ព័ត៌មានអន្ដរជាតិ

ក្រោយយោធាថៃបិទព្រំដែនរយៈពេល១ខែ អាជីវករនិងពាណិជ្ជករថៃចាប់ផ្តើមតវ៉ាដំបូង

បានផុស

១០ ខែ មុន

នៅ

ថ្ងៃចន្ទ ៧ កក្កដា ២០២៥

ដោយ

អាជីវករនិងពាណិជ្ជករថៃបានចាប់ផ្តើមប្រមូលផ្តុំគ្នាតវ៉ាដ៏កម្រមួយនៅច្រកទ្វារព្រំដែនអន្តរជាតិក្នុងទឹកដីថៃ ទាមទារឲ្យបើកច្រកព្រំដែនឡើងវិញ ខណៈពេលដែលក្រុមយោធារបស់ប្រទេសថៃបានចេញបញ្ជាឲ្យបិទច្រកព្រំដែនជាឯកតោភាគីអស់រយៈពេល១ខែរហូតដល់ថ្ងៃទី៧ខែកក្កដានេះ។

ការតវ៉ារបស់អាជីវករនិងពាណិជ្ជករថៃ។ ភ្នាក់ងារ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរូបភាពនៃការតវ៉ាដ៏កម្រដ៏កម្រនេះ ត្រូវបានចេញផ្សាយលើបណ្តាញសង្គមនៅថ្ងៃទី៧ខែកក្កដានេះ អាជីវករនិងពាណិជ្ជករថៃដែលមានអាជីវកម្មជាមួយទីផ្សារកម្ពុជា បានកើតទុក្ខមិនសុខចិត្តចំពោះការបិទច្រកព្រំដែនអន្តរជាតិ ដែលផ្តើមអនុវត្តដោយភាគីយោធាថៃរយៈពេល១ខែ។

ក្នុងការបិទច្រកព្រំដែននេះ យោធារបស់ថៃបានចេញបញ្ជាឲ្យបិទច្រកព្រំដែនជាឯកតោភាគីជាលើកដំបូងកាលថ្ងៃទី៧ខែមិថុនា ក្រោយពីការផ្ទុះអាវុធដែលបង្កឡើងដោយយោធាថៃនៅតំបន់មុំបីនៅឯខេត្តព្រះវិហារ ហើយ ការប្រឈមមុខដាក់គ្នារវាងកងទ័ពនៃប្រទេសថៃនិងកម្ពុជាក៏បានកើនឡើងជាបន្តបន្ទាប់ និងបានរីករាលដាលដល់វិស័យផ្សេងៗទៀត ដែលភាគីថៃមានទំនាស់ផ្ទៃក្នុងនោះចង់បង្វែរស្ថានការផ្ទៃក្នុងងាកមកទម្លាក់កំហុសដាក់កម្ពុជា។

តាមរូបភាពដែលបង្ហោះលើបណ្តាញសង្គមបង្ហាញពីការតវ៉ារបស់អាជីវករថៃនៅក្នុងទឹកដីថៃ ប្រជាពលរដ្ឋថៃជាច្រើននាក់ បាននាំគ្នាទៅតវ៉ា ទាមទារឱ្យមានការបើកច្រកព្រំដែនជាមួយនឹងកម្ពុជាឡើងវិញ ដើម្បីអាចចេញចូល និងប្រកបរបរជួញដូរបានដូចមុន។ ការប្រមូលផ្តុំគ្នាតវ៉ានេះ ធ្វើឡើងនៅច្រកទ្វារព្រំដែនខាងទឹកដីថៃ នៅទល់មុខច្រកទ្វារអន្តរជាតិប៉ោយប៉ែតរបស់កម្ពុជា នាព្រឹកថ្ងៃចន្ទ ទី៧ ខែកក្កដានេះ។

កាលពីថ្ងៃទី៧ ខែមិថុនា នាយឧត្តមសេនីយ៍ Pana Klaewblaudtuk អគ្គមេបញ្ជាការនៃកងយោធពលខេមរភូមិន្ទថៃ (RTA) បានចុះហត្ថលេខាលើបទបញ្ជាលេខ ៨០៦/២៥៦៨ ស្តីពីការអនុញ្ញាតឱ្យត្រួតពិនិត្យការបើក និងបិទច្រកព្រំដែនគ្រប់ប្រភេទនៅតាមព្រំដែនកម្ពុជា-ថៃ។

ចាប់តាំងពីការដាក់បទបញ្ជានោះមក យោធាថៃចាប់ផ្តើមបិទច្រកព្រំដែនទាំងអស់។ ជាការតបត ភាគីកម្ពុជាក៏បានបិទច្រកព្រំដែនដូចគ្នា ហើយ នាយករដ្ឋមន្ត្រីថៃ ផែថងថាន ស៊ីណាវ៉ាត្រ ដែលត្រូវបានគេមើលឃើញថា គ្មានអំណាចគ្រប់គ្រាន់ក្នុងការបញ្ជាក្រុមយោធាឲ្យអនុវត្តតាមខ្លួននោះ ក៏បាននិយាយទូរស័ព្ទជាលក្ខណៈឯកជនជាមួយថ្នាក់ដឹកនាំកម្ពុជា ក្នុងបំណងបញ្ចុះបញ្ចូលឲ្យកម្ពុជាបើកច្រកវិញ ហើយថ្នាក់ដឹកនាំកម្ពុជា បានប្រាប់នាយករដ្ឋមន្ត្រីថៃវិញថា កម្ពុជាត្រៀមតែបើកទេ បើភាគីថៃបើកមុន ព្រោះភាគីថៃជាអ្នកបិទមុនជាឯកតោភាគី៕

រ៉ាន់ រើយ