ព័ត៌មានអន្ដរជាតិ

ពូទីន ប្រាប់ថាអាចចរចាទល់មុខគ្នាជាមួយ ហ្សេលេនស្គី តែមានលក្ខខណ្ឌមួយចំនួន

បានផុស

១១ ខែ មុន

នៅ

ថ្ងៃអង្គារ ៥ សីហា ២០២៥

ដោយ

Chheang

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយថា លោកបើកចំហរក្នុងការជួបពិភាក្សាទល់មុខគ្នាជាមួយប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ប៉ុន្តែលុះត្រាតែលក្ខខណ្ឌមួយចំនួនត្រូវបានបំពេញជាមុនសិន។

លោក វ៉្លាឌីមៀរ ពូទីន និងលោក វ៉ូឡូឌីមៀរ ហ្សេលេនស្គី (រូបថត៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពូទីន បានធ្វើការកត់សម្គាល់នេះ ក្នុងអំឡុងពេលកិច្ចប្រជុំបិទទ្វារជាមួយមន្ត្រីជាន់ខ្ពស់កាលពីថ្ងៃចន្ទទី៤ខែសីហា ដោយនិយាយថា ការចរចាដោយផ្ទាល់អាចប្រព្រឹត្តទៅបាន បើទីក្រុងកៀវទទួលស្គាល់ការគ្រប់គ្រងដែនដីបច្ចុប្បន្នរបស់រុស្ស៊ី និងបោះបង់ចោលមហិច្ឆតាចូលអង្គការណាតូ។

អ្នកនាំពាក្យវិមានក្រឹមឡាំងបានដកស្រង់សម្ដីលោក ពូទីន ថា៖ «គ្មានការជំទាស់នឹងកិច្ចប្រជុំនោះទេ។ ប៉ុន្តែវាត្រូវតែផ្អែកលើការពិត មិនមែនការបំភាន់ឡើយ»។

វិមានក្រឹមឡាំងទទូចថា កិច្ចសន្ទនាណាមួយត្រូវតែយកទៅពិចារណានូវអ្វីដែលខ្លួនហៅថា«ភាពជាក់ស្តែងនៃទឹកដីថ្មី» ដែលសំដៅទៅលើតំបន់ដែលរុស្ស៊ីកាត់ពីអ៊ុយក្រែនចូលជាឧបសម្ព័ន្ធ។

កន្លងមក មន្ត្រីអ៊ុយក្រែន បានច្រានចោលម្តងហើយម្តងទៀតនូវកិច្ចចរចាដែលនឹងពាក់ព័ន្ធនឹងការកាត់ទឹកដីណាមួយឲ្យរុស្ស៊ី ដោយប្រធានាធិបតី ហ្សេលេនស្គី បានអះអាងថា ការដកខ្លួនទាំងស្រុងរបស់រុស្ស៊ី ទើបជាលក្ខខណ្ឌចាំបាច់សម្រាប់ការចរចា។

បច្ចុប្បន្ន មិនទាន់មានការឆ្លើយតបភ្លាមៗពីទីក្រុងកៀវ ចំពោះការលើកឡើងចុងក្រោយរបស់លោក ពូទីន ទេ។

ការកត់សម្គាល់របស់លោក ពូទីន ធ្វើឡើងចំពេលដែលភាពតានតឹងកើនឡើង និងជិតដល់ថ្ងៃកំណត់នៅថ្ងៃទី៨ខែសីហា ដែលជាឱសានវាទរបស់ប្រធានាធិបតីអាមេរិក លោក ដូណាល់ ត្រាំ សម្រាប់ទីក្រុងមូស្គូ ដើម្បីយល់ព្រមលើបទឈប់បាញ់ ឬប្រឈមមុខនឹងទណ្ឌកម្មប្រេងដ៏ធ្ងន់ធ្ងរបន្ថែមទៀត៕

ដោយ៖ ឈាង