Netanyahu ចង់គ្រប់គ្រងតំបន់ហ្គាហ្សា ទាំងមូល

ក្នុងបទសម្ភាសជាមួយ Fox News កាលពីថ្ងៃព្រហស្បតិ៍ទី៧ខែសីហាឆ្នាំ២០២៥ នាយករដ្ឋមន្ត្រីអ៊ីស្រាអែល Benjamin Netanyahu បានបញ្ជាក់យ៉ាងច្បាស់ថា លោកចង់គ្រប់គ្រងតំបន់ហ្គាហ្សាទាំងមូល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយសំណួរពិធីករ Bill Hemmer ថាតើអ៊ីស្រាអែល ពិតជាចង់កាន់កាប់តំបន់ឆ្នេរសមុទ្រទាំងមូលមែនទេលោកនិយាយថា «ក្រោយកម្ចាត់ក្រុមហាម៉ាសរួច យើងចង់ដាក់យោធាទៅគ្រប់គ្រងតំបន់ហ្គាហ្សាទាំងស្រុង យើងមិនចង់គ្រប់គ្រងត្រឹមស្ថាប័នសន្តិសុខឡើយ»។

ការគ្រប់គ្រងហ្គាហ្សាទាំងស្រុង នឹងផ្ទុយពីការសម្រេចចិត្តឆ្នាំ២០០៥របស់អ៊ីស្រាអែល ដែលខ្លួនបានដកពលរដ្ឋនិងទាហានចេញពីទឹកដីនេះ ប៉ុន្តែរក្សាការគ្រប់គ្រងលើព្រំដែន ដែនអាកាស និងឧបករណ៍ប្រើប្រាស់។

ទោះបីជាយ៉ាងណាក៏ដោយ គណបក្សស្តាំនិយម បានស្តីបន្ទោសការសម្រេចចិត្តនេះ ថាជាការបើកដៃឲ្យក្រុមហាម៉ាស ក្តោបក្តាប់អំណាចនៅទីនោះក្នុងការបោះឆ្នោតឆ្នាំ២០០៦។

ដ្បិតមានសម្ពាធអន្តរជាតិនិងផ្ទៃក្នុងក៏ដោយ លោក Netanyahu នៅតែបន្តយុទ្ធនាការប្រយុទ្ធនៅហ្គាហ្សា ខណៈក្រុមហាម៉ាសទាមទារឲ្យពន្លត់ភ្លើងសង្គ្រាម ជាថ្នូរនឹងកិច្ចព្រមព្រៀងចំណាប់ខ្មាំង។

យោងតាមតួលេខចុងក្រោយពីក្រសួងសុខាភិបាលប៉ាឡេស្ទីននៅហ្គាហ្សា គិតចាប់តាំងពីថ្ងៃទី ៧ ខែតុលា ឆ្នាំ ២០២៣ មក សង្គ្រាមហ្គាហ្សា បានផ្តាច់ជីវិតមនុស្សចំនួន៦១ ១៥៨នាក់ និងរបួស១៥១ ៤៤២នាក់៕

អត្ថបទ៖ សុខ សុវណ្ណ

ចុចអាន៖ ឥណ្ឌូណេស៊ី ​រៀបចំ​កោះ​មួយ​កន្លែង ​ដើម្បី​ព្យាបាល​អ្នក​របួស ​២ ០០០​នាក់​មកពី​​ហ្គាហ្សា