ត្រាំ ចុះទៅតំបន់ទឹកជំនន់នៅរដ្ឋតិចសាស់ ចំពេលមានការរិះគន់រដ្ឋាភិបាល

យោងតាមការចេញផ្សាយរបស់សារព័ត៌មាន​ CNBC នៅថ្ងៃទី ១២ ខែ កក្កដា លោកប្រធានាធិបតី ដូណាល់ ត្រាំ បានចុះទៅតំបន់ Kerr រដ្ឋតិចសាស់ កាលពីថ្ងៃសុក្រ ដើម្បីវាយតម្លៃការខូចខាតពីទឹកជំនន់ភ្លាមៗ ដែលបានវាយប្រហារកាលពីថ្ងៃទី ៤ ខែកក្កដា សម្លាប់មនុស្សយ៉ាងហោចណាស់ ១២០ នាក់និងចំពេលមានការរិះគន់លើការឆ្លើយតបរបស់រដ្ឋាភិបាល។

ក្នុងអំឡុងពេលពិភាក្សាតុមូលមួយ លោក ត្រាំ បានសរសើរកិច្ចខិតខំប្រឹងប្រែងឆ្លើយតបរបស់អភិបាលរដ្ឋតិចសាស់ យ៉ាងខ្លាំង។ ទោះជាយ៉ាងណាក៏ដោយ ដំណើរទស្សនកិច្ចនេះបានកើតឡើងនៅពេលដែលរដ្ឋបាលលោក ត្រាំ ប្រឈមមុខនឹងការរិះគន់កាន់តែខ្លាំងឡើងអំពីថាតើរដ្ឋាភិបាលអាចធ្វើអ្វីបានល្អជាងនេះដើម្បីការពារគ្រោះមហន្តរាយដែរឬទេ។

មនុស្ស​ជា​ច្រើន​បាន​ចោទ​សួរ​ពី​កង្វះ​ការ​ព្រមាន​ជា​មុន ហើយ​បាន​បន្ទោស​ទៅ​លើការ​កាត់​បន្ថយ​ថវិកាក្រោមការបញ្ជារបស់លោក ត្រាំ​ លើភ្នាក់ងារអាកាសធាតុ​ជាតិ និង ទីភ្នាក់ងារគ្រប់គ្រងគ្រោះអាសន្នសហព័ន្ធ (FEMA)។ អ្នក​ខ្លះ​ជឿ​ថា​ការ​កាត់​បន្ថយ​ទាំង​នេះ​អាច​ធ្វើ​ឲ្យ​សមត្ថភាព​របស់​រដ្ឋាភិបាល​ក្នុង​ការ​ឆ្លើយ​តប​យ៉ាង​ឆាប់​រហ័ស​ចុះ​ខ្សោយ។

មុនពេលទឹកជំនន់ តំបន់ Kerr មិនអាចមានលទ្ធភាពដំឡើងប្រព័ន្ធព្រមានជាមុនបានស្រាប់ទៅហើយ។ អ្នកស្រុកមួយចំនួនបាននិយាយថា រដ្ឋាភិបាលមិនបានធ្វើអ្វីដើម្បីការពារគ្រោះមហន្តរាយទេ ខណៈអ្នកផ្សេងទៀតជឿថាការខូចខាតគឺជៀសមិនរួចនោះទេ ព្រោះមនុស្សបានសាងសង់ផ្ទះនៅជិតតំបន់ទន្លេដែលមានគ្រោះថ្នាក់។

គួររម្លឹកថាកាលពីថ្ងៃទី ៤ ខែ កក្កដា ភ្លៀងធ្លាក់យ៉ាងខ្លាំងក្នុងរយៈពេលជាងមួយម៉ោង បណ្តាលឱ្យទន្លេ Guadalupe កើនឡើងយ៉ាងឆាប់រហ័ស និងទឹកជំនន់យ៉ាងគំហុកបំផ្លាញអ្វីៗទាំងអស់នៅក្បែរនោះ។ ជនរងគ្រោះជាច្រើនជាកុមារមកពី Camp Mystic ហើយមនុស្សជាង ១៦០នាក់នៅតែបាត់ខ្លួននៅឡើយ។

នៅក្នុងដំណើរទស្សនកិច្ចនេះលោក ត្រាំ បានជៀសវាងសំណួរអំពីការកាត់តួនាទីរបស់ FEMA ខណៈពេលដែលសមាជិកសភារដ្ឋតិចសាស់មានគម្រោងស៊ើបអង្កេតគ្រោះមហន្តរាយ និងការផ្តល់ជំនួយ។

គួរបញ្ជាក់ថាសោកនាដកម្មនេះគឺជាគ្រោះមហន្តរាយធម្មជាតិដ៏សាហាវបំផុតក្នុងអាណត្តិរបស់លោក ត្រាំ ហើយវាបានបង្កឱ្យមានការជជែកវែកញែកកាន់តែទូលំទូលាយអំពីការត្រៀមរៀបចំការពារគ្រោះមហន្តរាយ ការទទួលខុសត្រូវរបស់រដ្ឋាភិបាល និងផលប៉ះពាល់នៃការកាត់បន្ថយថវិកាសហព័ន្ធ៕

អត្ថបទ៖ ប៊ុន​ សុភាព