ក្របួចជាប់បុរស​អាមេរិកម្នាក់​ ត្រៀមរត់ពន្ធហេ​រ៉ូ​អ៊ីន​ជិត៧​គីឡូក្រាម​ ​ចេញពីទឹកដីថៃ

បុរសជនជាតិអាមេរិកអាយុ ៦០ ឆ្នាំម្នាក់ ត្រូវប៉ូលិសថៃចាប់ខ្លួននៅអាកាសយានដ្ឋានភូកេត កាលពីល្ងាចថ្ងៃពុធ បន្ទាប់ពីរកឃើញ គ្រឿងញៀនប្រភេទហេរ៉ូអ៊ីន ៦,៦ គីឡូក្រាមនៅក្នុងវ៉ាលីរបស់ជនសង្ស័យ ខណៈដែលគាត់រៀបចំឡើងយន្តហោះទៅប្រទេសបារាំងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសម្ដីរបស់ប៉ូលិសទេសចរណ៍ភូកេត មានអ្នកផ្តល់ព័ត៌មានមួយរូបបានប្រាប់អ្នកស៊ើបអង្កេតកាលពីថ្ងៃចន្ទថា បុរសជនជាតិអាមេរិកម្នាក់បានប៉ុនប៉ងរត់ពន្ធគ្រឿងញៀនចេញពីប្រទេសថៃ។ កាល​ពី​ថ្ងៃ​ពុធ ក្រុម​អ្នក​ស៊ើប​អង្កេត​បាន​រក​ឃើញ​ជន​សង្ស័យ ហើយ​តាម​ទៅ​ដល់ព្រលាន​យន្តហោះភូកេតភ្លាមៗ។ ក្រោយស្កេនតាមកាំរស្មីអ៊ិចនៃវ៉ាលីរបស់គាត់ បានបង្ហាញពីវត្ថុគួរឲ្យសង្ស័យ នៅពេលដែលបុរសនោះកំពុងពិនិត្យជើងហោះហើររបស់គាត់ត្រៀមចាកចេញទៅវិញ។

ភ្លាមៗ ប៉ូលិស​បាន​រក​ឃើញ​ថ្នាំ​ញៀន​១០​ប្រអប់ ដែល​តាម​ពិត​មាន​កញ្ចប់​ថ្នាំ​ហេរ៉ូអ៊ីន​ទម្ងន់​សរុប​៦,៦​គីឡូក្រាមបន្ថែមផ្សេងទៀត។ ពេលនោះ ជនសង្ស័យឈ្មោះ Tyler Luong បានសារភាពប្រាប់ប៉ូលិសថា មិត្តភ័ក្តិជនជាតិបារាំងម្នាក់បានសុំឲ្យគាត់យកវ៉ាលីទៅប្រទេសបារាំង។ គាត់គ្រោងនឹងហោះហើរទៅកាន់គោលដៅតាមរយៈទីក្រុងដូហា និងទីក្រុងប្រ៊ុចសែលតែប៉ុណ្ណោះ។

ទោះជាយ៉ាងនេះក្ដី ប៉ូលិសថៃមិនជឿសម្ដីរបស់ជនសង្ស័យឡើយ ហើយបានក្របួចជាប់បុរសជនជាតិ​អាមេរិកនោះយកទៅឃុំ ដើម្បីរង់ចាំការសួរចម្លើយបន្តតាមនិនិវិធីច្បាប់បន្ថែមទៀត៕

អត្ថបទ៖ សាង ស្រីល័ក្ខ

ចុចអាន៖អស្ថិរភាពនយោបាយថៃ នាំឲ្យតារាជួរមុខ និងបុគ្គលិកប៉ុស្តិ៍ទូរទស្សន៍ បាត់បង់ការងារជាច្រើន