ស្លាប់​ជិត ៨០០​នាក់ក្នុង​ពេល​៦សប្ដាហ៍នៅ​ក្បែរ​កន្លែង​ចែក​ជំនួយ​តំបន់​ហ្គាហ្សា

ការិយាល័យសិទ្ធិមនុស្សរបស់អង្គការសហប្រជាជាតិ បានរាយការណ៍ថា ជនជាតិប៉ាឡេស្ទីនចំនួន ៧៩៨នាក់ ត្រូវបានសម្លាប់ក្នុងរយៈពេល៦​សប្តាហ៍ចុងក្រោយនេះ ខណៈដែលកំពុងព្យាយាមទទួលបានជំនួយមនុស្សធម៌នៅក្នុងតំបន់ហ្គាហ្សា។

មនុស្ស ៦១៥​នាក់ បានស្លាប់នៅជិតមជ្ឈមណ្ឌលចែកចាយជំនួយ ជាកន្លែងដែល​ក្រុម​មនុស្សច្រើនតែប្រមូលផ្តុំគ្នាដើម្បីទទួលអាហារ ឬសម្ភារៈ​ប្រើប្រាស់​ចាំបាច់។ ​ចំណែក​ឯ​មនុស្ស ១៨៣​នាក់​ផ្សេង​ទៀត ត្រូវបានសម្លាប់នៅតាមបណ្តោយផ្លូវ​​ក្បួន​រថយន្ត​​​ជំនួយ ជាកន្លែង​សម្រាប់​ការ​​​ដឹក​ជញ្ជូន​ដឹកអាហារ ទឹក និងថ្នាំ​ពេទ្យ​ទៅកាន់តំបន់ផ្សេងៗគ្នា។

ជនរងគ្រោះជាច្រើននាក់ ត្រូវបានសម្លាប់ដោយ​ការបាញ់កាំភ្លើង ហើយអង្គការសហប្រជាជាតិនិយាយថា មានការព្រួយបារម្ភយ៉ាងខ្លាំងអំពីរបៀបដែលជំនួយត្រូវបានផ្តល់ និងការពារ។

ការស្លាប់ភាគ​ច្រើន​ កើត​ឡើង​នៅ​ក្បែរ​ទីតាំង​ជំនួយ​របស់​មូលនិធិមនុស្សធម៌​ហ្គាហ្សា ឬ​ហៅ​កាត់​ថា GHF ដែលត្រូវបានបង្កើតឡើងដោយមានការគាំទ្រពី​សហរដ្ឋអាមេរិក និងអ៊ីស្រាអែល។ ក្រុម​ជំនួយ​នេះ ពុំ​មាន​ការ​សហការ​ជាមួយ​អង្គការសហប្រជាជាតិ​ឡើយ ហើយប្រើប្រាស់អ្នកម៉ៅការឯកជនដើម្បីចែកចាយអាហារ និងការផ្គត់ផ្គង់។

អង្គការសហប្រជាជាតិ និយាយថា ប្រព័ន្ធរបស់ GHF គឺមិនមានសុវត្ថិភាព ហើយរបៀបដែលវាដំណើរការ​អាចនឹងធ្វើ​ឲ្យ​ជនស៊ីវិលប្រឈមនឹងហានិភ័យ។ ទោះជាយ៉ាងណាក៏ដោយ GHF បានស្តីបន្ទោសអំពើហឹង្សា​ថា​បណ្ដាល​មក​ពីក្រុម​សកម្មប្រយុទ្ធ​ហាម៉ាស ហើយនិយាយថា ប្រព័ន្ធរបស់​ខ្លួន​មានប្រសិទ្ធភាពជាងអង្គការសហប្រជាជាតិ។

សហភាពអឺរ៉ុប កំពុងពិចារណាចាត់វិធានការផ្លូវច្បាប់ប្រឆាំងនឹងអ៊ីស្រាអែល ចំពោះការបំពានច្បាប់អន្តរជាតិ ទាក់ទងនឹងការការពារជនស៊ីវិល។ ចំណែក​ឯ​ចក្រភពអង់គ្លេស បានដាក់ទណ្ឌកម្មលើ​មន្ត្រីអ៊ីស្រាអែលមួយចំនួន ដែលជាប់ពាក់ព័ន្ធនឹងការស្លាប់ទាក់ទងនឹង​ការ​ចែក​ជំនួយ។

បន្ថែម​ពី​នេះ អង្គការមនុស្សធម៌ជាង ១៧០ រួមទាំង Oxfam , Amnesty International , និង Save the Children កំពុងអំពាវនាវ​ឲ្យបិទ GHF និងឲ្យ​ការផ្តល់ជំនួយដែលដឹកនាំដោយអង្គការសហប្រជាជាតិ​ដំណើរការ​ឡើង​វិញ៕

ដោយ៖ ឈាង