អាមេរិក ដំឡើង​ប្រាក់​រង្វាន់ទ្វេដងដល់ ៥០​លានដុល្លារ ដើម្បី​ចាប់ខ្លួនប្រធានាធិបតីវ៉េណេស៊ុយអេឡា

រដ្ឋបាល​របស់​លោក​ប្រធានាធិបតីអាមេរិក ដូណាល់ ត្រាំ កាលពីថ្ងៃព្រហស្បតិ៍​ទី​៧ខែ​សីហា​ឆ្នាំ​២០២៥ បានប្រកាសថា​នឹងផ្តល់រង្វាន់ទ្វេដង​ឡើង​ដល់ ៥០​លាន​ដុល្លារ សម្រាប់ព័ត៌មានដែលនាំទៅដល់ការចាប់ខ្លួន ឬការកាត់ទោសប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ ដែល​ត្រូវ​ចោទប្រកាន់ពីបទជួញដូរគ្រឿងញៀន​នៅ​សហរដ្ឋ​អាមេរិក។

ចំណាត់ការនេះ កើតឡើងចំពេលមានសម្ពាធការទូត និងសេដ្ឋកិច្ចជាថ្មីពីរដ្ឋបាល​លោក ត្រាំ ដែលចោទប្រកាន់លោក ម៉ាឌូរ៉ូ ថាកំពុង​ប្រើប្រាស់​ប្រាក់ចំណេញពីគ្រឿងញៀនដើម្បីរក្សាអំណាច​ខ្លួន។ លោក ម៉ាឌូរ៉ូ ត្រូវបានចោទប្រកាន់ជាលើកដំបូងនៅក្នុងឆ្នាំ​២០២០ ដោយរដ្ឋអាជ្ញា​​អាមេរិក ដែលថា គាត់បានដើរតួនាទីសំខាន់ក្នុងការសមគំនិតរត់ពន្ធកូកាអ៊ីនដ៏ច្រើនសន្ធឹកសន្ធាប់​ចូលទៅក្នុង​ទឹក​ដី​សហរដ្ឋអាមេរិក។

លោក ត្រាំ បាននិយាយនៅក្នុងសេចក្តីថ្លែងការណ៍តាមកញ្ចក់​ទូរទស្សន៍ថា «លោក ម៉ាឌូរ៉ូ គឺជាឧក្រិដ្ឋជន ហើយយុត្តិធម៌នឹងមាន។ យើងកំពុងបង្កើនរង្វាន់ទ្វេដង ៥០លានដុល្លារ ដើម្បីនាំគាត់មកសហរដ្ឋអាមេរិកឲ្យ​ប្រឈមមុខនឹងការកាត់ទោស ចំពោះឧក្រិដ្ឋកម្មរបស់គាត់ប្រឆាំងនឹងប្រជាជន​វ៉េណេស៊ុយអេឡា និងប្រឆាំងនឹងប្រជាជនអាមេរិក»។

ក្រៅ​តែ​ពី​លោក ម៉ាឌូរ៉ូ មន្ត្រី​ធំៗ​មួយ​ចំនួន​របស់​វ៉េណេស៊ុយអេឡា ក៏ត្រូវ​អាមេរិក​ប្រកាស​ចាប់​ខ្លួន​ផង​ដែរ ដូចជា រដ្ឋមន្ត្រីការពារជាតិលោក Vladimir Padrino និងអតីតអនុប្រធានាធិបតី Tareck El Aissami ជា​ដើម។

លោក ម៉ាឌូរ៉ូ បានបដិសេធជាយូរមកហើយនូវរាល់​ការចោទប្រកាន់របស់សហរដ្ឋអាមេរិក ហើយ​ចាត់ទុកថាវា​មានហេតុផលនយោបាយ និងជាផ្នែកនៃយុទ្ធនាការចក្រពត្តិនិយមដើម្បីផ្តួលរំលំរដ្ឋាភិបាលរបស់គាត់។ នៅក្នុងសុន្ទរកថាថ្នាក់ជាតិមួយកាលពីល្ងាចថ្ងៃព្រហស្បតិ៍ លោកបានច្រានចោលការបង្កើនប្រាក់រង្វាន់ថាជា«ការឃោសនាដែលគ្មាន​ប្រសិទ្ធភាព» ហើយបានប្តេជ្ញាថា«នឹងមិនលុតជង្គង់នៅចំពោះមុខអាមេរិកឡើយ»។

ក្រសួងការបរទេសវ៉េណេស៊ុយអេឡា បានដាក់​ពាក្យបណ្តឹងជាផ្លូវការ ដោយចោទប្រកាន់សហរដ្ឋអាមេរិកថាបានបំពានច្បាប់អន្តរជាតិ និងប៉ុនប៉ងញុះញង់​ឲ្យ​មានការបះបោរ។ យ៉ាង​ណា​មិញ ក្រុម​​ប្រឆាំង​នឹង​រដ្ឋាភិបាល​វ៉េណេស៊ុយអេឡា បានស្វាគមន៍ចំពោះចំណាត់ការ​របស់​អាមេរិក​នេះ ដោយបានហៅវាថាជា«សារនៃក្តីសង្ឃឹម» ដល់ប្រជាជនវ៉េណេស៊ុយអេឡាដែលកំពុងស្វែងរកយុត្តិធម៌៕

ដោយ៖ ឈាង

ចុចអាន៖ អាមេរិក ដំឡើង​ប្រាក់​រង្វាន់​ចាប់​ខ្លួន​​ប្រធានាធិបតីវ៉េណេស៊ុយអេឡា ដល់​២៥​លាន​ដុល្លារ