ព័ត៌មានអន្ដរជាតិ

អ៊ុយក្រែន ត្រូវប្រឹងសម្រុកផលិតដ្រូនខ្លួនឯង ដោយសារបរទេសផ្តាច់ជំនួយ

បានផុស

១ ខែ មុន

នៅ

ថ្ងៃចន្ទ ១២ ឧសភា ២០២៥

ដោយ

ដោយសារតែបរទេសលែងសូវជួយខ្លាំងដូចមុន ពេលនេះប្រទេសអ៊ុយក្រែន មានតែប្រឹងខ្លួនឯងដោយសម្រុកផលិតដ្រូនឲ្យបានច្រើន ដើម្បីទប់ទល់ជាមួយនឹងរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ CNA នៅថ្ងៃចន្ទទី១២ខែឧសភាឆ្នាំ២០២៥, មន្ត្រីអ៊ុយក្រែនមួយរូបដែលសុំមិនបញ្ចេញឈ្មោះ បាននិយាយថា ដល់ពេលហើយដែលទីក្រុងកៀវ ត្រូវពឹងផ្អែកលើខ្លួនឯងក្នុងវិស័យឧស្សាហកម្មយោធា ជាពិសេសត្រូវតែផលិតដ្រូនឲ្យបានរាប់លានគ្រឿងបន្ថែមទៀត លើសឆ្នាំមុនៗ។

របាយការណ៍បង្ហាញថា ឆ្នាំ២០២៤ អ៊ុយក្រែន ផលិតដ្រូនបានជាង២លានគ្រឿង ប៉ុន្តែឥឡូវ ខ្លួនបានដាក់គោលដៅ ធ្វើយ៉ាងណាផលិតដ្រូនឲ្យបាន៥លានគ្រឿងក្នុងមួយឆ្នាំ។

ការដាក់គោលដៅនេះ កើតឡើងស្របពេលអន្តរជាតិបានកាត់ផ្តាច់ជំនួយទីក្រុងកៀវ ជាពិសេសខ្នងបង្អែកធំបំផុតគឺសហរដ្ឋអាមេរិក ហាក់សូវលែងខ្វាយខ្វល់ជាមួយអ៊ុយក្រែនទៀត ចាប់តាំងពីលោក ដូណាល់ ត្រាំ ចូលអង្គុយកៅអីសេតវិមានក្នុងអាណត្តិទី២នេះ។

ក្នុងចំណោមសព្វាវុធជាច្រើន, ដ្រូននេះហើយគឺជាអាវុធដ៏សំខាន់មួយ ក្នុងសមរភូមិជាមួយរុស្ស៊ី។ ជាក់ស្តែងឥទ្ធិពលប្រយុទ្ធរបស់វា រួមចំណែក៧០% ក្នុងចំណោមមនុស្សស្លាប់ទាំងសងខាង ហើយគ្រាន់តែមួយខែមីនា អ៊ុយក្រែន បានបើកការវាយប្រហារដោយដ្រូនរហូតដល់ទៅជាង ៧៧ ០០០លើកឯណោះ។

រម្លឹកទៅខែមីនាបន្តិច កាលនោះ អ៊ុយក្រែនបានធ្វើតេស្តជោគជ័យលើដ្រូនថ្មីអាចបញ្ជាហោះបាន៣០០០គីឡូម៉ែត្រចូលដីរុស្ស៊ី។ ដ្រូនប្រភេទថ្មីផលិតក្នុងស្រុកនេះ បានកំណត់គោលដៅវាយប្រហារលើរោងចក្រចម្រាញ់ប្រេង និង មូលដ្ឋានកងទ័ពរុស្ស៊ីនៅតំបន់ឆ្ងាយ លើសពីការវាយប្រហារនៅតំបន់ព្រំដែននិងទីក្រុងមូស្គូ ដែលយោធាអ៊ុយក្រែនធ្លាប់ធ្វើ។

ពេលនោះ រដ្ឋាភិបាលអ៊ុយក្រែនអះអាងថា មន្ត្រីរបស់ខ្លួនបានអភិវឌ្ឍ ផលិតនិងសាកល្បងដោយជោគជ័យលើដ្រូនរយៈចម្ងាយឆ្ងាយ ដែលអាចចូលជ្រៅដល់ទឹកដីរុស្ស៊ីពីព្រំដែនរបស់អ៊ុយក្រែន និងឆ្ងាយរហូតដល់ ទីក្រុង Novosibirsk នៅចុងភាគខាងជើងឯណោះ៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន បញ្ជូនដ្រូនជាង១០០គ្រឿង ចូលដីរុស្ស៊ី វាយប្រហាររោងចក្រផលិតគ្រឿងបង្គុំមីស៊ីល