ការស្រាវជ្រាវ៖ មីក្រូប្លាស្ទិកក្នុងដបទឹកអាចបំផ្លាញតម្រង​នោមមនុស្ស

សារព័ត៌មាន​ The Nation បានផ្សាយថា មីក្រូប្លាស្ទិកដែលរកឃើញក្នុងដបទឹកប្លាស្ទិកអាចប៉ះពាល់ដល់សុខភាពរាងកាយមនុស្ស ជាពិសេសតម្រងនោម ដោយ​​​យោងតាមការស្រាវជ្រាវដែលបានចេញផ្សាយនាពេលថ្មីៗនេះ។

យោងតាមការស្រាវជ្រាវដែលបានបោះពុម្ពផ្សាយនៅក្នុង Communications Biology មីក្រូប្លាស្ទិកឬភាគល្អិតប្លាស្ទិកតូចជាងប្រាំមីលីម៉ែត្រ ឥឡូវនេះត្រូវបានរកឃើញជាទូទៅនៅក្នុងបរិស្ថាន រួមទាំងនៅក្នុងទឹកផឹកដបផងដែរ។

ការសិក្សាបង្ហាញថា នៅពេលដែលយើងប្រើប្រាស់ទឹកដែលមានមីក្រូផ្លាស្ទិក ពួកវាអាចដើរតួជាអ្នកបញ្ជូនសារធាតុពុលផ្សេងៗ ដូចជា benzo(a)pyrene (BaP) (សារធាតុបង្កជាជំងឺមហារីក) ជាដើម។ សារធាតុទាំងនេះអាចត្រូវបានស្រូបតាមប្រព័ន្ធរំលាយអាហារ និងជ្រៀតចូលសរីរាង្គខាងក្នុង។ ការប៉ះពាល់នឹង BaP អាចបង្កឱ្យមានការរលាកជាប្រព័ន្ធ និងធ្វើឱ្យខូចសរីរាង្គផ្សេងៗ ដោយតម្រងនោមងាយរងគ្រោះជាងគេ។

ការស្រាវជ្រាវក៏បានគូសបញ្ជាក់ផងដែរថា សារធាតុ មីក្រូប្លាស្ទិក polystyrene (PS) អាចបំផ្លាញរបាំងពោះវៀន នាំឱ្យមានការលេចធ្លាយសារធាតុរំលាយអាហារក្នុងពោះវៀនកើនឡើង រួមទាំងអាស៊ីត arachidonic និងអាស៊ីត linoleic ចូលទៅក្នុងចរន្តឈាម។ សារធាតុមេតាបូលីត (សារធាតុរំលាយអាហារ) ទាំងនេះអាចធ្វើដំណើរទៅកាន់ក្រលៀន ដែលបណ្តាលឱ្យមាន ferroptosis ដែលជាប្រភេទនៃការស្លាប់កោសិកាដែលបណ្តាលមកពីការប្រមូលផ្តុំជាតិដែក។

សព្វថ្ងៃនេះ មីក្រូប្លាស្ទិកមានគ្រប់ទីកន្លែងនៅក្នុងបរិស្ថានដូចជានៅក្នុងមហាសមុទ្រ ទន្លេ ដី និងសូម្បីតែខ្យល់ដែលយើងដកដង្ហើម។ ទំហំតូចរបស់ពួកគេធ្វើឱ្យពួកវាពិបាកលុបបំបាត់យ៉ាងខ្លាំង និងអនុញ្ញាតឱ្យពួកវាបន្តរស់នៅក្នុងប្រព័ន្ធអេកូឡូស៊ីក្នុងរយៈពេលយូរ។

នៅពេលដែលមីក្រូប្លាស្ទិកកជ្រាបចូលទៅក្នុងប្រភពអាហារ និងទឹក ពួកវាអាចចូលទៅក្នុងខ្លួនមនុស្សបានយ៉ាងងាយស្រួល ដោយបង្កើនការព្រួយបារម្ភអំពីសុខភាព។ ជាពិសេស ដបទឹកក្លាយជាប្រភពដ៏សំខាន់នៃការប៉ះពាល់មីក្រូប្លាស្ទិក ដែលនេះបញ្ជាក់ពីតម្រូវការបន្ទាន់ក្នុងការលើកកម្ពស់ការយល់ដឹងជាសាធារណៈអំពីគ្រោះថ្នាក់ដែលអាចកើតមាន៕

អត្ថបទ៖ ប៊ុន សុភាព