អ៊ីស្រាអែលបញ្ជាឱ្យជម្លៀសប្រជាជនជាង ៣០ ម៉ឺននាក់ចេញពីកណ្តាលទីក្រុងតេហេរ៉ង់

យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៧ខែមិថុនានេះ ជម្លោះអ៊ីស្រាអ៊ែល និងអ៊ីរ៉ង់ បានកើនឡើងយ៉ាងខ្លាំង ដោយអ៊ីស្រាអែលបានបញ្ជាឱ្យជម្លៀសមនុស្សជាង ៣០ ម៉ឺននាក់ចេញពីកណ្តាលទីក្រុងតេហេរ៉ង់ ខណៈការវាយប្រហារតាមអាកាសរវាងប្រទេសទាំងពីរកាន់តែខ្លាំងឡើង។

ការវាយប្រហារបានកំណត់គោលដៅលើហេដ្ឋារចនាសម្ព័ន្ធយោធាអ៊ីរ៉ង់ កន្លែង​ដែល​មានការសង្ស័យ​ផលិត​នុយក្លេអ៊ែរ និង​មជ្ឈមណ្ឌលបញ្ជាការ ដោយនាយករដ្ឋមន្ត្រីអ៊ីស្រាអែលលោក ណេតាន់យ៉ាហ៊ូ បានអះអាងថា ការវាយប្រហារនេះបានរារាំងកម្មវិធីនុយក្លេអ៊ែររបស់អ៊ីរ៉ង់យ៉ាងសំខាន់។ ជាការឆ្លើយតបអ៊ីរ៉ង់​បានបាញ់មីស៊ីល​ជាង ៣៧០ គ្រាប់ និង​យន្តហោះ​គ្មាន​មនុស្ស​បើក​រាប់រយ​គ្រឿង ដោយ​បាន​សម្លាប់​មនុស្ស ២៤ នាក់ និង​របួស​ជាង ៥០០ នាក់​នៅ​អ៊ីស្រាអែល។ ការផ្ទុះបានអង្រួនទីក្រុងសំខាន់ៗរបស់អ៊ីស្រាអែល រួមមានទីក្រុង Tel Aviv, Haifa និង Petah Tikva។

ជាមួយគ្នានេះប្រធានាធិបតីអាមេរិក លោក ដូណាល់ ត្រាំ បានព្រមានជនស៊ីវិលឱ្យជម្លៀសខ្លួនចេញពីទីក្រុងតេហេរ៉ង់ ដោយប្រកាសថា អ៊ីរ៉ង់មិនត្រូវទិញអាវុធនុយក្លេអ៊ែរឡើយ។ ទន្ទឹមនឹងនោះ រដ្ឋមន្ត្រីការបរទេសអ៊ីរ៉ង់បានអំពាវនាវឱ្យមានអន្តរាគមន៍ពីសហរដ្ឋអាមេរិក ដោយបង្ហាញឱ្យឃើញពីការបើកចំហចំពោះការទូតជាថ្មី ប្រសិនបើអ៊ីស្រាអែលបញ្ឈប់ការវាយប្រហារ។

ជម្លោះនេះបានបណ្តាលឱ្យមានការបិទដែនអាកាសយ៉ាងទូលំទូលាយនៅទូទាំងតំបន់មជ្ឃឹមបូព៌ា ដោយធ្វើឱ្យមនុស្សរាប់ពាន់នាក់ជាប់គាំង និងបិទផ្លូវហោះហើរសំខាន់ៗ។ ថ្វីបើមានអ្នកស្លាប់ និងរបួសកើនឡើង និងការរំខានក្នុងតំបន់ក៏ដោយ ក៏មិនមានសញ្ញាភ្លាមៗនៃការបន្ថយការកើនឡើងនៃការវាយប្រហារគ្នានោះទេ៕

អត្ថបទ៖ ប៊ុន សុភាព