តួកគី​បញ្ជូន​ជំនួយ​ទៅ​ស៊ីរី ខណៈ​ភ្លើង​ឆេះ​ព្រៃ​បំផ្លាញ​​​ព្រំដែនប្រទេសទាំងពីរ

យោងតាមការចេញផ្សាយទីភ្នាក់ងារប័ត៌មាន​AP កាលពីថ្ងៃទី០៦ខែកក្កដា ប្រទេសតួកគីបានបញ្ជូនឧត្ថម្ភាចក្រពន្លត់អគ្គិភ័យចំនួនពីរគ្រឿង និងរថយន្តជំនួយជាច្រើនគ្រឿងទៅកាន់ប្រទេសស៊ីរី ដើម្បីជួយពន្លត់ភ្លើងឆេះព្រៃដ៏ខ្លាំងក្លានៅក្នុងតំបន់ Latakia ភាគពាយ័ព្យប្រទេសស៊ីរីនិងជាព្រំដែនរវាងប្រទេសទាំងពីរ។

ប្រទេសតួកគី និងស៊ីរីកំពុងប្រយុទ្ធនឹងភ្លើងឆេះព្រៃយ៉ាងធ្ងន់ធ្ងរ ដែលបណ្តាលមកពីកម្ដៅខ្លាំង ខ្យល់បក់ខ្លាំង និងសំណើមទាប។ ចាប់តាំងពីថ្ងៃទី ២៦ ខែមិថុនាមក ភ្លើងឆេះ​ព្រៃ​​រាប់សិបកន្លែង​បានឆាបឆេះនៅភាគខាងលិច និងភាគខាងត្បូងប្រទេសតួក​គី ដោយមានអ្នកស្លាប់ចំនួន ៣នាក់ត្រូវបានរាយការណ៍នៅក្នុងខេត្ត Izmir ។ អគ្គិភ័យ​ភាគច្រើន​បណ្តាលមកពី​ទុស្សេ​ខ្សែភ្លើង ហើយ​មនុស្ស​៤៤​នាក់​ត្រូវបាន​ឃាត់ខ្លួន​ពាក់ព័ន្ធ​នឹង​ឧប្បត្តិហេតុ​ភ្លើងឆេះ ៦៥​លើក​។

នៅទីក្រុង Hatay ក្បែរព្រំដែនស៊ីរី ភ្លើងឆេះដ៏ធំមួយបានបង្ខំឱ្យមានការជម្លៀសផ្ទះចំនួន ៩២០ ខ្នង។ ប្រទេសតួកគីក៏បានបញ្ជូនយន្តហោះពន្លត់អគ្គិភ័យ និងជំនួយទៅកាន់តំបន់ Latakia របស់ប្រទេសស៊ីរីផងដែរ ទោះបីជាការមកដល់របស់ពួកគេត្រូវបានពន្យារពេលដោយសារភាពអាសន្នរបស់ប្រទេសតួកគីក៏ដោយ។

នៅក្នុងប្រទេសស៊ីរី ក្រុមសង្គ្រោះបន្ទាន់ប្រឈមមុខនឹងគ្រោះថ្នាក់បន្ថែមទៀត ភ្លើងឆេះព្រៃអាចនឹងរាលដាលពាសពេញតំបន់ដែលនៅតែមានគ្រាប់មិនទាន់ផ្ទុះដែលបន្សល់ទុកពីជម្លោះជាច្រើនឆ្នាំ ដោយបង្កើនការព្រួយបារម្ភអំពីសុវត្ថិភាពសម្រាប់អ្នកពន្លត់ភ្លើង។

ភ្លើងឆេះព្រៃក៏បានវាយប្រហារប្រទេសក្រិកផងដែរ ដោយបង្ហាញពីវិបត្តិភ្លើងឆេះព្រៃក្នុងតំបន់កាន់តែទូលំទូលាយ។ អ្នកជំនាញព្រមានថា ការប្រែប្រួលអាកាសធាតុកំពុងធ្វើឱ្យអាកាសធាតុធ្ងន់ធ្ងរ និងភ្លើងឆេះព្រៃកាន់តែញឹកញាប់ និងខ្លាំងឡើងនៅភាគខាងកើតមេឌីទែរ៉ាណេ៕

អត្ថបទ៖ ប៊ុន សុភាព