ថៃ ប្រាប់ថា គ្រោងអញ្ជើញអង្គការអន្តរជាតិ ឲ្យមកពិនិត្យមើលការថែទាំរបស់ខ្លួន ចំពោះទាហានកម្ពុជា

ក្រោយពេលអន្តរជាតិកំពុងតាមដាននិងផ្តោតការយកចិត្តទុកដាក់ខ្លាំងលើប្រទេសថៃ ពេលនេះអ្នកនាំពាក្យកងទ័ពថៃ លោក Winthai Suvaree បានប្រកាសនៅសៅរ៍ទី២ខែសីហាឆ្នាំ២០២៥ថា កងទ័ពគ្រោងអញ្ជើញអង្គការអន្តរជាតិដូចជា UNHCR និង ICRC ឲ្យចូលពិនិត្យមើលការថែទាំទាហានកម្ពុជាដែលត្រូវបានឃុំខ្លួននៅក្នុងប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីភាគីថៃ ទង្វើនេះគឺមានគោលបំណងដើម្បីអនុលោមតាមនីតិវិធីនៃអនុសញ្ញាទីក្រុងហ្សឺណែវទាំងស្រុង បន្ទាប់ពីថៃ ប្រគល់ទាហានពីររូបត្រឡប់មកកម្ពុជាវិញកាលពីថ្ងៃទី ១ ខែសីហា។

តាមការបញ្ជាក់ពីអ្នកនាំពាក្យក្រសួងការពារជាតិកម្ពុជាលោកស្រីឧត្តមសេនីយ៍ឯក ម៉ាលី សុជាតា, គិតត្រឹមម៉ោង១១ថ្ងៃទី២ខែសីហា ទាហានកម្ពុជាចំនួន១៨រូបទៀត គឺមិនទាន់ត្រូវបានដោះលែងមកវិញនៅឡើយទេ ហើយកម្ពុជា នៅតែបន្តអំពាវនាវឲ្យថៃប្រគល់អ្នកទាំងនោះ ត្រឡប់មកវិញឲ្យបានឆាប់បំផុត។

លោកស្រីលើកឡើងថា រាជរដ្ឋាភិបាលកម្ពុជា កំពុងបន្តការចរចាយ៉ាងសស្រាក់សស្រាំ ដើម្បីជំរុញឲ្យភាគីថៃ ប្រគល់មកវិញឲ្យបានឆាប់រហ័សជាមួយនឹងសុវត្ថិភាពរបស់ពួកគាត់ ស្របតាមគោលការណ៍ច្បាប់មនុស្សធម៌អន្តរជាតិ។

ទន្ទឹមនេះ កម្ពុជា ក៏ស្នើទៅប្រទេសម៉ាឡេស៊ី ដែលជាប្រធានអាស៊ាន ក្នុងការជួយអន្តរាគមន៍ទៅកាន់ភាគីថៃឲ្យឆាប់ដោះលែងនិងបញ្ជូនមកឲ្យកម្ពុជាវិញនូវកងកម្លាំងរបស់កម្ពុជាទាំង១៨នាក់នេះផងដែរ៕

អត្ថបទ៖ សុខ សុវណ្ណ

ចុចអាន៖ ម៉ាឡេស៊ី ប្រកាសចូលរួមកិច្ចប្រជុំ GBC រវាងកម្ពុជានិងថៃ