ពូទីន ប្រាប់ ម៉ាក្រុង ថា រឿងសង្គ្រាមនៅអ៊ុយក្រែន បើចង់បន្ទោស ទៅបន្ទោសលោកខាងលិចទៅ!

អំឡុងកិច្ចសន្ទនាលើកដំបូងក្នុងរយៈពេល៣ឆ្នាំរវាងលោកវ្ល៉ាឌីមៀរ ពូទីន និងអេម៉ានុយអែល ម៉ាក្រុង, ប្រធានាធិបតីរុស្ស៊ី បានប្រាប់ទៅសមភាគីបារាំងថា រឿងសង្គ្រាមនៅអ៊ុយក្រែន បើចង់បន្ទោស សូមទៅបន្ទោសប្រទេសលោកខាងលិចទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់សារព័ត៌មាន TRT World, លោក ពូទីន បានប្រាប់ទៅលោកម៉ាក្រុង បែបនេះក្នុងការនិយាយទូរស័ព្ទជាមួយគ្នារយៈពេលប្រហែល២ម៉ោង ហើយក្រៅពីបញ្ហាសង្គ្រាមរុស្ស៊ី-អ៊ុយក្រែន មេដឹកនាំទាំងពីរក៏ពិភាក្សាគ្នាផងដែរ អំពីស្ថានការណ៍និងជម្លោះនៅតំបន់មជ្ឈិមបូព៌ា។

អំឡុងកិច្ចសន្ទនា លោកម៉ាក្រុង បានបង្ហាញជំហររបស់បារាំងក្នុងការគាំទ្រដោយឥតងាករេចំពោះអធិបតេយ្យភាពនិងបូរណភាពទឹកដីរបស់អ៊ុយក្រែន។ ទន្ទឹមនោះលោកក៏ជំរុញឲ្យប្រមុខវិមានក្រឹមឡាំង បង្កើតបទឈប់បាញ់ភ្លាមៗនិងផ្តួចផ្តើមការចរចារវាងអ៊ុយក្រែននិងរុស្ស៊ីសម្រាប់ដំណោះស្រាយដ៏រឹងមាំនិងយូរអង្វែងនៃជម្លោះនេះផងដែរ។

យ៉ាងណាលោក ពូទីន បានរំលឹកដល់លោក ម៉ាក្រុង ថាជម្លោះនៅអ៊ុយក្រែន គឺកើតចេញពីឥទ្ធិពលនៃគោលនយោបាយរបស់បស្ចិមប្រទេស ដែលបង្កឲ្យមានផលវិបាក។ អស់រយៈពេលជាច្រើនឆ្នាំមកហើយ បណ្តារដ្ឋលោកខាងលិចមិនដែលអើពើផលប្រយោជន៍សន្តិសុខរបស់រុស្ស៊ីឡើយ ហើយតែងដឹកនាំនិងធ្វើសកម្មភាពប្រឆាំងរុស្ស៊ីនៅអ៊ុយក្រែន។ ដូច្នេះរឿងដែលត្រូវបន្ទោស គឺគួរតែបន្ទោសលោកខាងលិច។

លើសពីនេះ លោកពូទីន ប្រាប់ទៅប្រធានាធិបតីបារាំងថា កិច្ចព្រមព្រៀងសន្តិភាពណាមួយ គួរតែជាកិច្ចព្រមព្រៀងទូលំទូលាយនិងយូរអង្វែង ឈប់គិតពីដើមចមនៃវិបត្តិអ៊ុយក្រែន និងត្រូវផ្អែកលើការពិតនៃដែនដីថ្មី។

សូមជម្រាបថា បារាំង​ក៏ជាប្រទេសចេញមុខចេញមាត់ខ្លាំងមួយដែរ ក្នុងការ​គាំទ្រទី​ក្រុងកៀវប្រឆាំងទីក្រុងមូស្គូ។ ជាក់ស្តែងរដ្ឋាភិបាលទីក្រុងប៉ារីស បានផ្តល់ជំនួយយោធាក្នុងទំហំទឹកប្រាក់ជាង៤.១ពាន់លានដុល្លារអាមេរិកដល់អ៊ុយក្រែន ចាប់តាំងពីរុស្ស៊ីបើកប្រតិបត្តិការសឹកនៅខែកុម្ភៈឆ្នាំ២០២២។

ម្យ៉ាង បារាំងក៏ជាអ្នកផ្តួចផ្តើមគំនិតបង្កើតក្រុមចម្រុះអឺរ៉ុប ដើម្បីបញ្ជូនកម្លាំងទ័ពទៅប្រទេសអ៊ុយក្រែន ក្នុងនាមជាកងរក្សាសន្តិភាពផងដែរ៕

អត្ថបទ៖ សុខ សុវណ្ណ

ចុចអាន៖ ចាយពេលជាង៣ឆ្នាំ ទីបំផុត រុស្ស៊ី គ្រប់គ្រងបានតំបន់ Luhansk ទាំងស្រុងហើយ