ខេត្ត​នៅភាគកណ្តាលថៃ​រងការ​វាយប្រហារដោយជំនន់ទឹកភ្លៀងភ្លាមៗ

យោងតាមការចេញផ្សាយសារព័ត៌មាន​ The Nation នៅថ្ងៃទី១៣ខែឧសភានេះ ភ្លៀងធ្លាក់ខ្លាំងបានបង្កឲ្យមានទឹកជំនន់ភ្លាមៗនៅក្នុងភូមិជាច្រើនក្នុងខេត្ត Nakhon Ratchasima ប្រទេសថៃ។

កាលពីយប់ថ្ងៃចន្ទ ខេត្ត Nakhon Ratchasima ប្រទេសថៃ បានរងជំនន់ទឹកភ្លៀងយ៉ាងខ្លាំង បណ្ដាលឲ្យភូមិជាច្រើនរួមមាន Ban Nong Waeng Moo 12, Ban Hua Khao Thong Moo 15 និង Ban Nong Samong Moo 6 រងផលប៉ះពាល់ដោយទឹកជំនន់ភ្លាមៗ។

ជាពិសេសនៅ Ban Nong Samong Moo 15 បានរងគ្រោះដោយជំនន់ទឹកភ្លៀងយ៉ាងខ្លាំងជាងគេ ដោយមានប្ដីប្រពន្ធមួយគូ ជិះម៉ូតូព្យាយាមឆ្លងផ្លូវក្នុងភូមិ ត្រូវទឹកហូរនាំធ្លាក់ចូលប្រឡាយ និងត្រូវបានក្រុមជួយសង្គ្ព្រោះពួកគេបានទៅកាន់ទីសុវត្ថិភាព។

មក​ដល់​ព្រឹក​ថ្ងៃ​អង្គារ​នេះ ស្ថានភាពទឹកស្រកបន្តិច ហើយបច្ចុប្បន្ន​មន្ត្រី​ជំនាញ​កំពុង​វាយ​តម្លៃ​ការ​ខូច​ខាត។ របាយការណ៍​បឋម​បង្ហាញ​ថា គ្មាន​ផ្ទះ​ណា​មួយ​ទទួល​រង​ផល​ប៉ះ​ពាល់​ដោយ​ទឹក​ជំនន់​ភ្លាមៗ​នោះ​ទេ។ ទោះជាយ៉ាងណាក៏ដោយ កម្ទេចកំទីដូចជាមែកឈើ និងភក់នៅពាសពេញផ្លូវ។ ទោះបីទឹកស្រកចុះបន្តិចយ៉ាងណាក្តី ក៏គេរំពឹងថានឹងមានភ្លៀងធ្លាក់បន្ថែមទៀតនៅថ្ងៃក្រោយ៕

អត្ថបទ៖ ប៊ុន សុភាព