ប៉ាគីស្ថាន គំរាមសងសឹកមួយអស់ដៃ បើឥណ្ឌា ហ៊ានវាយប្រហារមែន

កម្តៅរវាងទីក្រុងញូវដែលីនិងអ៊ីស្លាម៉ាបាដ កាន់តែក្តៅឡើងៗហើយ ចាប់តាំងពីហេតុការណ៍បាញ់សម្លាប់ទេសចរមួយក្រុមនៅតំបន់កាស្មៀរ ដោយពេលនេះ ប៉ាគីស្ថាន បានគំរាមទៅឥណ្ឌាថា ខ្លួននឹងសងសឹកមួយអស់ដៃតែម្តង បើត្រូវវាយប្រហារមែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមាននេះគឺចេញពីមាត់ឯកអគ្គរដ្ឋទូតប៉ាគីស្ថានប្រចាំប្រទេសរុស្ស៊ី Muhammad Khalid Jamali ដោយលោកបានប្រាប់ទៅសារព័ត៌មាន RT កាលពីចុងសប្តាហ៍ថា ចារកម្មប៉ាគីស្ថាន ពិតជាទទួលបានការណ៍សម្ងាត់ថា ឥណ្ឌាកំពុងរៀបគម្រោងវាយប្រហារខ្លួនមែន ដូច្នេះខ្លួនត្រៀមរួចជាស្រេចដើម្បីឆ្លើយតបទៅវិញមួយអស់ដៃ ក្នុងនោះរួមទាំងការប្រើអាវុធនុយក្លេអ៊ែរផងដែរ។

មិនមែនតែការវាយប្រហារដោយអាវុធទេ លោក Jamali ព្រមានថា សូម្បីតែការផ្អាកសន្តិសញ្ញាទឹក Indus រវាងប្រទេសទាំងពីរនិងការប៉ុនប៉ងដណ្តើមយកផ្នែកនៃទន្លេខាងក្រោម ក៏នឹងក្លាយជាសកម្មភាពនៃសង្រ្គាមប្រឆាំងប៉ាគីស្ថានដែរ ហើយទង្វើបែបនោះនឹងត្រូវបានឆ្លើយតបមួយអស់ដៃដូចគ្នា។

យ៉ាងណាក៏ដោយ លោកបានអំពាវនាវឲ្យអ្នកជិតខាងទាំងពីរនេះ ត្រូវខិតខំធ្វើការដើម្បីបន្ថយភាពតានតឹង និងស៊ើបអង្កេតឲ្យច្បាស់លាស់ ព្រោះភាគីទាំងពីរសុទ្ធតែជាប្រទេសមានអាវុធនុយក្លេអ៊ែរ។

សូមជម្រាបជាថ្មី ស្ថានការណ៍រវាងទីក្រុងញូវដែលីនិងអ៊ីស្លាម៉ាបាដ បានឡើងកម្តៅខ្លាំងបំផុត ចាប់តាំងពីការវាយប្រហារនៅជ្រលង Baisaran កាលពីរសៀលថ្ងៃទី២២ខែមេសាឆ្នាំ២០២៥ ដែលសកម្មប្រយុទ្ធមួយក្រុម បើកការបាញ់ប្រហារសម្លាប់ទេសចរឥណ្ឌា២៥នាក់និងនេប៉ាល់ម្នាក់។

ជុំវិញហេតុការណ៍នោះ ឥណ្ឌាបានចោទថា ប្រទេសប៉ាគីស្ថានបានគាំទ្រអំពើភេរវកម្មឆ្លងដែន ប៉ុន្តែត្រូវទីក្រុងអ៊ីស្លាម៉ាបាដ បដិសេធហើយបដិសេធទៀត។ មិនត្រឹមប៉ុណ្ណឹង ប៉ូលិសក្នុងតំបន់កាស្មៀរ ថែមទាំងនិយាយថា ពួកគេកំណត់មុខសញ្ញាជនសង្ស័យ៣នាក់ ដែលក្នុងនោះមាន២នាក់ជាជនជាតិប៉ាគីស្ថាន ទៀតផង។

រឿងនេះធ្វើឲ្យទំនាក់ទំនងរវាងអ្នកជិតខាងប្រដាប់ដោយអាវុធនុយក្លេអ៊ែរទាំងពីរ ធ្លាក់ចុះដល់កម្រិតទាបបំផុតថ្មីទៀត ហើយក្រោយមក ឈានដល់ការចាត់វិធានការក្តៅរៀងខ្លួន ដូចជាការបិទច្រកព្រំដែន ឥណ្ឌាផ្អាកកិច្ចព្រមព្រៀងចែកទឹកដ៏សំខាន់ជាមួយប៉ាគីស្ថាន និងបណ្តេញមន្ត្រីទូតទៅវិញទៅមកទៀតផង។ លើសពីនេះ រដ្ឋមន្ត្រីប៉ាគីស្ថានមួយរូបថែមទាំងគំរាមបាញ់នុយក្លេអ៊ែរ លើឥណ្ឌា ចំណែកទីក្រុងញូវដែលីឯណោះ ក៏ទិញយន្តហោះចម្បាំង២៦គ្រឿងពីបារាំងថែមទៀតផង៕

អត្ថបទ៖ សុខ សុវណ្ណ

ចុចអាន៖ ប៉ាគីស្ថាន​បាញ់​សាកល្បង​មីស៊ីល​បាលិស្ទិក ​ចំពេល​មាន​ភាពតានតឹង​កាន់​តែ​ខ្លាំង​ជាមួយ​ឥណ្ឌា​