបាញ់ប្រហារសម្លាប់ទេសចរឥណ្ឌា២៥នាក់និងនេប៉ាល់ម្នាក់។

ជុំវិញហេតុការណ៍នោះ ឥណ្ឌាបានចោទថា ប្រទេសប៉ាគីស្ថានបានគាំទ្រអំពើភេរវកម្មឆ្លងដែន ប៉ុន្តែត្រូវទីក្រុងអ៊ីស្លាម៉ាបាដ បដិសេធហើយបដិសេធទៀត។ មិនត្រឹមប៉ុណ្ណឹង ប៉ូលិសក្នុងតំបន់កាស្មៀរ ថែមទាំងនិយាយថា ពួកគេកំណត់មុខសញ្ញាជនសង្ស័យ៣នាក់ ដែលក្នុងនោះមាន២នាក់ជាជនជាតិប៉ាគីស្ថាន ទៀតផង។

រឿងនេះធ្វើឲ្យទំនាក់ទំនងរវាងអ្នកជិតខាងប្រដាប់ដោយអាវុធនុយក្លេអ៊ែរទាំងពីរ ធ្លាក់ចុះដល់កម្រិតទាបបំផុតថ្មីទៀត ហើយក្រោយមក ឈានដល់ការចាត់វិធានការក្តៅរៀងខ្លួន ដូចជាការបិទច្រកព្រំដែន ឥណ្ឌាផ្អាកកិច្ចព្រមព្រៀងចែកទឹកដ៏សំខាន់ជាមួយប៉ាគីស្ថាន និងបណ្តេញមន្ត្រីទូតទៅវិញទៅមកទៀតផង។ លើសពីនេះ រដ្ឋមន្ត្រីប៉ាគីស្ថានមួយរូបថែមទាំងគំរាមបាញ់នុយក្លេអ៊ែរ លើឥណ្ឌា ចំណែកទីក្រុងញូវដែលីឯណោះ ក៏ទិញយន្តហោះចម្បាំង២៦គ្រឿងពីបារាំងថែមទៀតផង៕

អត្ថបទ៖ សុខ សុវណ្ណ

ចុចអាន៖ ប៉ាគីស្ថាន គំរាមសងសឹកមួយអស់ដៃ បើឥណ្ឌា ហ៊ានវាយប្រហារមែន