រុស្ស៊ី វាយប្រហារលើគុកនិងមន្ទីពេទ្យអ៊ុយក្រែនសម្លាប់មនុស្ស១៩នាក់ ខណៈ ត្រាំ ព្រមានដាក់ទណ្ឌកម្ម

យោងតាមការចេញផ្សាយរបស់សារព័ត៌មានCNA យ៉ាងហោចណាស់មនុស្ស ១៩ នាក់ត្រូវបានសម្លាប់នៅក្នុងការវាយប្រហារតាមអាកាសរបស់រុស្ស៊ីទៅលើគោលដៅជនស៊ីវិលនៅភាគអាគ្នេយ៍អ៊ុយក្រែនកាលពីថ្ងៃទី ២៩ ខែកក្កដា។

នៅក្នុងចំណោមអ្នកស្លាប់មាន១៦នាក់បានស្លាប់នៅក្នុងការវាយប្រហារដោយចេតនាលើពន្ធនាគារក្នុងតំបន់ Zaporizhzhia ហើយបីនាក់ទៀតរួមទាំងស្ត្រីមានផ្ទៃពោះផងដែរត្រូវបានសម្លាប់នៅក្នុងការវាយប្រហារនៅមន្ទីរពេទ្យក្នុងតំបន់ Dnipropetrovsk ។ លើសពីនេះមនុស្ស​ជាង​៤០​នាក់​បាន​រង​របួស​ក្នុង​ការ​បំផ្ទុះ​គ្រាប់​បែក​ក្នុង​ពន្ធនាគារ។

ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានថ្កោលទោសការវាយប្រហារដោយចោទប្រកាន់រុស្ស៊ីថាបានកំណត់គោលដៅជនស៊ីវិលដោយចេតនា។ លោកបានអំពាវនាវឱ្យមានការកើនឡើងសម្ពាធអន្តរជាតិលើទីក្រុងមូស្គូ ដោយនិយាយថា ទង្វើបែបនេះបង្ហាញពីតម្រូវការបន្តការគាំទ្រជាសកលចំពោះអ៊ុយក្រែន។

ទន្ទឹមនឹងនេះ ប្រធានាធិបតីអាមេរិក លោក ដូណាល់ ត្រាំ ដែលសម្តែងការខកចិត្តចំពោះប្រធានាធិបតីរុស្ស៊ី លោក វ្ល៉ាឌីមៀ ពូទីន បានកាត់បន្ថយពេលវេលាកំណត់សម្រាប់ទីក្រុងម៉ូស្គូ ដើម្បីបង្ហាញពីវឌ្ឍនភាពក្នុងការបញ្ចប់សង្រ្គាមជាមួយអ៊ុយក្រែន ពី ៥០ ថ្ងៃមកត្រឹមតែ ១០-១២ ថ្ងៃប៉ុណ្ណោះ។ លោក​បាន​ព្រមាន​ថា ប្រសិន​បើ​គ្មាន​ការ​រីក​ចម្រើន​ទេ វិធានការ​ដាក់​ទណ្ឌកម្ម​រួម​ទាំង​ពន្ធ​នឹង​ចាប់​ផ្ដើមដាក់សម្ពាធលើរុស្ស៊ី។

ទោះយ៉ាងណាវិមានក្រឹមឡាំងបាននិយាយថា សកម្មភាពយោធារបស់ខ្លួននៅអ៊ុយក្រែននៅតែដំណើរការ។ រុស្ស៊ី​បាន​បដិសេធ​ការ​វាយ​ប្រហារ​ជន​ស៊ីវិល ប៉ុន្តែ​ថ្មីៗ​នេះ ខ្លួន​បាន​បង្កើន​ការ​វាយ​ប្រហារ​តាម​អាកាស​នៅ​ទូទាំង​ប្រទេសអ៊ុយក្រែន ខណៈកងកម្លាំងរុស្ស៊ីនៅតែគ្រប់គ្រងប្រហែល ២០% នៃអ៊ុយក្រែន៕

អត្ថបទ៖ ប៊ុន សុភាព