មេដឹកនាំពិភពលោកកំពូលៗ៤រូប អាចនឹងចូលរួមកិច្ចប្រជុំអាស៊ាន នៅ ម៉ាឡេស៊ី

នាយករដ្ឋមន្ត្រីម៉ាឡេស៊ី Anwar Ibrahim និយាយថា មេដឹកនាំពិភពលោកធំៗចំនួន៤រូប អាចនឹងចូលរួមក្នុងកិច្ចប្រជុំអាស៊ានលើកទី៤៧ នៅប្រទេសម៉ាឡេស៊ី នាខែវិច្ឆិកាឆ្នាំ២០២៥ខាងមុខនេះ ក្នុងនោះមានដូចជាប្រធានាធិបតីអាមេរិក Donald Trump, ប្រធានាធិបតីចិន Xi Jinping, ប្រធានាធីបតីប្រេស៊ីល Luiz Inácio Lula da Silva និងប្រធានាធិបតីអាហ្វ្រិកខាងត្បូង Cyril Ramaphosa។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Bernama, លោកលើកឡើងបែបនេះក្នុងសុន្ទរកថាទិវាអាស៊ានលើកទី៥៨ ដែលប្រារព្ធធ្វើឡើងនៅថ្ងៃសុក្រទី៨ខែសីហាឆ្នាំ២០២៥ ក្នុងទីក្រុង Cyberjaya ប្រទេសម៉ាឡេស៊ី។

លោក Anwar អះអាងថា លោក Lula និង Ramaphosa សុទ្ធតែបញ្ជាក់ពីការចូលរួមរួចហើយ ចំណែកឯលោក Trump និងលោក Xi ក៏បង្ហាញសញ្ញាវិជ្ជមានផងដែរ។

ក្នុងអំឡុងពិធីនោះ នាយករដ្ឋមន្ត្រីម៉ាឡេស៊ី ក៏សាទរចំពោះបទឈប់បាញ់កម្ពុជា-ថៃដែរ ហើយប្រកាសថា បទឈប់បាញ់យ៉ាងរហ័សនិងមានប្រសិទ្ធភាពនេះគឺជាសមិទ្ធផលដ៏ធំមិនធ្លាប់មានពីមុនមកសម្រាប់អាស៊ាន។

តាមសម្តីលោក អាន់វ៉ា, បទឈប់បាញ់នេះ បង្ហាញពីការប្តេជ្ញាចិត្តយ៉ាងមុតមាំពីសំណាក់មេដឹកនាំរបស់អាស៊ាន ក្នុងការដោះស្រាយជម្លោះ។

សូមជម្រាបថា ប្រទេសម៉ាឡេស៊ី ក្នុងនាមជាប្រធានអាស៊ានសម្រាប់ឆ្នាំ២០២៥ នឹងធ្វើជាម្ចាស់ផ្ទះនៃកិច្ចប្រជុំកំពូលនៅទីក្រុងគូឡាឡាំពួ ក្រោមប្រធានបទ «បរិយាបន្ននិងនិរន្តរភាព» ចាប់ពីថ្ងៃទី៣-៥ខែវិច្ឆិកា។

កិច្ចប្រជុំនេះនឹងប្រមូលផ្តុំមេដឹកនាំមកពីប្លុកសមាជិកទាំង១០និងដៃគូសន្ទនា ដើម្បីពិភាក្សាអំពីសន្តិសុខក្នុងតំបន់ កិច្ចសហប្រតិបត្តិការសេដ្ឋកិច្ច និងបញ្ហាសកលសំខាន់ៗ៕

អត្ថបទ៖ សុខ សុវណ្ណ

ចុចអាន៖ ម៉ាឡេស៊ី ថា បទឈប់បាញ់កម្ពុជា-ថៃ ជាសមិទ្ធផលដ៏ធំមិនធ្លាប់មាន សម្រាប់អាស៊ាន