ណេតាន់យ៉ាហ៊ូ៖ លោក ត្រាំ អាចជួយបញ្ចប់កិច្ចព្រមព្រៀងបទឈប់បាញ់​នៅ​ហ្គាហ្សា

នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បាននិយាយថា លោកជឿថាប្រធានាធិបតីអាមេរិក ដូណាល់ ត្រាំ អាចដើរតួយ៉ាងសំខាន់ក្នុងការជួយបញ្ចប់កិច្ចព្រមព្រៀងបទឈប់បាញ់ជាមួយក្រុមហាម៉ាសនៅតំបន់ហ្គាហ្សា។

ថ្លែងនៅមុនដំណើរទស្សនកិច្ចរបស់លោកទៅកាន់ទីក្រុងវ៉ាស៊ីនតោន​កាល​ពី​ថ្ងៃ​អាទិត្យ​ទី​៦​ខែ​កក្កដា លោក ណេតាន់យ៉ាហ៊ូ បាន​លើក​ឡើង​ថា អ្នកចរចារបស់អ៊ីស្រាអែលបច្ចុប្បន្ននៅក្នុងប្រទេសកាតា ត្រូវបានណែនាំ​ឲ្យ​ធ្វើការឆ្ពោះទៅរកកិច្ចព្រមព្រៀង ដោយផ្អែកលើសំណើដែលគាំទ្រដោយសហរដ្ឋអាមេរិក ដែលរួមមានបទឈប់បាញ់រយៈពេល ៦០​ថ្ងៃ ការដោះលែងចំណាប់ខ្មាំងបន្តិចម្តងៗ និងការដកទ័ពអ៊ីស្រាអែលជាដំណាក់កាលចេញពីផ្នែកខ្លះនៃតំបន់ហ្គាហ្សា។

លោក ណេតាន់យ៉ាហ៊ូ បានប្រាប់អ្នកយកព័ត៌មាន​ថា «ខ្ញុំជឿថា ការពិភាក្សារបស់ខ្ញុំជាមួយប្រធានាធិបតី ត្រាំ ពិតជាអាចជួយជំរុញកិច្ចព្រមព្រៀងនេះ»។

ខណៈពេលដែលអ៊ីស្រាអែលបានចុះហត្ថលេខាលើការយល់ព្រមសម្រាប់​បទឈប់បាញ់នោះ ក្រុមហាម៉ាសនៅតែទាមទារការធានាកាន់តែច្បាស់លាស់លើការផ្តល់ជំនួយ ការចូលទៅកាន់ច្រកព្រំដែន Rafah និងពេលវេលាកំណត់សម្រាប់ការដកទ័ពរបស់អ៊ីស្រាអែល។

កិច្ចចរចាដែលកំពុងបន្តនៅទីក្រុងដូហា គឺជាផ្នែកមួយនៃការជំរុញអន្តរជាតិដែលដឹកនាំដោយសហរដ្ឋអាមេរិក អេហ្ស៊ីប និងកាតា ដើម្បីបញ្ចប់សង្រ្គាមដែលអូសបន្លាយជាច្រើនខែ ដែលបណ្តាលឲ្យមនុស្សរាប់​ម៉ឺន​នាក់ស្លាប់ និងបានជម្លៀសប្រជាជននៅតំបន់ហ្គាហ្សាយ៉ាងច្រើន។ លោកប្រធានាធិបតី ត្រាំ បាននិយាយថា លោកមានសុទិដ្ឋិនិយមថា កិច្ចព្រមព្រៀងនេះអាចនឹងត្រូវបានបញ្ចប់ក្នុងពេលឆាប់ៗ។

ទោះបីជាមានការវិវត្ត​ខ្លះ​នៅក្នុងកិច្ចចរចាក៏ដោយ ក៏​ការវាយប្រហារតាមអាកាសរបស់អ៊ីស្រាអែលនៅ​តែ​​បន្ត​លើ​តំបន់ហ្គាហ្សាស្ទ្រីប​មិន​បន្ធូរ​ដៃ​ឡើយ ដោយយ៉ាងហោចណាស់មានជនជាតិប៉ាឡេស្ទីន ៨២​នាក់​​ត្រូវ​បាន​​សម្លាប់​​កាលពីថ្ងៃអាទិត្យ៕

ដោយ៖ ឈាង

ចុចអាន៖ ទន្ទឹម​បទឈប់បាញ់ថ្មី​នៅហ្គាហ្សារំពឹង​​​សម្រេចក្នុងសប្តាហ៍នេះ ការ​វាយ​​ប្រហារ​របស់​អ៊ីស្រាអែល​កាន់តែ​សាហាវ​​