ឥណ្ឌូណេស៊ី ​រៀបចំ​កោះ​មួយ​កន្លែង ​ដើម្បី​ព្យាបាល​អ្នក​របួស ​២ ០០០​នាក់​មកពី​​ហ្គាហ្សា

ប្រទេសឥណ្ឌូណេស៊ី កំពុងរៀបចំ​កន្លែងព្យាបាលមួយនៅលើកោះ Galang ដែលជាកោះគ្មានមនុស្សរស់នៅ​ក្នុង​តំបន់​ស៊ូម៉ាត្រា ដើម្បីផ្តល់ការព្យាបាលដល់​អ្នករបួសប្រហែល ២ ០០០​នាក់​មក​ពី​តំបន់ហ្គាហ្សា។ នេះ​បើតាម​ការ​បញ្ជាក់​របស់​អ្នកនាំពាក្យប្រធានាធិបតី​ឥណ្ឌូណេស៊ី​នៅ​ថ្ងៃ​ព្រហស្បតិ៍​ទី​៧​ខែ​សីហា​ឆ្នាំ​២០២៥។

អ្នកនាំពាក្យលោក Hasan Nasbi បានប្រាប់អ្នកយកព័ត៌មានថា «ឥណ្ឌូណេស៊ីនឹងផ្តល់ជំនួយផ្នែកវេជ្ជសាស្រ្តសម្រាប់អ្នកស្រុក​ហ្គាហ្សា ប្រហែល ២ ០០០​នាក់ដែលបានក្លាយជាជនរងគ្រោះនៃសង្គ្រាម ដូចជា អ្នកដែលរងរបួស និង​អ្នក​ដែល​ត្រូវបានកប់នៅ​ក្រោម​អគារ​បែកបាក់»។

គំនិតផ្តួចផ្តើមមនុស្សធម៌នេះ គឺផ្តោតលើការថែទាំសុខភាពបណ្តោះអាសន្ន មិនមែនការផ្លាស់ប្តូរទីលំនៅអចិន្ត្រៃយ៍ទេ។ មន្ទីរពេទ្យនឹងផ្តល់កន្លែងស្នាក់នៅទាំងអ្នកជំងឺ និងក្រុមគ្រួសាររបស់ពួកគេក្នុងអំឡុងពេលព្យាបាល បន្ទាប់មកពួកគេនឹងត្រូវ​ត្រឡប់ទៅផ្ទះវិញ។ មន្ទីរពេទ្យ​នៅ​ Galang ដែលដើមឡើយត្រូវបានសាងសង់ក្នុងឆ្នាំ​២០២០ ជាមន្ទីរពេទ្យព្យាបាល​ជំងឺ​កូវីដ​១៩ ហើយធ្លាប់ជាជម្រកជនភៀសខ្លួនវៀតណាម ខណៈ​ការ​រៀបចំឡើងវិញសម្រាប់បេសកកម្ម​ព្យាបាល​ពលរដ្ឋ​ហ្គាហ្សា​ដែល​រង​របួស​នេះ ធ្វើ​ឡើង​ដោយសារហេដ្ឋារចនាសម្ព័ន្ធផ្នែកវេជ្ជសាស្រ្តដែលមានស្រាប់ និង​ទីតាំង​នៅ​ដាច់​ឆ្ងាយ​ពី​គេ​ឯង។

កិច្ចខិតខំប្រឹងប្រែងនេះ កើតឡើងនៅពេលដែលរដ្ឋាភិបាលឥណ្ឌូណេស៊ីបង្កើនការគាំទ្ររបស់ខ្លួន សម្រាប់តំបន់ហ្គាហ្សា ចំពេលមានជម្លោះដែលកំពុងបន្ត និងការកើនឡើងនៃចំនួនជនស៊ីវិល។ អាជ្ញាធរ​ឥណ្ឌូណេស៊ី បានបំភ្លឺថា គំនិតផ្តួចផ្តើម​នេះ គឺជា​សកម្មភាព​មនុស្សធម៌ ស្របតាមគោលជំហរដ៏យូរអង្វែងរបស់ប្រទេសឥណ្ឌូណេស៊ី ដែលគាំទ្រដំណោះស្រាយរដ្ឋពីរ និងការប្រឆាំងនឹងការតាំងទីលំនៅថ្មីដោយបង្ខំ​របស់​ប្រជាជន​ហ្គាហ្សា៕

ដោយ៖ ឈាង